Hum se Abdullah Bin Yusuf Tanisi ne bayan kiya kaha hum se Laith Bin Saad ne bayan kiya kaha ke mujh se Aqeel ne bayan kiya un se Ibn Shihab ne unhon ne Urwah Bin Zubair se suna unhon ne bayan kiya ke Aisha (Radi Allahu Anha) ne kaha phir Nabi Kareem (Sallallahu Alaihi Wasallam) (Ghaar-e-Hira se) Umm-ul-Momineen Khadija (Radi Allahu Anha) ke pas lout aye to Aap (Sallallahu Alaihi Wasallam) ka dil dharak raha tha. Khadija (Radi Allahu Anha) Aap ko Waraqah Bin Naufal ke pas le gayeen, wo Nasrani ho gaye thay aur Injeel ko Arabi mein parhte thay. Waraqah ne poocha ke aap kya dekhte hain? Aap ne unhein bataya to unhon ne kaha ke yehi hain wo «namoos» jinhein Allah Ta'ala ne Musa (Alaihis Salam) ke pas bheja tha aur agar mein tumhare zamane tak zinda raha to mein tumhari poori madad karoon ga. «namoos» mahram-e-raaz ko kehte hain jo aise raaz se bhi aagah ho jo aadmi doosron se chupaye

Hum ko Yahya bin Bukair ne yeh Hadees bayan ki, woh kehte hain ke is Hadees ki hum ko Laith ne khabar di, Laith Uqail se riwayat karte hain. Uqail Ibn-e-Shihaab se, woh ’Urwah bin Zubair se, woh Umm-ul-Mo’mineen Aisha Radhiallahu Anha se naql karte hain ke unhon ne batlaaya ke Nabi-e-Kareem Sallallahu Alaihi Wasallam par Wahi ka ibtidaayi daur achche sachche pakeezah khwaabon se shuru huwa. Aap Sallallahu Alaihi Wasallam khwaab mein jo kuch dekhte woh subah ki roshni ki tarah sahih aur sachcha saabit hota. Phir min jaanib-e-qudrat Aap Sallallahu Alaihi Wasallam tanhaayi pasand ho gaye aur Aap Sallallahu Alaihi Wasallam ne Ghaar-e-Hira mein khalwat nasheeni ikhtiyaar farmaayi aur kayi kayi din aur raat wahan musalsal ibadat aur yaad-e-ilaahi wa zikr-o-fikr mein mashghool rehte. Jab tak ghar aane ko dil na chaahta tosha saath liye huwe wahan rehte. Tosha khatm hone par hi ahliya mohtarma Khadeejah Radhiallahu Anha ke paas tashreef laate aur kuch tosha saath le kar phir wahan jaa kar khalwat guzeen ho jaate, yahi tareeqa jaari raha yahan tak ke Aap Sallallahu Alaihi Wasallam par haq munkashif ho gaya aur Aap Sallallahu Alaihi Wasallam Ghaar-e-Hira hi mein qiyaam pazeer the ke achaanak Jibrael Alaihissalam Aap Sallallahu Alaihi Wasallam ke paas haazir huwe aur kehne lage ke aye Muhammed! Padho Aap Sallallahu Alaihi Wasallam farmaate hain ke main ne kaha ke main padhna nahi jaanta, Aap Sallallahu Alaihi Wasallam farmaate hain ke farishte ne mujhe pakad kar itne zor se bheencha ke meri taaqat jawab de gayi, phir mujhe chhod kar kaha ke padho, main ne phir wahi jawab diya ke main padha huwa nahi hun. Us farishte ne mujh ko nihayat hi zor se bheencha ke mujh ko sakht takleef mehsoos hue, phir us ne kaha ke padh! Main ne kaha ke main padha huwa nahi hun. Farishte ne teesri baar mujh ko pakda aur teesri martaba phir mujh ko bheencha phir mujhe chhod diya aur kehne laga ke padho apne Rabb ke naam ki madad se jis ne paida kiya aur insaan ko khoon ki phutki se banaaya, padho aur aap ka Rabb bahut hi meharbaaniyaan karne waala