Hum se Abdullah bin Yousuf ne bayan kiya, unhon ne kaha hamein Imam Malik ne khabar di unhon ne Abdullah bin Dinaar se, unhon ne Abdullah bin Umar Radhiallahu Anhuma se, unhon ne kaha Umar Radhiallahu Anhu ne Rasoolullah Sallallahu Alaihi Wasallam se arz kiya ke raat mein unhein ghusl ki zaroorat ho jaaya karti hai to Rasoolullah Sallallahu Alaihi Wasallam ne farmaaya ke Wuzu kar liya kar aur sharmgaah ko dho kar so jaa.

Hum se Musaddad ne bayan kiya, un se Abdullah Ibn-e-Dawood ne A’mash ke waaste se bayan kiya, unhon ne Munzir Thauri se naql kiya, unhon ne Muhammed Ibn-ul-Hanafiyyah se naql kiya, woh ’Ali Radhiallahu Anhu se riwayat karte hain ke main aisa shakhs tha jise jiryan-e-mazi ki shikaayat thi, to main ne (apne shagird) Miqdad ko hukm diya ke woh Rasoolullah Sallallahu Alaihi Wasallam se daryaaft karen. To unhon ne Aap Sallallahu Alaihi Wasallam se is baare mein poocha. Aap Sallallahu Alaihi Wasallam ne farmaaya ke is (marz) mein ghusl nahi hai (haan) Wuzu farz hai.

Hum se Qutaibah ne bayan kiya, kaha hum se Jareer ne A’mash ke waaste se bayan kiya, woh Munzir se, woh Abu Ya’la Thawri se, woh Muhammed Ibn-ul-Hanafiyyah se naql karte hain ke ’Ali Radhiallahu Anhu ne farmaaya ke main aisa aadmi tha jis ko sailaan-e-mazi ki shikaayat thi, magar Rasoolullah Sallallahu Alaihi Wasallam se daryaaft karte huwe mujhe sharm aayi. To main ne Ibn-ul-Aswad ko hukm diya, unhon ne Aap Sallallahu Alaihi Wasallam se poocha, Aap Sallallahu Alaihi Wasallam ne farmaaya ke is mein Wuzu karna farz hai. Is riwayat ko Sho’bah ne bhi A’mash se riwayat kiya.

Hum se Ishaaq bin Mansoor ne bayan kiya, kaha hamein Nazr ne khabar di, kaha hum ko Sho’bah ne Hakam ke waaste se batlaaya, woh Zakwaan se, woh Abu Saleh se, woh Abu Sa’eed Khudri se riwayat karte hain ke Rasoolullah Sallallahu Alaihi Wasallam ne ek Ansaari ko bulaaya. Woh aaye to un ke sar se paani tapak raha tha. Rasoolullah Sallallahu Alaihi Wasallam ne farmaaya, shayad hum ne tumhein jaldi mein daal diya. Unhon ne kaha, ji haan. Tab Rasoolullah Sallallahu Alaihi Wasallam ne farmaaya ke jab koi jaldi (ka kaam) aa pade ya tumhein inzaal na ho to tum par Wuzu hai (ghusl zaroori nahi).

Hum se Abul Waleed ne bayan kiya, kaha hum se Zaidah ne Abu Husain ke waasta se, unhon ne Abu Abdur Rahman se, unhon ne ’Ali Radhiallahu Anhu se, aap ne farmaaya ke mujhe mazi bakasrat aati thi, choonke mere ghar mein Nabi-e-Kareem Sallallahu Alaihi Wasallam ki sahebzaadi (Fatima Radhiallahu Anha) thein. Is liye main ne ek shakhs (Miqdaad bin Aswad apne shagird) se kaha ke woh Aap Sallallahu Alaihi Wasallam se us ke mutalliq masla ma’loom karen unhon ne poocha to Aap Sallallahu Alaihi Wasallam ne farmaaya ke Wuzu kar aur sharmgaah ko dho (yahi kaafi hai).

Hum se Abu Nu’aim ne bayan kiya, kaha hum se Hishaam aur Shaibaan ne, woh Yahya se, woh Abu Salamah se kaha main ne Aisha Radhiallahu Anha se poocha ke kya Nabi-e-Kareem Sallallahu Alaihi Wasallam janabat ki haalat mein ghar mein sote the? Kaha haan lekin Wuzu kar lete the.

