Tum " Sabr se kaam lena yahan tak ke tum mujh se Hauz par mulaqat karo. " Ye qaul Abdullah Bin Zaid Radi Allahu Anhu ne Nabi Kareem Sallallahu Alaihi Wasallam se riwayat kiya hai
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne kaha ke mein ne Qatadah se suna, unhon ne Anas Bin Malik Radi Allahu Anhu se aur unhon ne Usaid Bin Hudair Radi Allahu Anhu se ke ek Ansari Sahabi ne arz kiya: Ya Rasul Allah! Falan shakhs ki tarah mujhe bhi Aap hakim bana dein. Aap Sallallahu Alaihi Wasallam ne farmaya " Mere baad (dunyawi mamlat mein) tum par doosron ko tarjeeh di jaye gi is liye sabr se kaam lena, yahan tak ke mujh se Hauz par aa milo. "
.

Mujh se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya, un se Hisham ne kaha ke mein ne Anas Bin Malik Radi Allahu Anhu se suna, unhon ne kaha ke Nabi Kareem Sallallahu Alaihi Wasallam ne Ansar se farmaya " Mere baad tum dekho ge ke tum par doosron ko fauqiyat di jaye gi, pas tum sabr karna yahan tak ke mujh se aa milo aur meri tum se mulaqat Hauz par ho gi. "
.

Hum se Abdullah Bin Muhammad ne bayan kiya, kaha hum se Sufyan Suri ne bayan kiya, un se Yahya Bin Saeed ne, unhon ne Anas Radi Allahu Anhu se suna jab wo Anas Radi Allahu Anhu ke sath Khalifa Walid Bin Abdul Malik ke yahan jaane ke liye nikle. Nabi Kareem Sallallahu Alaihi Wasallam ne Ansar ko bulaya taake Bahrain ka mulk bator jagir unhein ata farma dein. Ansar ne kaha jab tak aap hamare bhai Muhajireen ko bhi isi jaisi jagir na ata farmayein hum ise qabool nahi karein ge. Aap Sallallahu Alaihi Wasallam ne farmaya " Dekho jab aaj tum qabool nahi karte ho to phir mere baad bhi sabr karna yahan tak ke mujh se aa milo, kyunke mere baad qareeb hi tumhari haqq talfi hone wali hai. "
.