Hum se Abu Nuaym ne bayan kiya, unhon ne kaha ke hum se Sufyan Bin Uyainah ne bayan kiya, un se Ibn Abi Najeeh ne, un se Abdullah Bin Abbas (Radi Allahu Anhuma) ne bayan kiya ke jab Nabi Kareem (Sallallahu Alaihi Wasallam) Madinah tashreef laye to log phalon mein do aur teen saal tak ke liye bai-salam kiya karte thay. Aap (Sallallahu Alaihi Wasallam) ne unhein hidayat ki ke phalon mein bai-salam muqarrara paimane aur muqarrara muddat ke liye kiya karo. Aur Abdullah Bin Waleed ne kaha hum se Sufyan Bin Uyainah ne kaha, un se Ibn Abi Najeeh ne bayan kiya, is Riwayat mein yun hai ke ”Paimane aur wazan ki tayein ke sath“ (bai-salam honi chahiye)
.

Hum se Amr Bin Zurarah ne bayan kiya, kaha ke hum ko Ismail Bin Aliyyah ne khabar di, unhein Ibn Abi Najeeh ne khabar di, unhein Abdullah Bin Kaseer ne, unhein Abu Minhal ne aur un se Ibn Abbas (Radi Allahu Anhuma) ne bayan kiya ke jab Nabi Kareem (Sallallahu Alaihi Wasallam) Madinah tashreef laye to (Madinah ke) log phalon mein ek saal ya do saal ke liye bai-salam karte thay. Ya unhon ne ye kaha ke do saal aur teen saal (ke liye karte thay) shak Ismail ko hua tha. Nabi Kareem (Sallallahu Alaihi Wasallam) ne farmaya ke jo shakhs bhi khajoor mein bai-salam kare, ise muqarrara paimane ya muqarrara wazan ke sath karni chahiye
.

Hum se Qutaiba ne bayan kiya, un se Sufyan ne bayan kiya, un se Ibn Abi Najeeh ne, un se Abdullah Bin Kaseer ne, aur un se Abu Minhal ne bayan kiya ke mein ne Abdullah Bin Abbas (Radi Allahu Anhuma) se suna unhon ne farmaya ke Nabi Kareem (Sallallahu Alaihi Wasallam) (Madinah) tashreef laye aur Aap (Sallallahu Alaihi Wasallam) ne farmaya ke muqarrara wazan aur muqarrara muddat tak ke liye (bai-salam) honi chahiye
.