hai. Pas yahi aayatein Aap Sallallahu Alaihi Wasallam Jibrael Alaihissalam se sun kar is haal mein Ghaar-e-Hira se waapas huwe ke Aap Sallallahu Alaihi Wasallam ka dil us anokhe waqi’ah se kaanp raha tha. Aap Sallallahu Alaihi Wasallam Khadeejah ke haan tashreef laaye aur farmaaya ke mujhe kambal udhaa do, mujhe kambal udhaa do. Logon ne Aap Sallallahu Alaihi Wasallam ko kambal udhaa diya. Jab Aap Sallallahu Alaihi Wasallam ka darr jaata raha. To Aap Sallallahu Alaihi Wasallam ne apni zauja-e-mohtarma Khadeejah Radhiallahu Anha ko tafseel ke saath yeh waqi’ah sunaaya aur farmaane lage ke mujh ko ab apni jaan ka khauf ho gaya hai. Aap Sallallahu Alaihi Wasallam ki ahliya mohtarma Khadeejah Radhiallahu Anha ne Aap Sallallahu Alaihi Wasallam ki dhaaras bandhaayi aur kaha ke aap ka khayaal sahih nahi hai. Allah ki qasam! Aap ko Allah kabhi ruswa nahi karega, Aap to akhlaaq-e-faazilah ke Malik hain, Aap to kumba parwar hain, be-kason ka boojh apne sar par rakh lete hain, muflison ke liye Aap kamaate hain, mehmaan nawaazi mein Aap be-misaal hain aur mushkil waqt mein Aap amr-e-haq ka saath dete hain. Aise awsaaf-e-hasanah waala insaan yun be-waqt zillat-o-khwaari ki maut nahi paa sakta. phir mazeed tasalli ke liye Khadeejah Radhiallahu Anha Aap Sallallahu Alaihi Wasallam ko Waraqah bin Naufal ke paas le gayien, jo un ke chachazaad bhai the aur zamaana-e-jaahiliyyat mein Nasraani mazhab ikhtiyaar kar chuke the aur Ibraani zabaan ke katib the, chunanche Injeel ko bhi hasb-e-manshaa-e-khudawandi Ibraani zabaan mein likha karte the. (Injeel Suryaani zabaan mein naazil hue thi phir us ka tarjumah Ibraani zabaan mein huwa. Waraqah usi ko likhte the) woh bahut boodhe ho gaye the yahan tak ke un ki beenaayi bhi rukhsat ho chuki thi. Khadeejah Radhiallahu Anha ne un ke saamne Aap Sallallahu Alaihi Wasallam ke halaat bayan kiye aur kaha ke aye chachazaad bhai! Apne bhateeje (Muhammed Sallallahu Alaihi Wasallam) ki zabaani zara in ki kaifiyat sun lijiye woh bole ke bhateeje Aap ne jo kuch dekha hai, us ki tafseel sunaao. Chunanche Aap Sallallahu Alaihi Wasallam ne shuru se aakhir tak poora waqi’ah sunaaya, jise sun kar Waraqah be-ikhtiyar ho kar bol uthe ke yeh to wahi namoos (mu’azzaz raaz daan farishta) hai jise Allah ne Musa Alaihissalam par Wahi de kar bheja tha. Kaash, main aap ke is ahd-e-nubuwwat ke shuru hone par jawaan umr hota. Kaash main us waqt tak zindah rehta jab ke Aap ki qaum Aap ko is shahar se nikaal degi. Rasoolullah Sallallahu Alaihi Wasallam ne yeh sun kar ta’jjub se poocha ke kya woh log mujh ko nikaal denge? (halaanki main to un mein sadiq o ameen aur Maqbool hun) Waraqah bola haan yeh sab kuch sach hai. magar jo shakhs bhi Aap ki tarah amr-e-haq le kar aaya log us ke dushman hi ho gaye hain. Agar mujhe Aap ki nubuwwat ka woh zamaana mil jaaye to main Aap ki poori poori madad karunga. Magar Waraqah kuch dinon ke baad inteqaal kar gaye. phir kuch arsa tak Wahi ki aamad band rahi.

