Hum se Ibrahim Bin Al-Munzir ne bayan kiya unhon ne kaha hum se Abu Zamrah ne bayan kiya unhon ne kaha hum se Musa ne bayan kiya un se Nafay ne bayan kiya ke Abdullah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne ek din logon ke samne Dajjal ka zikr kiya aur farmaya ke is mein koi shuba nahi ke Allah Ta'ala kana nahi hai lekin Dajjal dahni aankh se kana hoga is ki aankh uthe hue angoor ki tarah hogi

Salim ne bayan kiya, un se Abdullah Bin Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne Sahaba ko khitab farmaya, Aap ne Allah Ta'ala ki sana bayan ki, jo us ki shan ke layak thi. Phir Dajjal ka zikr farmaya, aur farmaya ke mein bhi tumhein is ke (fitnon se) darata hoon, koi Nabi aisa nahi guzra jis ne apni qaum ko is ke fitnon se na daraya ho, Nuh (Alaihis Salam) ne bhi apni qaum ko is se daraya tha lekin mein is ke bare mein tum se ek aisi baat kahoon ga jo kisi Nabi ne apni qaum se nahi kahi, aur wo baat ye hai ke Dajjal kana hoga aur Allah Ta'ala is se paak hai
.