Hum se Ibrahim Bin Al-Munzir ne bayan kiya, kaha hum se Anas Bin Iyaz ne bayan kiya, un se Ubaidullah Umri ne, un se Abdur Rahman Bin Qasim ne, un se un ke walid Qasim ne aur un se Aisha (Radi Allahu Anha) ne ke unhon ne apne hujre ke saiban par ek parda latka diya jis mein tasveerein bani hui theen. Nabi Kareem (Sallallahu Alaihi Wasallam) ne (jab dekha to) use utar kar phaara dala. (Aisha Radi Allahu Anha ne bayan kiya ke) phir mein ne is parde se do gadde bana dale. Wo donon gadde ghar mein rehte thay aur Nabi Kareem (Sallallahu Alaihi Wasallam) un par baitha karte thay
.

Hum se Abu Maamar Abdullah bin Amr ne bayan kiya ke kaha hum se Abdul Waris bin Saeed ne bayan kiya, unhon ne kaha ke hum se Abdul Aziz bin Suhaib ne Anas Razi Allah Anhu se naqal kiya ke Aisha Razi Allah Anha ke paas ek rangeen bareek parda tha jise unhon ne apne ghar ke ek taraf parda ke liye latka diya tha. Aap Sallallahu Alaihi Wasallam ne farmaya ke mere samne se apna yeh parda hata do. Kyunke is par naqsh shuda tasaveer barabar meri namaz mein khalal andaz hoti rahi hain.

Hum se Maaz bin Fadala ne bayan kiya, in se Hisham Dastawai ne bayan kiya, in se Yahya bin Abi Kaseer ne, in se Imran bin Hittan ne aur in se Aisha razi Allahu anha ne ke Rasool Allah salla Allahu alaihi wasallam ko apne ghar mein jab bhi koi cheez aaisi milti jis par saleeb ki murat bani ho (jaise Nasara rakhte hain) to us ko torr daalte.

Hum se Ali bin Abdullah Madini ne bayan kiya, kaha hum se Sufyan bin Uyaynah ne bayan kiya, kaha ke main ne Abd-ur-Rahman bin Qasim se suna, in dinon Madinah Munawwarah mein in se barh kar aalim fazil naik koi aadmi nahi tha, unhon ne bayan kiya ke main ne apne walid (Qasim bin Abi Bakr) se suna, unhon ne bayan kiya ke main ne Aisha razi Allahu anha se suna ke Rasool Allah salla Allahu alaihi wasallam safar (Ghazwa e Tabook) se tashreef laaye to main ne apne ghar ke saibaan par ek parda latka diya tha, is par tasveerein thien jab Aap salla Allahu alaihi wasallam ne dekha to usay khainch kar phenk diya aur farmaya ke Qayamat ke din sab se zyada sakht azab mein woh log giraftar hon ge jo Allah ki makhlooq ki tarah khud bhi banate hain. Aisha razi Allahu anha ne bayan kiya ke phir main ne phaarh kar is parda ki ek ya do toshak bana lein.

Hum se Musaddad ne bayan kiya, kaha hum se Abdullah bin Dawood ne bayan kiya, in se Hisham bin Urwah ne, in se un ke walid ne aur in se Aisha razi Allahu anha ne bayan kiya ke Rasool Allah salla Allahu alaihi wasallam safar se aaye aur main ne parda latka rakkha tha jis mein tasveerein thien, Nabi Karim salla Allahu alaihi wasallam ne mujhe is ke utaar lene ka hukm diya to main ne usay utaar liya.

Hum se Imran bin Maysarah ne bayan kiya, kaha hum se Abd-ul-Waris ne bayan kiya, kaha hum se Abd-ul-Aziz bin Suhayb ne aur in se Anas razi Allahu anhu ne bayan kiya ke Aisha razi Allahu anha ke paas ek parda tha. Usay unhon ne ghar ke ek kinare par latka diya tha to Nabi Karim salla Allahu alaihi wasallam ne farmaya ke yeh parda nikaal daal, is ki murat is namaz mein mere samne aati hain aur dil uchaat hota hai.

Hum se Busrah bin Safwan ne bayan kiya, unhon ne kaha hum se Ibrahim ne bayan kiya, in se Zuhri ne bayan kiya, in se Qasim ne bayan kiya aur in se Aisha razi Allahu anha ne bayan kiya ke Nabi Karim salla Allahu alaihi wasallam andar tashreef laaye aur ghar mein ek parda latka hua tha jis par tasveerein thien. Nabi Karim salla Allahu alaihi wasallam ke chehre ka rang badal gaya. Phir Aap ne parda pakra aur usay phaar diya. Umm al-Momineen ne bayan kiya ke Nabi Karim salla Allahu alaihi wasallam ne farmaya ”Qayamat ke din in logon par sab se zyada azab ho ga, jo yeh suratein banate hain.“