Hum se Adam Bin Abi Iyas ne bayan kiya, kaha hum se Shuba ne bayan kiya, un se Hakam ne, un se Mujahid ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya "bi-s-saba" baad-e-saba (mashriqi hawa) ke zariya meri madad ki gayi aur qaum-e-Aad "dabooran" (maghribi hawa) se halak kar di gayi thi."
.

Hum se Muslim bin Ibrahim ne byaan kiya , kaha ke hum se Shubah ne Hakam se byaan kiya , in se Mujahid ne , in se Abdullah bin Abbas razi Allahu anhuma ne ke Nabi Karim salla Allahu alaihi wasallam ne farmaya ke mujhe purwa hawa ke zariye madad pahunchayi gayi aur qaum-e-Aad pichhwa ke zariye halak kar di gayi thi .

(Imam Bukhari Rahimahullah ne kaha) ke Ibn Kaseer ne bayan kiya, un se Sufyan Thauri ne, un se un ke walid ne, un se Ibn Abi Nuaym ne aur un se Abu Said Khudri (Radi Allahu Anhu) ne bayan kiya ke Ali (Radi Allahu Anhu) ne (Yemen se) Nabi Kareem (Sallallahu Alaihi Wasallam) ki khidmat mein kuch sona bheja to Aap (Sallallahu Alaihi Wasallam) ne ise char aadmiyon mein taqseem kar diya, Aqra Bin Habis Hanzali Summ-ul-Mujasha'i, Uyaina Bin Badr Fazari, Zaid Ta'i Bani Nabhan wale aur Alqama Bin Alasa Aamiri Banu Kulab wale, is par Quraish aur Ansar ke logon ko ghussa aaya aur kehne lage ke Aap (Sallallahu Alaihi Wasallam) ne Najd ke badon ko to diya lekin humein nazar-andaz kar diya hai. Aap (Sallallahu Alaihi Wasallam) ne farmaya ke mein sirf un ke dil milane ke liye unhein deta hoon (kyunke abhi haal hi mein ye log musalman hue hain) phir ek shakhs samne aaya, is ki aankhein dhansi hui theen, kalle phule hue thay, peshani bhi uthi hui, dadhi bahut ghani thi aur sarr munda hua tha. Us ne kaha Ae Muhammad! Allah se daro Aap (Sallallahu Alaihi Wasallam) ne farmaya, agar mein hi Allah ki na-farmani karoon ga to phir is ki farmanbardari kaun karega? Allah Ta'ala ne mujhe roye zameen par diyanat-dar bana kar bheja hai. Kya tum mujhe ameen nahi samajhte? Is shakhs ki is gustakhi par ek sahabi ne is ke qatl ki ijazat chahi, mera khayal hai ke ye Khalid Bin Waleed thay, lekin Aap (Sallallahu Alaihi Wasallam) ne unhein is se rok diya, phir wo shakhs wahan se chalne laga to Aap (Sallallahu Alaihi Wasallam) ne farmaya is shakhs ki nasal se ya (Aap Sallallahu Alaihi Wasallam ne farmaya ke) is shakhs ke baad isi ki qaum se aise log jhoote musalman paida honge, jo Quran ki tilawat to kareinge, lekin Quran Majeed un ke halaq se neeche nahi utrega, deen se wo is tarah nikal jayenge jaise teer kaman se nikal jata hai, ye musalmanon ko qatl kareinge aur butt-paraston ko chhod dein ge, agar meri zindagi is waqt tak baqi rahe to mein un ko isi tarah qatl karoon ga jaise qaum-e-Aad ka (azab-e-Ilahi se) qatl hua tha ke ek bhi baqi na bacha
.

Hum se Musaddad Bin Musarhad ne bayan kiya, kaha hum se Yahya Bin Saeed Qattan ne bayan kiya, un se Shuba ne bayan kiya, kaha mujh se Hakam Bin Utaybah ne bayan kiya, un se Mujahid ne aur un se Ibn Abbas (Radi Allahu Anhuma) ne ke Nabi Kareem Sallallahu Alaihi Wasallam ne farmaya ”Purwa hawa ke zariye meri madad ki gayi aur qaum-e-Aad pichwa hawa se halak kar di gayi thi“
.