Hum se Ishaq Bin Nasr ne bayan kiya, unhon ne kaha hum ko Abdur Razzaq ne khabar di, unhein Maamar ne, unhein Hammam ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Ek shakhs ne doosre shakhs se makan khareeda aur makan ke khareedar ko is makan mein ek ghara mila jis mein sona tha jis se wo makan is ne khareeda tha is se is ne kaha bhai ghara le ja. Kyunke mein ne tum se ghar khareeda hai sona nahi khareeda tha. Lekin pehle malik ne kaha ke mein ne ghar ko in tamam cheezon samait tumhein bech diya tha jo is ke andar maujood hon. Ye dono ek teesre shakhs ke pas apna muqaddama le gaye. Faisla karne wale ne un se poocha kya tumhari koi aulad hai? Is par ek ne kaha ke mere ek larka hai aur doosre ne kaha ke meri ek larki hai. Faisla karne wale ne un se kaha ke larke ka larki se nikah kar do aur sona unhein par kharch kar do aur khairat bhi kar do
."

Hum se Ismail ne bayan kiya, kaha ke mujh se Imam Malik (Rahimahullah) ne bayan kiya, un se Nafi ne, aur un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, ek aurat ko azab, ek billi ki wajah se hua jise us ne itni dair tak bandhe rakkha tha ke wo bhook ki wajah se mar gayi. Aur wo aurat isi wajah se dozakh mein dakhil hui. Nabi Kareem (Sallallahu Alaihi Wasallam) ne farmaya ke Allah Ta'ala ne us se farmaya tha aur Allah Ta'ala hi ziyada janne wala hai ke jab tu ne is billi ko bandhe rakkha us waqt tak na tu ne ise khilaya na pilaya aur na chhora ke wo zameen ke keere makore hi kha kar apna pait bhar leti
.