Hum se Ahmad Bin Muhammad ne bayan kiya, kaha hum ko Abdullah ne khabar di, kaha hum ko Auzai ne khabar di, unhon ne kaha ke un se Ishaq Bin Abdullah Bin Abi Talha ne aur un se Anas Bin Malik (Radi Allahu Anhu) ne bayan kiya ke Abu Talha (Radi Allahu Anhu) apni aur Nabi Kareem (Sallallahu Alaihi Wasallam) ki aar ek hi dhaal se kar rahe thay aur Abu Talha (Radi Allahu Anhu) bare acche teer-andaz thay. Jab wo teer marte to Nabi Kareem (Sallallahu Alaihi Wasallam) sar utha kar dekhte ke teer kahan ja kar gira hai
.

Hum se Abu Ma'mar ne bayan kiya, kaha hum se Abdul Waris ne bayan kiya, kaha hum se Abdul Aziz ne bayan kiya aur un se Anas Bin Malik (Radi Allahu Anhu) ne bayan kiya ke Uhud ki larai ke mauqe par musalman Nabi Kareem (Sallallahu Alaihi Wasallam) ke paas se juda ho gaye thay. Unhon ne bayan kiya ke mein ne Aisha Bint Abi Bakr aur Umm-e-Sulaim (Radi Allahu Anha) (Anas Radi Allahu Anhu ki walida) ko dekha ke ye apne izar samete hue thiin aur (tez chalne ki wajah se) pani ke mashkize chalkati hui liye ja rahi thiin aur Abu Ma'mar ke alawa Jafar Bin Mahran ne bayan kiya ke mashkize ko apni pusht par idhar se udhar jaldi jaldi liye phirti thiin aur qaum ko is mein se pani pilati thiin, phir wapas aati thiin aur mashkizon ko bhar kar le jati thiin aur qaum ko pani pilati thiin, mein un ke paon ki pazibein dekh raha tha
.

Hum se Abdullah Bin Abi Al-Aswad ne bayan kiya, kaha hum se Hatim Bin Ismail ne bayan kiya, un se Muhammad Bin Yusuf ne bayan kiya, un se Saib Bin Yazid ne ke mein, Abdur Rahman Bin Auf, Talha Bin Ubaidullah, Miqdad Bin Aswad aur Saad Bin Abi Waqqas (Radi Allahu Anhum) ki suhbat mein raha hoon lekin mein ne in hazrat mein se kisi ko Nabi Kareem Sallallahu Alaihi Wasallam se koi hadees bayan karte nahi suna. Sirf Talha Radi Allahu Anhu se Ghazwa Uhud ke mutaliq hadees suni thi
.