Hum se Adam ne bayan kiya, kaha hum se Sho’bah ne A’mash ke waaste se naql kiya, woh Abu Waail se, woh Huzaifah Radhiallahu Anhu se riwayat karte hain ke Nabi Kareem Sallallahu Alaihi Wasallam kisi qaum ki koodi (kooda karkat daalne ki jagah) par tashreef laaye (pas) Aap Sallallahu Alaihi Wasallam ne wahaan khade ho kar peshaab kiya. Phir paani mangaaya. Main Aap Sallallahu Alaihi Wasallam ke paas paani le kar aaya to Aap Sallallahu Alaihi Wasallam ne Wuzu farmaaya.

Hum se Muhammed bin Abdur Raheem ne riwayat kiya, unhon ne kaha mujh ko Abu Salamah Al-Khuzaa’i Mansoor bin Salamah ne khabar di, unhon ne kaha hum ko Ibn-e-Bilal yani Sulaiman ne Zaid bin Aslam ke waaste se khabar di, unhon ne Ata bin Yasaar se suna, unhon ne Abdullah bin Abbas Radhiallahu Anhuma se naql kiya ke (ek martaba) unhon ne (yani Ibn-e-Abbas Radhiallahu Anhuma ne) Wuzu kiya to apna chehra dhoya (is tarah ke pehle) paani ke ek chullu se kulli ki aur naak mein paani diya. Phir paani ka ek aur chullu liya, phir us ko is tarah kiya (yani) doosre haath ko milaaya. Phir us se apna chehra dhoya. Phir paani ka doosra chullu liya aur us se apna dahna haath dhoya. Phir paani ka ek aur chullu le kar us se apna baayaan haath dhoya. Us ke baad apne sar ka masah kiya. Phir paani ka chullu le kar daahne paaon par daala aur use dhoya. Phir doosre chullu se apna paaon dhoya. Yani baayaan paaon us ke baad kaha ke main ne Rasoolullah Sallallahu Alaihi Wasallam ko isi tarah Wuzu karte huwe dekha hai.

Hum se Abdullah bin Yousuf ne bayan kiya, unhon ne kaha hum ko Imam Malik ne ’Amr bin Yahya Al-Maazini se khabar di, woh apne baap se naql karte hain ke ek aadmi ne Abdullah bin Zaid Radhiallahu Anhu jo ’Amr bin Yahya ke daada hain, se poocha ke kya aap mujhe dikha sakte hain ke Rasoolullah Sallallahu Alaihi Wasallam ne kis tarah Wuzu kiya hai? Abdullah bin Zaid Radhiallahu Anhu ne kaha ke haan! Phir unhon ne paani ka bartan mangwaaya pehle paani apne haathon par daala aur do martaba haath dhoye. Phir teen martaba kulli ki, teen baar naak saaf ki, phir teen dafa apna chehra dhoya. Phir kohniyon tak apne dono haath do do martaba dhoye. Phir apne dono haathon se apne sar ka masah kiya. Is taur par apne haath (pehle) aage laaye phir peeche le gaye. (Masah) sar ke ibtidaayi hisse se shuru kiya. Phir dono haath guddi tak le jaa kar wahien waapas laaye jahaan se (masah) shuru kiya tha, phir apne pair dhoye.

Hum se Musa ne bayan kiya, unhon ne kaha hum se Wuhaib ne bayan kiya, unhon ne ’Amr se, unhon ne apne baap (Yahya) se khabar di, unhon ne kaha ke meri maujoodgi mein ’Amr bin Abi Hasan ne Abdullah bin Zaid Radhiallahu Anhu se Rasoolullah Sallallahu Alaihi Wasallam ke Wuzu ke baare mein poocha to unhon ne paani ka tasht mangwaaya aur un (poochne waalon) ke liye Rasoolullah Sallallahu Alaihi Wasallam ka sa Wuzu kiya. (Pehle tasht se) apne haathon par paani giraaya. Phir teen baar haath dhoye, phir apna haath tasht mein daala (aur paani liya) phir kulli ki, naak mein paani daala, naak saaf ki, teen chulluon se, phir apna haath tasht mein daala aur teen martaba munh dhoya. Phir apne dono haath kohniyon tak do baar dhoye. Phir apna haath tasht mein daala aur sar ka masah kiya. (Pehle) aage laaye phir peeche le gaye, ek baar. Phir takhnon tak apne dono paaon dhoye.

