Hum se Abu Ali Hasan Bin Mansoor ne bayan kiya, kaha hum se Hajjaj Bin Muhammad Al-Aawar ne Masis-ah (shehar mein) bayan kiya, kaha hum se Shuba ne bayan kiya, un se Hakam ne bayan kiya ke mein ne Abu Juhaifah (Radi Allahu Anhu) ne suna, unhon ne bayan kiya ke Rasul Allah (Sallallahu Alaihi Wasallam) dopahar ke waqt safar ke irada se nikle. Bath-ha nami jagah par pahunch kar aap (Sallallahu Alaihi Wasallam) ne wazu kiya aur Zohar ki namaz do rakat (qasr) parhi phir Asar ki bhi do rakat (qasr) parhi. Aap (Sallallahu Alaihi Wasallam) ke samne ek chouta sa neza (bataur sutra) gara hua tha. Aun ne apne walid se is riwayat mein ye zyada kiya hai ke Abu Juhaifah (Radi Allahu Anhu) ne kaha ke is neza ke aage se aane jane wale aa ja rahe thay. Phir Sahaba aap ke pas aa gaye aur aap ke mubarak hathon ko tham kar apne chehron par pherne lage. Abu Juhaifah (Radi Allahu Anhu) ne bayan kiya ke mein ne bhi Aap (Sallallahu Alaihi Wasallam) ke dast-e-mubarak ko apne chehre par rakkha. Is waqt wo barf se bhi zyada thanda aur mushk se bhi zyada khushbudar tha
.

Hum se Adam ne bayan kiya, unhon ne kaha hum se Sho’bah ne bayan kiya, unhon ne kaha hum se Hakam ne bayan kiya, unhon ne Abu Juhaifah Radhiallahu Anhu se suna, woh kehte the ke (ek din) Rasoolullah Sallallahu Alaihi Wasallam hamaare paas dopahar ke waqt tashreef laaye to Aap Sallallahu Alaihi Wasallam ke liye Wuzu ka paani haazir kiya gaya jis se Aap Sallallahu Alaihi Wasallam ne Wuzu farmaaya. Log Aap Sallallahu Alaihi Wasallam ke Wuzu ka bacha huwa paani le kar use (apne badan par) pherne lage. Aap Sallallahu Alaihi Wasallam ne Zohr ki do rak’atein ada ki aur Asr ki bhi do rak’atein aur Aap Sallallahu Alaihi Wasallam ke saamne (aad ke liye) ek nezah tha.

Hum se Muhammad Bin Salam ne bayan kiya, kaha ke hum ko Abu Khalid Ahmar ne khabar di, kaha ke hum ko Humaid ne khabar di, kaha ke mein ne Anas (Radi Allahu Anhu) se Nabi Kareem (Sallallahu Alaihi Wasallam) ke rozon ke mutaliq poocha. Aap ne farmaya ke jab bhi mera dil chahta ke aap ko roze se dekhoon to mein aap ko roze se hi dekhta. Aur baghair roze ke chahta to baghair roze se hi dekhta. Raat mein kharay (namaz parhte) dekhna chahta to isi tarah namaz parhte dekhta. Aur sote hue dekhna chahta to isi tarah dekhta. Mein ne Nabi Kareem (Sallallahu Alaihi Wasallam) ke mubarak hathon se zyada narm-o-nazuk resham ke kapron ko bhi nahi dekha. Aur na mushk-o-anbar ko aap ki khushboo se zyada khushboodar paya
.

Hum se Sulaiman bin Harb ne bayan kiya, kaha hum se Hammad ne bayan kiya, un se Thabit ne aur un se Anas bin Malik Radi Allahu Anhu ne bayan kiya ke na to Nabi Kareem Sallallahu Alaihi Wa Sallam ki hatheli se zyada narm-o-nazuk koi hareer-o-deebaj mere hathon ne kabhi chhua aur na mein ne Rasoolullah Sallallahu Alaihi Wa Sallam ki khushbu se zyada behtar aur pakeeza koi khushbu ya atar sungha.