Hum se Asbagh Bin Faraj ne bayan kiya, kaha ke mujhe Abdullah Bin Wahb ne khabar di, kaha mujhe Saeed Bin Abi Ayub ne khabar di, unhein Zohra Bin Maabad ne, unhein un ke dada Abdullah Bin Hisham (Radi Allahu Anhu) ne unhon ne Nabi Kareem (Sallallahu Alaihi Wasallam) ko paya tha. Un ki walda Zainab Bint Humaid (Radi Allahu Anha) Rasul Allah (Sallallahu Alaihi Wasallam) ki khidmat mein Aap ko le kar hazir huein aur arz kiya ke Ya Rasul Allah! is se baiat le lijiye, Aap (Sallallahu Alaihi Wasallam) ne farmaya ke ye to abhi baccha hai. Phir Aap (Sallallahu Alaihi Wasallam) ne un ke sar par hath phera aur un ke liye dua ki aur Zohra Bin Maabad se Riwayat hai ke un ke dada Abdullah Bin Hisham (Radi Allahu Anhu) unhein apne sath bazar le jate. Wahan wo ghalla khareedte. Phir Abdullah Bin Umar aur Abdullah Bin Zubair (Radi Allahu Anhum) un se milte to wo kehte ke hamein bhi is anaj mein shareek kar lo. Kyunke aap ke liye Rasul Allah (Sallallahu Alaihi Wasallam) ne barkat ki dua ki hai. Chunanchay Abdullah Bin Hisham unhein bhi shareek kar lete aur kabhi poora ek ont (maa ghalla) nafa mein paida kar lete aur is ko ghar bhej dete
.

`Hum se Abdullah bin Yusuf Tanisi ne bayan kiya, kaha hum se Abdullah bin Wahab ne bayan kiya, kaha hum se Saeed bin Abi Ayub ne bayan kiya, un se Abu Aqeel (Zohra bin Ma'bad) ne ke unhein un ke dada Abdullah bin Hisham Radi Allahu Anhu sath le kar bazaar se nikalte ya bazaar jate aur khane ki koi cheez khareedte, phir agar Abdullah bin Zubair ya Abdullah bin Umar Radi Allahu Anhum ki un se mulaqat ho jati to wo kehte ke humein bhi is mein shareek kijiye ke Rasul Allah صلی اللہ علیہ وسلم ne Aap ke liye barkat ki dua farmayi thi. Baaz dafa to ek oont ke bojh ka poora ghalla nafa mein aa jata aur wo ise ghar bhej dete thay.