Hum se Yahya Bin Bukair ne bayan kiya, kaha hum se Laith ne bayan kiya, un se Aqeel ne, un se Ibn Shihab ne bayan kiya, kaha mujh ko Ubaidullah Bin Abdullah ne khabar di aur unhein Abdullah Bin Abbas (Radi Allahu Anhuma) ne ke Rasul Allah (Sallallahu Alaihi Wasallam) (sar ke aage ke balon ko peshani par) para rehne dete thay aur mushrikeen ki ye aadat thi ke wo aage ke sar ke baal do hisson mein taqseem kar lete thay (peshani par para nahi rehne dete thay) aur Ahl-e-Kitab (Yahood-o-Nasara) sar ke aage ke baal peshani par para rehne dete thay. Nabi Kareem (Sallallahu Alaihi Wasallam) in maamlat mein jin ke mutaliq Allah Ta'ala ka koi hukam aap ko na mila hota Ahl-e-Kitab ki muwafiqat pasand farmate (aur hukam nazil hone ke baad wahi par amal karte thay) phir Nabi Kareem (Sallallahu Alaihi Wasallam) bhi sar mein maang nikalne lage
.

Hum se Abdan ne bayan kiya, unhon ne kaha hum se Abdullah Bin Mubarak ne bayan kiya, unhon ne kaha ke hum se Yunus ne, un se Zuhri ne bayan kiya, kaha mujh ko Ubaidullah Bin Abdullah Bin Utbah ne khabar di, un se Abdullah Bin Abbas Radi Allahu Anhuma ne kaha ke Nabi Kareem Sallallahu Alaihi Wasallam sar ke baal ko peshani par latka dete thay aur mushrikeen maang nikalte thay aur Ahl-e-Kitab bhi apne saron ke baal peshani par latkaye rehne dete thay. Jin umoor mein Nabi Kareem Sallallahu Alaihi Wasallam ko (wahyi ke zariya) koi hukm nahi hota tha Aap Sallallahu Alaihi Wasallam un mein Ahl-e-Kitab ki muwafiqat pasand karte thay. Phir baad mein Nabi Kareem Sallallahu Alaihi Wasallam bhi maang nikalne lage thay
.

Hum se Ahmad bin Yunus ne bayan kiya, unhon ne kaha hum se Ibrahim bin Saad ne bayan kiya, unhon ne kaha hum se Shihab ne bayan kiya, in se Ubaidullah bin Abdullah ne bayan kiya aur in se Abdullah bin Abbas razi Allahu anhuma ne bayan kiya ke Nabi Karim salla Allahu alaihi wasallam ko agar kisi masla mein koi hukm maloom na hota to Aap is mein Ahl e Kitab ke amal ko apnate thay. Ahl e Kitab apne sar ke baal latkaye rakhte aur mushrikeen maang nikaalte thay. Chunanche Nabi Karim salla Allahu alaihi wasallam bhi (Ahl e Kitab ki muwafiqat mein) pehle sar ke baal peshani ki taraf latkate lekin baad mein Aap beech mein se maang nikaalne lage.