Hum se Qutaibah bin Sa’eed ne bayan kiya, unhon ne kaha hum se Laith bin Sa’d ne bayan kiya, unhon ne Nafe’ se, woh Ibn-e-Umar Radhiallahu Anhuma se ke Umar bin Khattaab Radhiallahu Anhu ne Rasoolullah Sallallahu Alaihi Wasallam se poocha ke kya hum mein se koi janabat ki haalat mein so sakta hai? Farmaaya haan, Wuzu kar ke janabat ki haalat mein bhi so sakte ho.

Hum se Yahya bin Bukair ne bayan kiya, unhon ne kaha hum se Laith ne bayan kiya, unhon ne Ubaidullah bin Abi Al-Ja’d ke waaste se, unhon ne Muhammed bin Abdur Rahman se, unhon ne Urwah se, woh Aisha Radhiallahu Anha se, aap ne farmaaya ke Nabi-e-Kareem Sallallahu Alaihi Wasallam jab janabat ki haalat mein hote aur sone ka iradah karte to sharmgaah ko dho lete aur Namaz ki tarah Wuzu karte.

Hum se Musa bin Ismail ne bayan kiya, kaha hum se Juwairiyah ne Nafe’ se, woh Abdullah bin Umar se, kaha Umar Radhiallahu Anhu ne Nabi-e-Kareem Sallallahu Alaihi Wasallam se daryaaft kiya ke kya hum janabat ki haalat mein so sakte hain? Aap Sallallahu Alaihi Wasallam ne farmaaya haan lekin Wuzu kar ke.

Hum se Abu Ma’mar Abdullah bin ’Amr ne bayan kiya, unhon ne kaha hum se Abdul Waaris bin Sa’eed ne bayan kiya, unhon ne Husain bin Zakwaan Mu’allim ke waaste se, un ko Yahya ne kaha mujh ko Abu Salamah bin Abdur Rahman bin ’Awf ne khabar di, un ko Ata bin Yasaar ne khabar di, unhein Zaid bin Khalid Juhani ne bataaya ke unhon ne Uthman bin Affan Radhiallahu Anhu se poocha ke mard apni biwi se hambistar huwa lekin inzaal nahi huwa to woh kya kare? Uthman Radhiallahu Anhu ne farmaaya ke Namaz ki tarah Wuzu kar le aur sharamgaah ko dho le aur Uthman Radhiallahu Anhu ne farmaaya ke main ne Rasoolullah Sallallahu Alaihi Wasallam se yeh baat suni hai. Main ne is ke mutalliq Ali bin Abi Talib, Zubair bin Al-Awaam, Talha bin Ubaidullah, Ubai bin Ka’b Radhiallahu Anhum se poocha to unhon ne bhi yahi farmaaya Yahya ne kaha aur Abu Salamah ne mujhe bataaya ke unhein ’Urwah bin Zubair ne khabar di, unhein Abu Ayyub Radhiallahu Anhu ne ke yeh baat unhon ne Rasoolullah Sallallahu Alaihi Wasallam se suni thi.

Hum se Musaddad ne bayan kiya, kaha hum se Yahya ne Hishaam bin ’Urwah se, kaha mujhe khabar di mere waalid ne, kaha mujhe khabar di Abu Ayyub ne, kaha mujhe khabar di Ubai bin Ka’b ne ke unhon ne poocha: Ya Rasoolullah! Jab mard aurat se jima’ kare aur inzaal na ho to kya kare? Aap Sallallahu Alaihi Wasallam ne farmaaya aurat se jo kuch use lag gaya use dho le phir Wuzu kare aur Namaz padhe. Abu Abdullah (Imam Bukhari Rahimahullah) ne kaha ghusl mein ziyada ehtiyaat hai aur yeh aakhiri Ahadees hum ne is liye bayan kar dein (taaki ma’loom ho jaaye ke) is masle mein ikhtilaaf hai aur paani (se ghusl kar lena hi) ziyada paak karne waala hai. (Note: Yeh ijazat ibtida-e-Islam mein thi baad mein yeh hukm mansookh ho gaya).