Hum se Abdullah Bin Yusuf ne bayan kiya, kaha hum ko Laith ne khabar di, kaha ke mujh se Aqeel ne bayan kiya, un se Ibn Shihab ne bayan kiya ke mein ne Abu Salama se suna, unhon ne bayan kiya ke mujhe Jabir Bin Abdullah (Radi Allahu Anhuma) ne khabar di aur unhon ne Rasul Allah (Sallallahu Alaihi Wasallam) se suna, aap ne farmaya tha ke (pehle ghar-e-hira mein jo Jibrail Alaihis Salam mujh ko Surah Iqra parha kar gaye thay is ke baad) mujh par wahi ka nazool (teen saal) band raha. Ek baar mein kahin ja raha tha ke mein ne aasman mein se ek awaz suni aur nazar aasman ki taraf uthayi, mein ne dekha ke wahi farishta jo ghar-e-hira mein mere paas aaya tha (yaani Jibrail Alaihis Salam) aasman aur zameen ke darmiyan ek kursi par baitha hua hai. Mein unhein dekh kar itna darr gaya ke zameen par gir pada. Phir mein apne ghar aaya aur kehne laga ke mujhe kuch odha do, mujhe kuch odha do. Is ke baad Allah Ta'ala ne ye ayat nazil farmayi. "Ya aiyuh-al-muddassiru" Allah Ta'ala ke irshad "fahjur" tak. Abu Salama ne kaha ke ayat mein "al-rujza" se butt murad hain
.

Hum se Yahya ne byaan kiya, kaha hum se Waki ne byaan kiya, un se Ali bin Mubarak ne byaan kiya, un se Yahya bin Abi Kaseer ne, unhon ne Abu Salamah bin Abdur Rahman se poocha ke Quran Majeed ki kaun si aayat sab se pehle nazil hui thi. Unhon ne kaha ke «ya ayyuhal muddasshiru» main ne arz kiya ke log to kehte hain ke «iqra bismi rabbikallazhi khalaqa» sab se pehle nazil hui. Abu Salamah ne is par kaha ke main ne Jabir bin Abdullah razi Allahu anhuma se poocha tha aur jo baat abhi tum ne mujh se kahi wahi main ne bhi un se kahi thi lekin Jabir razi Allahu anhu ne kaha tha ke main tum se wahi hadees byaan karta hoon jo hamain se Rasool Allah salla Allahu alaihi wasallam ne irshad farmayi thi. Aap salla Allahu alaihi wasallam ne farmaya tha ke main Ghaar e Hira mein ek muddat ke liye khilwat-nasheen tha. Jab main woh din poore kar ke pahar se utra to mujhe aawaz di gayi, main ne is aawaz par apne dayein taraf dekha lekin koi cheez nahi dikhayi di. Phir bayein taraf dekha idhar bhi koi cheez dikhayi nahi di, samne dekha idhar bhi koi cheez nahi dikhayi di. Peeche ki taraf dekha aur idhar bhi koi cheez nahi dikhayi di. Ab main ne apna sar oopar ki taraf uthaya to mujhe ek cheez dikhayi di. Phir main Khadija razi Allahu anha ke paas aaya aur un se kaha ke mujhe kapra orha do aur mujh par thanda pani daalo. Farmaya ke phir unhon ne mujhe kapra orha diya aur thanda pani mujh par bahaya. Farmaya ke phir yeh aayat nazil hui «ya ayyuhal muddasshiru * qum fa-anzhir * wa rabbaka fakabbir» yani ”Ae kapre mein liptne wale! Uth-iye phir logon ko azab e Ilahi se drayiye aur apne Parvardigar ki barayi byaan kijiye.“

