Hum se Ali Bin Abdullah ne bayan kiya ‘ kaha hum se Sufyan ne bayan kiya ‘ in se Ayyub ne ‘ in se Akramah ne ke Ali (Radi Allahu Anhu) ne ek qaum ko (jo Abdullah Bin Saba ki muttabe thi aur Ali Radi Allahu Anhu ko apna Rab kehti thi) jala diya tha. Jab ye khabar Abdullah Bin Abbas (Radi Allahu Anhuma) ko mili to Aap ne kaha ke agar mein hota to kabhi unhein na jalata kyunke Nabi Kareem (Sallallahu Alaihi Wasallam) ne farmaya hai ke Allah ke azab ki saza kisi ko na do ‘ albatta mein unhein qatl zaroor karta kyunke Nabi Kareem (Sallallahu Alaihi Wasallam) ne farmaya hai jo shakhs apna deen tabdeel kar de ise qatl kar do
.

Hum se Abu al-Nu-man Muhammad bin Fadl Sadoosi ne bayan kiya, kaha hum se Hammad bin Zayd ne, unhon ne Ayub Sakhtiyani se, unhon ne Ikrimah se, unhon ne kaha Ali razi Allahu anhu ke paas kuch be-deen log laaye gaye. Aap ne un ko jalwa diya. Yeh khabar Ibn Abbas razi Allahu anhuma ko pahunchi to unhon ne kaha agar main hakim hota to unhein kabhi na jalwata (doosri tarah se saza deta) kyunke Nabi Karim salla Allahu alaihi wasallam ne aag mein jalane se mana farmaya hai. Aap salla Allahu alaihi wasallam ne farmaya ke aag Allah ka azab hai tum Allah ke azab se kisi ko mat azab do main unhein qatl karwa daalta kyunke Nabi Karim salla Allahu alaihi wasallam ne farmaya hai jo shakhs apna deen badal daale Islam se phir jaye is ko qatl kar daalo.