Hum se Ismail Bin Abdullah ne bayan kiya, kaha ke mujh se Ibrahim Bin Saad ne bayan kiya, un se un ke walid ne, un se un ke dada ne ke jab Muhajir log Madinah mein aaye to Rasul Allah Sallallahu Alaihi Wasallam ne Abdur Rahman Bin Auf aur Saad Bin Rabee ke darmiyan bhai chara kara diya. Saad Radi Allahu Anhu ne Abdur Rahman Bin Auf Radi Allahu Anhu se kaha ke mein Ansar mein sab se zyada doulat mand hoon is liye aap mera aadha mal le lein aur meri do biwiyan hain aap unhein dekh lein jo aap ko pasand ho is ke mutaliq mujhe batayein mein ise talaq de doon ga. Iddat guzarne ke baad aap is se nikah kar lein. Is par Abdur Rahman Bin Auf Radi Allahu Anhu ne kaha: Allah tumhare ahl aur mal mein barkat ata farmaye tumhara bazaar kidhar hai? Chunanche mein ne Bani Qainuqa ka bazaar unhein bata diya, jab wahan se kuch tijarat kar ke laute to un ke sath kuch paneer aur ghee tha phir wo isi tarah rozana subah sawere bazaar mein chale jaate aur tijarat karte aakhir ek din khidmat-e-Nabwi mein aaye to un ke jism par (khushbu ki) zardi ka nishan tha aap Sallallahu Alaihi Wasallam ne farmaya ye kya hai unhon ne bataya ke mein ne shadi kar li hai. Aap Sallallahu Alaihi Wasallam ne farmaya: Mahr kitna ada kiya hai? Arz kiya ke sone ki ek guthli ya (ye kaha ke) ek guthli ke wazan barabar sona ada kiya hai, ye shak Ibrahim rawi ko hua
.

Hum se Abdul Aziz Bin Abdullah Owaisi ne bayan kiya, un se Ibrahim Bin Saad ne bayan kiya, un se un ke walid Saad ne bayan kiya, un se un ke dada (Ibrahim Bin Abdur Rahman Bin Auf Radi Allahu Anhu) ne bayan kiya ke Abdur Rahman Bin Auf (Radi Allahu Anhu) ne kaha ke jab hum Madinah aaye to Rasul Allah (Sallallahu Alaihi Wasallam) ne mere aur Saad Bin Rabee Ansari ke darmiyan bhai chara kara diya. Saad Bin Rabee (Radi Allahu Anhu) ne kaha ke mein ansar ke sab se zyada maldar logon mein se hoon. Is liye apna aadha mal mein aap ko deta hoon aur aap khud dekh lein ke meri do biwiyon mein se aap ko kaun zyada pasand hai. Mein aap ke liye unhein apne se alag kar doon ga (yaani talaq de doon ga) jab un ki iddat poori ho jaye to aap un se nikah kar lein. Bayan kiya ke is par Abdur Rahman (Radi Allahu Anhu) ne farmaya, mujhe un ki zaroorat nahi. Kya yahan koi bazaar hai jahan karobar hota ho ? Saad (Radi Allahu Anhu) ne ”Suq Qaynuqa“ ka naam liya. Bayan kiya ke jab subah hui to Abdur Rahman (Radi Allahu Anhu) paneer aur ghee laye. Rawi ne bayan kiya ke phir wo tijarat ke liye bazaar aane jane lage. Kuch dinon ke baad ek din wo Rasul Allah (Sallallahu Alaihi Wasallam) ki khidmat mein hazir hue to zard rang ka nishan (kapre ya jism par) tha. Rasul Allah ne daryaft farmaya kya tum ne shadi kar li hai ? Unhon ne kaha ke han, Aap (Sallallahu Alaihi Wasallam) ne daryaft farmaya ke kis se ? bole ke ek ansari khatoon se. Daryaft farmaya aur mahr kitna diya hai ? arz kiya ke ek ghutli barabar sona diya hai ya (ye kaha ke) sone ki ek ghutli di hai. Phir Nabi Kareem (Sallallahu Alaihi Wasallam) ne farmaya, accha to walima kar khwah ek bakri hi ka ho
.

Hum se Qutaiba ne bayan kiya, kaha ke hum se Ismail Bin Jafar ne bayan kiya, un se Humaid ne aur un se Anas (Radi Allahu Anhu) ne ke jab Abdur Rahman Bin Auf (Radi Allahu Anhu) humare yahan aaye thay to Rasul Allah (Sallallahu Alaihi Wasallam) ne un ka bhai-chara Saad Bin Rabi (Radi Allahu Anhu) se karaya tha
.

Hum se Qutaibah ne bayan kiya, kaha hum se Ismail Bin Jafar ne bayan kiya, un se Humaid ne aur un se Anas Bin Malik Radi Allahu Anhu ne ke jab Abdur Rahman Bin Auf Radi Allahu Anhu (Makkah se hijrat kar ke Madinah aaye to) Rasul Allah Sallallahu Alaihi Wasallam ne un ke aur Saad Bin Rabee Radi Allahu Anhu ke darmiyan bhai chara kara diya. Saad Radi Allahu Anhu bahut doulat mand thay, unhon ne Abdur Rahman Bin Auf Radi Allahu Anhu se kaha: Ansar ko maloom hai ke mein un mein sab se zyada maldar hoon is liye mein apna aadha aadha mal apne aur aap ke darmiyan baant dena chahta hoon aur mere ghar mein do biwiyan hain jo aap ko pasand ho mein ise talaq de doon ga is ki iddat guzar jaane par aap is se nikah kar lein. Abdur Rahman Bin Auf Radi Allahu Anhu ne kaha Allah tumhare ahl o mal mein barkat ata farmaye, (mujh ko apna bazaar dikhla do) phir wo bazaar se is waqt tak wapas nahi aaye jab tak kuch ghee aur paneer bator nafa bacha nahi liya. Thore hi dinon ke baad jab Rasul Allah Sallallahu Alaihi Wasallam ki khidmat mein wo hazir hue to jism par zardi ka nishan tha. Aap Sallallahu Alaihi Wasallam ne poocha ye kya hai? Bole ke mein ne ek Ansari khatoon se shadi kar li hai. Aap Sallallahu Alaihi Wasallam ne poocha mahr kya diya hai? Bole ek guthli ke barabar sona ya (ye kaha ke) sone ki ek guthli di hai, is ke baad aap Sallallahu Alaihi Wasallam ne farmaya accha ab walima karo khwah ek bakri hi se ho
.