Hum se Yahya Bin Bukair ne bayan kiya, kaha hum se Lais ne bayan kiya, Yunus se, un se Ibn Shihab ne, un se Ubaidullah Bin Abdullah Bin Utba ne ke Ibn Abbas (Radi Allahu Anhuma) ne kaha, Ae Musalmano! Ahl-e-Kitab se kyun sawalat karte ho. Halankay tumhari kitab jo tumhare Nabi (Sallallahu Alaihi Wasallam) par nazil hui hai, Allah Ta'ala ki taraf se sab se baad mein nazil hui hai. Tum ise parhte ho aur is mein kisi qisam ki aamezish bhi nahi hui hai. Allah Ta'ala to tumhein pehle hi bata chuka hai ke Ahl-e-Kitab ne is kitab ko badal diya, jo Allah Ta'ala ne unhein di thi aur khud hi is mein taghayyur kar diya aur phir kehne lage ye kitab Allah ki taraf se hai. Un ka maqsad is se sirf ye tha ke is tarah thori poonji (duniya ki) hasil kar sakein pas kya jo ilm (Quran) tumhare paas aaya hai wo tum ko in (Ahl-e-Kitab se poochne ko nahi rokta. Allah ki qasam! hum ne un ke kisi aadmi ko kabhi nahi dekha ke wo in aayat ke mutalliq tum se poochta ho jo tum par (tumhare Nabi ke zariya) nazil ki gayi hain
.

Hum se Musa bin Ismail ne bayan kiya, unhon ne kaha hum se Ibrahim bin Saad ne bayan kiya, unhon ne kaha hamako Ibn Shihab ne khabar di, unhein Ubaidullah bin Abdullah bin Utbah ne aur in se Abdullah bin Abbas raziAllahu anhuma ne bayan kiya ke tum Ahl e Kitab se kisi cheez ke baare mein kyun poochte ho jabke tumhari kitab jo Rasool Allah salla Allahu alaihi wasallam par nazil hui woh taza bhi hai aur mahfooz bhi aur tumhein is ne bata bhi diya ke Ahl e Kitab ne apna deen badal dala aur Allah kikitab mein tabdeeli kar di aur usay apne hath se az-khud bana kar likha aur kaha ke yeh Allah kitaraf se hai taake is ke zariye duniya ka thora sa maal kama lein. Tumhare paas (Quran wa hadees ka) jo ilm hai woh tumhein in se poochne se mana karta hai. Wallah! main to nahi dekhta ke Ahl e Kitab mein se koi tum se is ke baare mein poochta ho jo tum par nazil kiya gaya ho.

Hum se Ali bin Abdullah Madini ne bayan kiya , kaha hum se Hatim bin Wardan ne bayan kiya , kaha hum se Ayub ne bayan kiya , in se Ikrimah ne aur in se Ibn Abbas raziAllahu anhuma ne bayan kiya ke tum Ahl e Kitab se in ki kitabon ke masail ke baare mein kyunkar sawal karte ho , tumhare paas khud Allah kikitab maujood hai jo zamana ke aitbar se bhi tum se sab se zyada qareeb hai , tum usay parhte ho , woh khalis hai is mein koi milawat nahi .

Hum se Abu al-Yaman ne bayan kiya , kaha hum ko Shuayb ne khabar di , unhein Zuhri ne , unhein Ubaidullah bin Abdullah ne khabar di aur in se Abdullah bin Abbas razi Allahu anhuma ne bayan kiya ke Ae Musalmano! tum Ahl e Kitab se kisi masla mein kyun poochte ho . Tumhari kitab jo Allah Ta'ala ne tumhare Nabi salla Allahu alaihi wasallam par nazil ki hai woh Allah ke yahan se bilkul taza aayi hai , khalis hai is mein koi milawat nahi hui aur Allah Ta'ala ne khud tumhein bata diya hai ke Ahl e Kitab ne Allah kikitabon ko badal dala . Woh hath se ek kitab likhte aur dawa karte ke yeh Allah kitaraf se hai taake is ke zariye se thori poonji haasil karein ,tum ko jo Allahne Quran wa hadees ka ilm diya hai kiya woh tum ko is se mana nahi karta ke tum deen ki baatein Ahl e Kitab se poochho . Allah ki qasam! hum to in ke kisi aadmi ko nahi dekhte ke jo kuch tumhare oopar nazil hua hai is ke mutalliq wohtum se poochte hon .