Hum se Muhammad Bin Bashar ne bayan kiya, kaha hum se Ghundar ne bayan kiya, un se Shuba ne bayan kiya, un se Hakam ne aur unhon ne Abu Wail se suna, unhon ne bayan kiya ke jab Ali Radi Allahu Anhu ne Ammar aur Hasan Radi Allahu Anhuma ko Kufa bheja tha taake logon ko apni madad ke liye tayyar karein to Ammar Radi Allahu Anhu ne un se khitab karte hue farmaya tha: Mujhe bhi khoob maloom hai ke Aisha Radi Allahu Anha Rasul Allah Sallallahu Alaihi Wasallam ki zaujah hain is duniya mein bhi aur akhirat mein bhi, lekin Allah Ta'ala tumhein azmana chahta hai ke dekhe tum Ali Radi Allahu Anhu ki ittaba karte ho (jo barhaqq khalifa hain) ya Aisha Radi Allahu Anha ki
.

`Hum se Abdullah bin Muhammad ne bayan kiya, unhon ne kaha hum se Yahya bin Adam ne bayan kiya, unhon ne kaha hum se Abu Bakr bin Ayash ne bayan kiya, unhon ne kaha hum se Abu Haseen ne bayan kiya, unhon ne kaha hum se Abu Maryam Abdullah bin Ziyad al-Asadi ne bayan kiya ke jab Talha, Zubair aur Aisha Radi Allahu Anhum Basra ki taraf rawana hue to Ali Radi Allahu Anhu ne Ammar bin Yasir aur Hasan bin Ali Radi Allahu Anhuma ko bheja. Yeh donon buzurg hamare paas Kufa aaye aur mimbar par chadhe. Hasan bin Ali Radi Allahu Anhuma mimbar ke oopar sab se oonchi jagah thay aur Ammar bin Yasir Radi Allahu Anhuma in se neeche thay. Phir hum in ke paas jama ho gaye aur mein ne Ammar Radi Allahu Anhu ko yeh kehte suna ke Aisha Radi Allahu Anha Basra gayi hain aur Allah ki qasam wo duniya o aakhirat mein tumhare Nabi Kareem صلی اللہ علیہ وسلم ki paak biwi hain lekin Allah Tabaraka wa Ta'ala ne tumhein aazmaya hai taake jaan le ke tum is Allah ki ita'at karte ho ya Aisha Radi Allahu Anha ki.

`Hum se Abu Nu'aim ne bayan kiya, unhon ne kaha hum se Ibn Abi Ganiyya ne bayan kiya, un se Hakam ne bayan kiya aur un se Abu Wa'il ne bayan kiya ke Kufa mein Ammar Radi Allahu Anhu mimbar par khade hue aur Aisha Radi Allahu Anha aur in ki rawangi ka zikr kiya aur kaha ke bilashuba wo duniya o aakhirat mein tumhare Nabi Kareem صلی اللہ علیہ وسلم ki zauja hain lekin tum in ke baare mein aazmaye gaye ho.