Mujh se Muhammad bin Bashar ne byaan kiya, kaha ke mujh se Abdur Rahman bin Mahdi ne aur un ke ghair (Abu Dawood Tayalisi) ne byaan kiya, kaha ke hum se Harb bin Shaddad ne byaan kiya, un se Yahya bin Abi Kaseer ne, un se Abu Salamah ne aur un se Jabir Abdullah razi Allahu anhuma ne ke Nabi Karim salla Allahu alaihi wasallam ne farmaya ke main Ghaar e Hira mein tanhayi ikhtiyar kiye huay tha. Yeh riwayat bhi Usman bin Amr ki hadees ki tarah hai jo unhon ne Ali bin Mubarak se byaan ki hai.

Hum se Ishaq bin Mansoor ne byaan kiya, kaha hum se Abdus Samad ne byaan kiya, kaha hum se Harb ne byaan kiya ke hum se Yahya ne byaan kiya, kaha ke main ne Abu Salamah se poocha ke Quran Majeed ki kaun si aayat sab se pehle nazil hui thi? Farmaya ke «ya ayyuhal muddasshiru» main ne kaha ke mujhe khabar mili hai ke «iqra bismi rabbikallazhi khalaqa» sab se pehle nazil hui thi. Abu Salamah ne byaan kiya ke main ne Jabir bin Abdullah razi Allahu anhuma se poocha tha ke Quran ki kaun si aayat sab se pehle nazil hui thi? Unhon ne farmaya ke «ya ayyuhal muddasshiru» ”Ae kapre mein liptne wale!“ Main ne un se yahi kaha tha ke mujhe khabar mili hai ke «iqra bismi rabbika» sab se pehle nazil hui thi to unhon ne kaha ke main tumhein wahi khabar de raha hoon jo main ne Rasool Allah salla Allahu alaihi wasallam se suni hai. Nabi Karim salla Allahu alaihi wasallam ne farmaya ke main ne Ghaar e Hira mein tanhayi ikhtiyar ki jab main woh muddat poori kar chuka aur neeche utar kar wadi ke beech mein pahuncha to mujhe pukara gaya. Main ne apne aage peeche dayein bayein dekha aur mujhe dikhayi diya ke farishta aasman aur zameen ke darmiyan kursi par baitha hai. Phir main Khadija (razi Allahu anha) ke paas aaya aur un se kaha ke mujhe kapra orha do aur mere oopar thanda pani daalo aur mujh par yeh aayat nazil hui «ya ayyuhal muddasshiru * qum fa-anzhir * wa rabbaka fakabbir» ”Ae kapre mein liptne wale! Uth-iye phir logon ko azab e aakhirat se drayiye aur apne Parvardigar ki barayi kijiye.“

Hum se Yahya bin Bukayr ne byaan kiya, unhon ne kaha hum se Layth bin Saad ne byaan kiya, un se Aqeel ne, un se Ibn Shihab ne (doosri sanad) aur mujh se Abdullah bin Muhammad ne byaan kiya, unhon ne kaha hum se Abdur Razzaq ne byaan kiya, unhon ne kaha hum ko Mamar ne khabar di, unhein Zuhri ne khabar di, kaha mujh ko Abu Salamah bin Abdur Rahman ne khabar di aur un se Jabir bin Abdullah razi Allahu anhuma ne byaan kiya ke main ne Nabi Karim salla Allahu alaihi wasallam se suna, Nabi Karim salla Allahu alaihi wasallam darmiyan mein wahi ka silsila ruk jaane ka haal byaan farma rahe thay. Aap salla Allahu alaihi wasallam ne farmaya ke main ro raha tha ke main ne aasman ki taraf se aawaz suni. Main ne apna sar oopar uthaya to wahi farishta nazar aaya jo mere paas Ghaar e Hira mein aaya tha. Woh aasman o zameen ke darmiyan kursi par baitha hua tha. Main is ke darr se ghabra gaya phir main ghar wapas aaya aur Khadija se kaha ke mujhe kapra orha do, mujhe kapra orha do. Unhon ne mujhe kapra orha diya phir Allah Ta'ala ne aayat «ya ayyuhal muddasshiru» se «warruj-zha fahjur» tak nazil ki. Yeh surat namaz farz kiye jaane se pehle nazil hui thi «ar-ruj-zha» se murad but hai.

