Mujh se Farwah Bin Abi-ul-Maghra ne bayan kiya, kaha hum se Ali Bin Mushir ne bayan kiya, un se Hisham Bin Urwah ne, un se un ke walid ne aur un se Aisha Radi Allahu Anha ne bayan kiya ke Nabi Kareem Sallallahu Alaihi Wasallam se mera nikah jab hua to meri umr chay saal ki thi, phir hum Madinah (hijrat kar ke) aaye aur Bani Haris Bin Khazraj ke yahan qiyam kiya. Yahan aa kar mujhe bukhar charha aur is ki wajah se mere baal girne lage. Phir mondhon tak khoob baal ho gaye phir ek din meri walidah Umm Rooman Radi Allahu Anha aayin. Is waqt mein apni chand saheliyon ke sath jhoola jhool rahi thi unhon ne mujhe pukara to mein hazir ho gayi. Mujhe kuch maloom nahi tha ke mere sath un ka kya irada hai. Aakhir unhon ne mera hath pakar kar ghar ke darwaza ke paas khara kar diya aur mera saans phoola ja raha tha. Thori der mein jab mujhe kuch sukoon hua to unhon ne thora sa pani le kar mere munh aur sar par phera. Phir ghar ke andar mujhe le gayein. Wahan Ansar ki chand aurtein mojood theen, jinhon ne mujhe dekh kar dua di ke khair o barkat aur accha naseeb le kar aayi ho. Meri maan ne mujhe inhein ke hawala kar diya aur unhon ne meri aaraish ki. Is ke baad din charhe achanak Rasul Allah Sallallahu Alaihi Wasallam mere paas tashreef laye aur unhon ne mujhe aap ke supard kar diya meri umr is waqt nau saal thi
.

Mujh se Ubaid Bin Ismail ne bayan kiya, unhon ne kaha hum se Abu Usama ne bayan kiya, un se Hisham ne, un se un ke walid (Urwah Bin Zubair) ne bayan kiya ke Khadijah Radi Allahu Anha ki wafat Nabi Kareem Sallallahu Alaihi Wasallam ki Madinah ko hijrat se teen saal pehle ho gayi thi. Nabi Kareem Sallallahu Alaihi Wasallam ne aap ki wafat ke taqreeban do saal baad Aisha Radi Allahu Anha se nikah kiya is waqt un ki umr chay saal ki thi jab ruksati hui to wo nau saal ki theen
.

`Hum se Ismail bin Abdullah ne bayan kiya, kaha ke mujh se mere bhai Abdul Hameed ne bayan kiya, un se Sulaiman bin Bilal ne, un se Hisham bin Urwa ne, un se un ke walid ne aur un se Aisha Radi Allahu Anha ne bayan kiya ke mein ne arz kiya: ya Rasul Allah! farmaiye agar Aap kisi wadi mein utrein aur is mein ek darakht aisa ho jis mein oont char gaye hon aur ek darakht aisa ho jis mein se kuch bhi na khaya gaya ho to Aap apna oont in darakhton mein se kis darakht mein churayein ge? Nabi Kareem صلی اللہ علیہ وسلم ne farmaya ke is darakht mein jis mein se abhi churaya nahi gaya ho. Un ka ishara is taraf tha ke Rasul Allah صلی اللہ علیہ وسلم ne un ke siwa kisi kanwari larki se nikah nahi kiya.

`Hum se Abdullah bin Yusuf Taneesi ne bayan kiya, kaha hum se Laith bin Saad ne, un se Yazid bin Habib ne, un se Irak bin Malik ne aur un se Urwa ne ke Nabi Kareem صلی اللہ علیہ وسلم ne Aisha Radi Allahu Anha se shadi ke liye Abu Bakr Siddiq Radi Allahu Anhu se kaha. Abu Bakr Radi Allahu Anhu ne Nabi Kareem صلی اللہ علیہ وسلم se arz ki ke mein Aap ka bhai hoon. (to Aisha se kaise nikah karein ge) Nabi Kareem صلی اللہ علیہ وسلم ne farmaya ke Allah ke deen aur is ki kitab par iman lane ke rishte se tum mere bhai ho aur Aisha mere liye halal hai.

Hum se Muhammad bin Yusuf Baykandi ne byaan kiya , kaha hum se Sufyan bin Uyaynah ne byaan kiya , un se Hisham bin Urwah ne , un se un ke walid ne aur un se Aisha razi Allahu anha ne ke Nabi Karim salla Allahu alaihi wasallam ne jab in ka nikah kiya to in ki umr chhay saal thi aur jab in se sohbat ki to is waqt in ki umr nau baras ki thi aur woh nau baras Aap ke paas rahein .

Hum se Mualla bin Asad ne byaan kiya , kaha hum se Wahb ne byaan kiya , un se Hisham bin Urwah ne , un se un ke walid ne aur un se Aisha razi Allahu anha ne ke Nabi Karim salla Allahu alaihi wasallam ne in se nikah kiya to in ki umr chhay saal thi aur jab in se sohbat ki to in ki umr nau saal thi . Hisham bin Urwah ne kaha ke mujhe khabar di gayi hai ke woh Nabi Karim salla Allahu alaihi wasallam ke saath nau saal tak rahein .

Hum se Farwah bin Abi al-Maghra ne byaan kiya, kaha hum se Ali bin Mushar ne byaan kiya, un se Hisham bin Urwah ne, un se un ke walid ne aur un se Aisha razi Allahu anha ne ke Nabi Karim salla Allahu alaihi wasallam ne jab mujh se shadi ki to meri walda (Umm Rooman bint Aamir) mere paas aayin aur mujhe Nabi Karim salla Allahu alaihi wasallam ke ghar ke andar le gayin. Ghar ke andar qabila Ansar ki auratein maujood thien. Unhon ne (mujhko aur meri maan ko) yun dua di «baarakallahu wa baaraka» ”Allah kare tum achhi ho tumhara naseeba achha ho.“

Hum se Qubaysah bin Utbah ne byaan kiya, kaha hum se Sufyan ne byaan kiya, un se Hisham bin Urwah ne aur un se Urwah ne ke Nabi Karim salla Allahu alaihi wasallam ne Aisha razi Allahu anha se nikah kiya to un ki umr chhay saal ki thi aur jab un ke saath khilwat ki to un ki umr nau saal ki thi aur woh Nabi Karim salla Allahu alaihi wasallam ke saath nau saal tak rahein.

Mujh se Farwah bin Abi al-Maghra ne byaan kiya, kaha hum se Ali bin Mushar ne byaan kiya, un se Hisham bin Urwah ne, un se un ke walid ne aur un se Aisha razi Allahu anha ne byaan kiya ke Nabi Karim salla Allahu alaihi wasallam ne mujh se shadi ki thi. Meri walda mere paas aayin aur tanha mujhe ek ghar mein dakhil kar diya. Phir mujhe kisi cheez ne khauf nahi dilaya siwaye Rasool Allah salla Allahu alaihi wasallam ke ke Aap achanaak hi mere paas chasht ke waqt aa gaye. Aap ne mujh se milap farmaya.