Hum se Ibrahim Bin-ul-Munzir ne bayan kiya, kaha hum se Muhammad Bin Falih ne bayan kiya, un se mere baap ne bayan kiya, un se Hilal Bin Ali ne, un se Abdur Rahman Bin Abi Amra ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Koi shakhs namaz ki wajah se jab tak kahin thehra rahega us ka ye sara waqt namaz mein shumar hoga aur Malaika us ke liye ye dua karte raheinge ke Ae Allah! Is ki maghfirat farma, aur is par apni rehmat nazil kar (is waqt tak) jab tak wo namaz se farigh ho kar apni jagah se uth na jaye ya baat na kare."
.

Hum se Adam bin Abi Iyaas ne bayan kiya, unhon ne kaha hum se Ibn-e-Abi Zi’b ne bayan kiya, unhon ne kaha hum se Sa’eed Al-Maqburi ne bayan kiya, woh Abu Hurairah se riwayat karte hain, woh kehte hain ke Rasoolullah Sallallahu Alaihi Wasallam ne farmaaya ke bandah us waqt tak Namaz hi mein rehta hai jab tak woh Masjid mein Namaz ka intezaar karta hai. Taa-waqt-ye-ki woh hadas na kare. Ek ’ajami aadmi ne poocha ke aye Abu Hurairah! Hadas kya cheez hai? Unhon ne farmaaya ke hawa jo peeche se khaarij ho. (Jise ’urf-e-aam mein goz maarna kehte hain).

Hum se Abdullah bin Yusuf ne bayan kiya ke kaha humein Malik ne Abul Zinad se , unhon ne Araj se , unhon ne Abu Hurairah raziyallahu anhu se ke Rasool Allah salla Allahu alaihi wa sallam ne farmaya jab tak tum apne musalle par jahan tum ne namaz parhi thi , baithe raho aur riyah kharij na karo to malaika tum par barabar darood bhejte rehte hain . Kehte hain Allahumma ighfir lahu Allahumma irhamhu aye Allah! is ki maghfirat kijiye , aye Allah! is par reham kijiye .

Hum se Abdullah bin Maslamah Qanabi ne byaan kiya Imam Malik se , unhon ne Abuz Zinad se , unhon ne Araj se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne farmaya ke malaika tum mein se us namazi ke liye us waqt tak yun dua kartay rehtay hain . Jab tak (namaaz parhne ke baad) woh apne musallay par baitha rahe «Allahumma ighfir lahu , Allahumma irhamhu» ke aye Allah! is ki maghfirat kar . Aye Allah! is par rehm kar . Tum mein se woh shakhs jo sirf namaaz ki wajah se ruka hua hai . Ghar jane se siwa namaaz ke aur koi cheez us ke liye maani nahi , to us ka (yeh saara waqt) namaaz hi mein shumaar ho ga .