Hum se Sulaiman Bin Harb ne bayan kiya, kaha ke hum se Hammad ne bayan kiya, un se Yahya Bin Saeed ne bayan kiya, kaha ke mein ne Anas (Radi Allahu Anhu) se suna, unhon ne bayan kiya ke Nabi Kareem (Sallallahu Alaihi Wasallam) ne Bahrain mein kuch qitaat-e-arazi batur-e-jageer (Ansar ko) dene ka irada kiya to Ansar ne arz kiya ke hum jab leinge ke Aap humare Muhajir bhaiyon ko bhi isi tarah ke qitaat inayat farmayein. Is par Aap (Sallallahu Alaihi Wasallam) ne farmaya ke mere baad (doosre logon ko) tum par tarjeeh di jaya karegi to us waqt tum sabr karna, yahan tak ke hum se (aakhirat mein aa kar) mulaqat karo
.

Aur Laith ne Yahya Bin Saeed se bayan kiya aur unhon ne Anas (Radi Allahu Anhu) se ke Nabi Kareem (Sallallahu Alaihi Wasallam) ne Ansar ko bula kar Bahrain mein unhein qitaat-e-arazi batur-e-jageer dene chahe to unhon ne arz kiya ke ay Allah ke Rasul! agar Aap ko aisa karna hi hai to humare bhai Quraish (Muhajireen) ko bhi isi tarah ki qitaat ki sanad likh dijiyi-ay. Lekin Nabi Kareem (Sallallahu Alaihi Wasallam) ke paas itni zameen hi na thi is liye Nabi Kareem (Sallallahu Alaihi Wasallam) ne in se farmaya ”mere baad tum dekhoge ke doosre logon ko tum par muqaddam kiya jaye ga. To us waqt tum mujh se milne tak sabr kiye rehna.“
.

Hum se Ahmad Bin Yunus ne bayan kiya, kaha hum se Zuhair ne bayan kiya, un se Yahya Bin Said Ansari ne bayan kiya ke mein ne Anas (Radi Allahu Anhu) se suna, unhon ne bayan kiya ke Nabi Kareem (Sallallahu Alaihi Wasallam) ne Ansar ko bulaya, taake Bahrain mein un ke liye kuch zameen likh dein. Lekin unhon ne arz kiya ke nahi! Allah ki qasam! (Humein isi waqt wahan zameen inayait farmayiye) jab itni zameen hamare bhai Quraish (Muhajireen) ke liye bhi Aap likhein. Nabi Kareem (Sallallahu Alaihi Wasallam) ne farmaya "Jab tak Allah ko manzoor hai ye maash un ko bhi (yaani Quraish walon ko) milti rahegi." Lekin Ansar yahi israr karte rahe ke Quraish walon ke liye bhi sandain likh dijiye. Jab Aap (Sallallahu Alaihi Wasallam) ne Ansar se farmaya ke mere baad tum ye dekhoge ke doosron ko tum par tarjeeh di jaye gi, lekin tum sabr se kaam lena, ta-aanke tum aakhir mein mujh se aa kar milo (jung aur fasad na karna)
.

Hum se Abdullah Bin Muhammad ne bayan kiya, kaha hum se Sufyan Suri ne bayan kiya, un se Yahya Bin Saeed ne, unhon ne Anas Radi Allahu Anhu se suna jab wo Anas Radi Allahu Anhu ke sath Khalifa Walid Bin Abdul Malik ke yahan jaane ke liye nikle. Nabi Kareem Sallallahu Alaihi Wasallam ne Ansar ko bulaya taake Bahrain ka mulk bator jagir unhein ata farma dein. Ansar ne kaha jab tak aap hamare bhai Muhajireen ko bhi isi jaisi jagir na ata farmayein hum ise qabool nahi karein ge. Aap Sallallahu Alaihi Wasallam ne farmaya " Dekho jab aaj tum qabool nahi karte ho to phir mere baad bhi sabr karna yahan tak ke mujh se aa milo, kyunke mere baad qareeb hi tumhari haqq talfi hone wali hai. "
.