Hum se Abdullah bin Yusuf ne byaan kiya, unhon ne kaha hum se Layth bin Saad ne byaan kiya, un se Aqeel ne byaan kiya, un se Ibn Shihab ne byaan kiya ke main ne Abu Salamah se suna, unhon ne byaan kiya ke main ne Jabir bin Abdullah razi Allahu anhuma se suna, unhon ne Nabi Karim salla Allahu alaihi wasallam se suna, Nabi Karim salla Allahu alaihi wasallam darmiyan mein wahi ke silsile ke ruk jaane se mutalliq byaan farma rahe thay ke main chal raha tha ke main ne aasman ki taraf se aawaz suni. Apni nigah aasman ki taraf utha kar dekha to wahi farishta nazar aaya jo mere paas Ghaar e Hira mein aaya tha. Woh kursi par aasman aur zameen ke darmiyan mein baitha hua tha. Main ne usay dekh kar itna dara ke zameen par gir para. Phir main apni biwi ke paas aaya aur un se kaha ke mujhe kapra orha do, mujhe kapra orha do! mujhe kapra orha do. Phir Allah Ta'ala ne yeh aayat nazil ki «ya ayyuhal muddasshiru» se «warruj-zha fahjur» tak Abu Salamah ne byaan kiya ke «ar-ruj-zha» but ke maani mein hai. Phir wahi garm ho gayi aur silsila nahi toota.

Muhammad bin Shihab ne byaan kiya, unhein Abu Salamah razi Allahu anhu ne khabar di aur un se Jabir bin Abdullah Ansari razi Allahu anhuma ne byaan kiya ke Rasool Allah salla Allahu alaihi wasallam wahi ke kuch dinon ke liye ruk jaane ka zikr farma rahe thay. Nabi Karim salla Allahu alaihi wasallam ne farmaya ke main chal raha tha ke main ne achanaak aasman ki taraf se ek aawaz suni. Main ne nazar utha kar dekha to wahi farishta (Jibraeel alaihissalam) jo mere paas Ghaar e Hira mein aaya tha, aasman aur zameen ke darmiyan kursi par baitha hua nazar aaya. Main in se bahut dara aur ghar wapas aa kar main ne kaha ke mujhe chadar orha do chunanche ghar walon ne mujhe chadar orha di, phir Allah Ta'ala ne yeh aayat nazil ki «ya ayyuhal muddasshiru * qum fa-anzhir * wa rabbaka fakabbir * wa siyaabaka fatahhir * warruj-zha fahjur» ”Ae kapre mein liptne wale! Uth-iye phir logon ko drayiye aur apne Parvardigar ki barayi byaan kijiye aur apne kapron ko paak rakhiye.“ Abu Salamah razi Allahu anhu ne kaha ke «ar-ruj-zha» jahiliyat ke but thay jin ki woh parastish kiya karte thay. Rawi ne byaan kiya ke phir wahi barabar aane lagi.

Hum se Abdullah bin Yusuf ne byaan kiya, kaha hum se Layth bin Saad ne byaan kiya aur un se Aqeel ne, un se Ibn Shihab ne byaan kiya, unhon ne Urwah se suna, un se Aisha razi Allahu anha ne byaan kiya ke phir Rasool Allah salla Allahu alaihi wasallam Khadija razi Allahu anha ke paas wapas tashreef laye aur farmaya «zammilooni zammilooni» ke mujhe chadar orha do, mujhe chadar orha do. Phir Aap ne saara waqia byaan farmaya.