Hum se Ubaidullah Bin Musa ne bayan kiya ya Ibn-e-Salam ne (hum se bayan kiya Ubaidullah Bin Musa ke wasitay se) unhein Ibn Juraij ne khabar di, unhein Abd-ul-Hameed Bin Jubair ne, unhein Said Bin Musayyab ne aur unhein Umm-e-Sharik (Radi Allahu Anha) ne ke Nabi Kareem (Sallallahu Alaihi Wasallam) ne girgat ko maarne ka hukm diya tha aur farmaya ke us ne Ibrahim Alaihis Salam ki aag par phoonka tha
.

Hum se Saeed Bin Afir ne bayan kiya, kaha ke mujh se Laith ne bayan kiya, kaha ke mujh se Aqeel ne bayan kiya, un se Ibn Shihab ne bayan kiya, ke Urwah yaqeen ke sath bayan karte thay aur unhein Marwan Bin Hakam aur Miswar Bin Makhramah (Radi Allahu Anhu) ne khabar di thi ke Nabi Kareem (Sallallahu Alaihi Wasallam) ki khidmat mein (Ghazwa-e-Hunain ke baad) jab qabeela-e-Hawazin ka wafd Musalman ho kar hazir hua to unhon ne darkhwast ki ke un ke maal-o-daulat aur un ke qaidiyon unhein wapas kar diye jayein. Is par Nabi Kareem (Sallallahu Alaihi Wasallam) ne farmaya ke sab se ziyada sacchi baat mujhe sab se ziyada pyari hai. Tumhe apne do mutalbon mein se sirf kisi ek ko ikhtiyar karna hoga, ya qaidiyon wapas lay lo, ya maal lay lo, mein is par ghaur karne ki wafd ko muhlat bhi deta hoon. Chunanche Rasul Allah (Sallallahu Alaihi Wasallam) ne Taif se wapasi ke baad un ka (Jiranah mein) taqreeban das raat tak intizar kiya. Phir jab qabeela-e-Hawazin ke wakeelon par ye baat wazeh ho gayi ke Aap un ke mutalba ka sirf ek hi hissa tasleem kar sakte hain to unhon ne kaha ke hum sirf apne in logon ko wapas lena chahte hain jo Aap ki qaid mein hain. Is ke baad Rasul Allah (Sallallahu Alaihi Wasallam) ne Musalmanon ko khitab farmaya. Pehle Allah Ta'ala ki is ki shan ke mutabiq hamd-o-sana bayan ki, phir farmaya, Amma Baad! ye tumhare bhai tauba kar ke Musalman ho kar tumhare paas aaye hain. Is liye mein ne munasib jana ke in ke qaidiyon ko wapas kar doon. Ab jo shakhs apni khushi se aisa karna chahe to ise kar guzre. Aur jo shakhs ye chahta ho ke is ka hissa baqi rahe aur hum is ke is hissa ko (qeemat ki shakal mein) is waqt wapas kar dein jab Allah Ta'ala (aaj ke baad) sab se pehla maal-e-ghanimat kahin se dila day to ise bhi kar guzarna chahiye. Ye sun kar sab log bole pare ke hum bakhushi Rasul Allah (Sallallahu Alaihi Wasallam) ki khatir in ke qaidiyon ko chhorne ke liye tayyar hain. Lekin Rasul Allah (Sallallahu Alaihi Wasallam) ne farmaya ke is tarah hum is ki tameez nahi kar sakte ke tum mein se kis ne ijazat di hai aur kis ne nahi di hai. Is liye tum sab (apne apne deron mein) wapas jao aur wahan se tumhare wakeel tumhara faisla humare paas layein. Chunanche sab log wapas chale gaye. Aur in ke sardaron ne (jo in ke numayinde thay) is surat-e-haal par baat ki phir wo Rasul Allah (Sallallahu Alaihi Wasallam) ki khidmat mein hazir hue aur Aap ko bataya ke sab ne bakhushi dil se ijazat day di hai
.

Hum se Sadaqa ne bayan kiya, unhon ne kaha hum ko Ibn Uyaina ne khabar di, unhon ne kaha hum se Abdul Hameed Bin Jubair Bin Shaiba ne bayan kiya, un se Said Bin Musayyab ne bayan kiya aur unhein Umm-e-Sharik (Radi Allahu Anha) ne khabar di ke Nabi Kareem (Sallallahu Alaihi Wasallam) ne girgat (chipkali) ko maar dalne ka hukm farmaya hai
.