Surah-al-Baqarah mein lafz «Haadu» ke maani hain ke Yahudi hue aur Surah-al-A'raf mein «Hudna» «Tubna» ke maani mein hai (hum ne tauba ki) isi se «Haa'id» ke maani «Taa'ib» yani tauba karne wala
.

Hum se Muslim Bin Ibrahim ne bayan kiya, kaha hum se Qurrah Bin Khalid ne bayan kiya, un se Muhammad Bin Sirin aur un se Abu Hurairah Radi Allahu Anhu ne ke Nabi Kareem Sallallahu Alaihi Wasallam ne farmaya ”agar das Yahudi (ahbar o ulama) mujh par iman le aate to tamam Yahood musalman ho jaate.“
.

Mujh se Ahmad ya Muhammad Bin Ubaidullah Ghadani ne bayan kiya, kaha hum se Hammad Bin Usama ne bayan kiya ke unhein Abu Umais ne khabar di, unhein Qais Bin Muslim ne, unhein Tariq Bin Shihab ne aur un se Abu Musa Ashari Radi Allahu Anhu ne bayan kiya ke jab Nabi Kareem Sallallahu Alaihi Wasallam Madinah tashreef laye to Aap Sallallahu Alaihi Wasallam ne dekha ke Yahudi Ashurah ke din ki tazem karte hain aur is din roza rakhte hain. Nabi Kareem Sallallahu Alaihi Wasallam ne farmaya ke hum is din roza rakhne ke zyada haqdar hain. Chunanche Aap Sallallahu Alaihi Wasallam ne is din ke roze ka hukm diya
.

Hum se Ziyad Bin Ayub ne bayan kiya, unhon ne kaha hum se Hushaim ne bayan kiya, unhon ne kaha hum se Abu Bishr Jafar ne bayan kiya, un se Saeed Bin Jubair aur un se Ibn Abbas Radi Allahu Anhuma ne bayan kiya ke jab Nabi Kareem Sallallahu Alaihi Wasallam Madinah tashreef laye to Aap Sallallahu Alaihi Wasallam ne dekha ke Yahudi Ashurah ke din roza rakhte hain. Is ke mutaliq un se poocha gaya to unhon ne bataya ke ye wo din hai jis mein Allah Ta'ala ne Musa Alaihis Salam aur Bani Israeel ko Firaun par fatah inayat farmai thi chunanche hum is din ki tazem mein roza rakhte hain. Nabi Kareem Sallallahu Alaihi Wasallam ne farmaya ke hum Musa Alaihis Salam se tumhari ba-nisbat zyada qareeb hain aur Aap Sallallahu Alaihi Wasallam ne is din roza rakhne ka hukm diya
.

Hum se Abdan ne bayan kiya, unhon ne kaha hum se Abdullah Bin Mubarak ne bayan kiya, unhon ne kaha ke hum se Yunus ne, un se Zuhri ne bayan kiya, kaha mujh ko Ubaidullah Bin Abdullah Bin Utbah ne khabar di, un se Abdullah Bin Abbas Radi Allahu Anhuma ne kaha ke Nabi Kareem Sallallahu Alaihi Wasallam sar ke baal ko peshani par latka dete thay aur mushrikeen maang nikalte thay aur Ahl-e-Kitab bhi apne saron ke baal peshani par latkaye rehne dete thay. Jin umoor mein Nabi Kareem Sallallahu Alaihi Wasallam ko (wahyi ke zariya) koi hukm nahi hota tha Aap Sallallahu Alaihi Wasallam un mein Ahl-e-Kitab ki muwafiqat pasand karte thay. Phir baad mein Nabi Kareem Sallallahu Alaihi Wasallam bhi maang nikalne lage thay
.

Mujh se Ziyad Bin Ayub ne bayan kiya kaha, hum se Hushaim ne bayan kiya kaha, hum ko Abu Bishr (Jabir Bin Abi Wahshiyah) ne khabar di, unhein Saeed Bin Jubair aur un se Ibn Abbas Radi Allahu Anhuma ne kaha ke wo Ahl-e-Kitab hi to hain jinhon ne aasmani kitab ko tukre tukre kar dala, baaz baton par iman laye aur baaz baton ka inkar kiya
.