Mujh se Muhammad Bin Abdur Rahim ne bayan kiya ‘ hum se Abu Ahmad Zubairi ne bayan kiya ‘ hum se Abdur Rahman Bin Ghaseel ne ‘ un se Hamza Bin Abi Usaid aur Munzir Bin Abi Usaid ne aur un se Abu Usaid Radi Allahu Anhu ne bayan kiya ke jang-e-Badr mein Rasul Allah Sallallahu Alaihi Wasallam ne humein hidayat ki thi ke jab kuffar tumhare qareeb aa jayein yani hamla o hujoom karein (itne ke tumhare nishane ki zadd mein aa jayein) to phir un par teer barsane shuru karna aur (jab tak wo tum se qareeb na hon) apne teer ko mehfooz rakhna
.

Hum se Abu Nuaym ne bayan kiya, kaha hum se Abdur Rahman Bin Ghaseel ne, un se Hamza Bin Abi Asaid ne aur un se un ke walid ne bayan kiya ke Nabi Kareem (Sallallahu Alaihi Wasallam) ne Badr ki larai ke mauqe par jab hum Quraish ke muqabla mein saff bandhe hue khare ho gaye thay aur wo hamare muqabla mein tayyar thay, farmaya ke agar (hamla karte hue) Quraish tumhare qareeb aa jayein to tum log teer andazi shuru kar dena taake wo peeche hatne par majboor hon
.

Mujh se Abdullah Bin Muhammad Jafi ne bayan kiya ‘ hum se Abu Ahmad Zubairi ne bayan kiya ‘ hum se Abdur Rahman Bin Ghaseel ne bayan kiya ‘ un se Hamza Bin Abi Usaid aur Zubair Bin Munzir Bin Abi Usaid ne aur un se Abu Usaid Radi Allahu Anhu ne bayan kiya ke Rasul Allah Sallallahu Alaihi Wasallam ne jang-e-Badr ke mauqa par humein hidayat farmai thi ke jab kuffar tumhare qareeb aa jayein to un par teer chalana aur (jab tak wo door rahein) apne teeron ko bachaye rakhna
.