Hum se Ishaq bin Nasr ne bayan kiya, unhon ne kaha hum se Abdur Razzaq ne bayan kiya, unhon ne Ma’mar se, unhon ne Hammam bin Munabbih se, unhon ne Abu Hurairah Radhiallahu Anhu se, unhon ne Nabi-e-Kareem Sallallahu Alaihi Wasallam se ke Aap Sallallahu Alaihi Wasallam ne farmaaya Bani Israel nange ho kar is tarah nahaate the ke ek shakhs doosre ko dekhta lekin Musa Alaihissalam tanha pardah se ghusl farmaate. Us par unhon ne kaha ke ba-khuda Musa ko hamaare saath ghusl karne mein sirf yeh cheez rukawat hai ke aap ke khusye badhe huwe hain. Ek martaba Musa Alaihissalam ghusl karne lage aur aap ne kapdon ko ek paththar par rakh diya. Itne mein paththar kapdon ko le kar bhaaga aur Musa Alaihissalam bhi us ke peeche badi tezi se daude. Aap kehte jaate the. Aye paththar! Mera kapda de. Aye paththar! Mera kapda de. Us arsa mein Bani Israel ne Musa Alaihissalam ko nanga dekh liya aur kehne lage ke ba-khuda Musa ko koi beemari nahi aur Musa Alaihissalam ne kapda liya aur paththar ko maarne lage. Abu Hurairah Radhiallahu Anhu ne kaha ke ba-khuda us paththar par chhe ya saat maar ke nishaan baaqi hain.

Mujh se Ishaq Bin Ibrahim ne bayan kiya kaha hum se Rauh Bin Ubadah ne bayan kiya un se Auf Bin Abu Jamilah ne bayan kiya un se Imam Hasan Basri aur Muhammad Bin Sireen aur Khilas Bin Amr ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya ke Musa (Alaihis Salam) bare hi sharam wale aur badan dhanpne wale thay. Un ki haya ki wajah se un ke badan ko koi hissa bhi nahi dekha ja sakta tha. Bani Israel ke jo log unhein aziyat pahunchane ke darpay thay wo kyun baaz reh sakte thay un logon ne kehna shuru kiya ke is darja badan chupane ka ehtimam sirf is liye hai ke un ke jism mein aib hai ya korh hai ya un ke khasiyatain barhe hue hain ya phir koi aur bimari hai. Idhar Allah Ta'ala ko ye manzoor hua ke Musa (Alaihis Salam) ki un ki hafwati se paki dikhlaye. Ek din Musa (Alaihis Salam) akele ghusal karne ke liye aaye ek patthar par apne kapre (utar kar) rakh diye. Phir ghusal shuru kiya. Jab farigh hue to kapre uthane ke liye barhe lekin patthar un ke kapron samait bhagne laga. Musa (Alaihis Salam) ne apna asa uthaya aur patthar ke peeche daure. Ye kehte hue ke patthar! Mera kapra de de. Aakhir Bani Israel ki ek jamaat tak pahunch gaye aur un sab ne Aap ko nanga dekh liya Allah ki makhlooq mein sab se behtar halat mein aur is tarah Allah Ta'ala ne un ki tuhmat se un ki bara'at kar di. Ab patthar bhi ruk gaya aur Aap ne kapra utha kar pehna. Phir patthar ko apne asa se maarne lage. Allah ki qasam is patthar par Musa (Alaihis Salam) ke maarne ki wajah se teen ya chaar ya panch jagah nishan par gaye thay. Allah Ta'ala ke is farman «ya ayyuhallazina amanu la takunu kallazina azu musa fabarra-ahullahu mimma qalu wa kana indallahi wajihan» "Tum un ki tarah na ho jana jinhon ne Musa (Alaihis Salam) ko aziyat di thi phir un ki tuhmat se Allah Ta'ala ne unhein bari qarar diya aur wo Allah ki bargah mein bari shan wale aur izzat wale thay." Mein isi waqia ki taraf ishara hai

Hum se Ishaq bin Ibrahim ne byaan kiya , unhon ne kaha hum ko Rauh bin Ubadah ne khabar di , unhon ne kaha hum se Auf ne byaan kiya , un se Hasan Basri aur Muhammad bin Sireen aur Khallass ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke Musa alaihissalam bare ba-haya thay , unhi ke mutalliq Allah Ta'ala ka yeh irshad hai «ya ayyuhallazhina aamanu la takoonu kallazhina aazhau Musa fabarra'ahullahu mimma qaaloo wa kaana indallahi wajeehan» ke ”Ae Iman Walo! In logon ki tarah na ho jana jinon ne Musa alaihissalam ko eeza pahunchayi thi , so Allah ne unhein bari sabit kar diya aur Allah ke nazdeek woh bare izzat wale thay .“