Hum se Qutaiba Bin Saeed ne bayan kiya ‘ kaha hum se Laith ne bayan kiya ‘ in se Bukair ne ‘ in se Sulaiman Bin Yasar ne aur in se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne humein ek muhim par rawana farmaya aur ye hidayat farmai ke agar tumhein falan aur falan mil jayein to unhein aag mein jala dena ‘ phir jab hum ne rawangi ka irada kiya to Aap (Sallallahu Alaihi Wasallam) ne farmaya ke mein ne tumhein hukm diya tha ke falan aur falan ko jala dena. Lekin aag ek aaisi cheez hai jis ki saza sirf Allah Ta'ala hi de sakta hai. Is liye agar wo tumhein milein to unhein qatl karna (aag mein na jalana)
.

Hum se Ali Bin Abdullah Madini ne bayan kiya, kaha hum se Sufyan Bin Uyainah ne bayan kiya, un se Amr Bin Dinar ne, un se Zuhri ne, un se Malik Bin Aus Bin Hadan ne aur un se Umar (Radi Allahu Anhu) ne bayan kiya ke Banu Nazeer ke baghat waghaira un amwal mein se thay jin ko Allah Ta'ala ne apne Rasul (Sallallahu Alaihi Wasallam) ko baghair lare de diya tha. Musalmanon ne un ke hasil karne ke liye ghore aur oont nahi doraye to ye amwal khaas taur se Rasul Allah (Sallallahu Alaihi Wasallam) hi ke thay jin mein se aap (Sallallahu Alaihi Wasallam) apni azwaj-e-mutahharat ko salana nafqah ke taur par bhi de dete thay aur baqi hathiyar aur ghoron par kharch karte thay taake Allah ke raste mein (jihad ke liye) har waqt tayyari rahe
.