Hum se Musaddad ne bayan kiya, unhon ne kaha hum se Khalid bin Abdullah ne bayan kiya, un se ’Amr bin Yahya ne apne baap (Yahya) ke waaste se bayan kiya, woh Abdullah bin Zaid Radhiallahu Anhu se naql karte hain ke (Wuzu karte waqt) unhon ne bartan se (pehle) apne dono haathon par paani daala. Phir unhein dhoya. Phir dhoya. (Ya yun kaha ke) kulli ki aur naak mein ek chullu se paani daala. Aur teen martaba usi tarah kiya. Phir teen martaba apna chehra dhoya phir kohniyon tak apne dono haath do do baar dhoye. Phir sar ka masah kiya. Agli jaanib aur pichli jaanib ka aur takhnon tak apne dono paaon dhoye, phir kaha ke Rasoolullah Sallallahu Alaihi Wasallam ka Wuzu isi tarah huwa karta tha.

Hum se Sulaiman bin Harb ne bayan kiya, unhon ne kaha hum se Wuhaib ne bayan kiya, un se ’Amr bin Yahya ne apne baap (Yahya) ke waaste se bayan kiya, woh kehte hain ke meri maujoodgi mein ’Amr bin Abi Hasan ne Abdullah bin Zaid Radhiallahu Anhu se Rasoolullah Sallallahu Alaihi Wasallam ke Wuzu ke baare mein poocha. To Abdullah bin Zaid Radhiallahu Anhu ne paani ka ek tasht mangwaaya, phir un (logon) ko dikhaane ke liye Wuzu (shuru) kiya. (Pehle) tasht se apne haathon par paani giraaya. Phir unhein teen baar dhoya. Phir apna haath bartan ke andar daala, phir kulli ki aur naak mein paani daal kar naak saaf ki, teen chulluon se teen dafa. Phir apna haath bartan ke andar daala aur apne munh ko teen baar dhoya. Phir apna haath bartan ke andar daala aur dono haath kohniyon tak do do baar dhoye (phir) sar par masah kiya is tarah ke (pehle) aage ki taraf apna haath laaye phir peeche ki taraf le gaye. Phir bartan mein apna haath daala aur apne dono paaon dhoye (doosri riwayat mein) hum se Musa ne, un se Wuhaib ne bayan kiya ke Aap ne sar ka masah ek dafa kiya.

Hum se Khalid bin Makhlad ne bayan kiya, unhon ne kaha hum se Sulaiman ne, kaha mujh se ’Amr bin Yahya ne apne baap (Yahya) ke waaste se bayan kiya, woh kehte hain ke mere chacha bahut ziyada Wuzu kiya karte the (ya yeh ke Wuzu mein bahut paani bahaate the) ek din unhon ne Abdullah bin Zaid Radhiallahu Anhu se kaha ke mujhe batlaaiye Rasoolullah Sallallahu Alaihi Wasallam kis tarah Wuzu kiya karte the. Unhon ne paani ka ek tasht mangwaaya. Us ko (pehle) apne haathon par jhukaaya. Phir dono haath teen baar dhoye. Phir apna haath tasht mein daal kar (paani liya aur) ek chullu se kulli ki aur teen martaba naak saaf ki. Phir apne haathon se ek chullu (paani) liya aur teen baar apna chehra dhoya. Phir kohniyon tak apne dono haath do do baar dhoye. Phir haath mein paani le kar apne sar ka masah kiya. To (pehle apne haath) peeche le gaye, phir aage ki taraf laaye. Phir apne dono paaon dhoye. Aur farmaaya ke main ne Rasoolullah Sallallahu Alaihi Wasallam ko isi tarah Wuzu karte dekha hai.

Hum se Muhammed bin Yousuf ne bayan kiya, kaha hum se Sufyan ne ’Amr bin Amir ke waaste se bayan kiya, kaha main ne Anas Radhiallahu Anhu se suna. (Doosri sanad se) hum se Musaddad ne bayan kiya, kaha hum se Yahya ne, woh Sufyan se riwayat karte hain, un se ’Amr bin Amir ne bayan kiya, woh Anas Radhiallahu Anhu se riwayat karte hain. Unhon ne farmaaya ke Rasoolullah Sallallahu Alaihi Wasallam har Namaz ke liye naya Wuzu farmaaya karte the. Main ne kaha tum log kis tarah karte the, kehne lage hum mein se har ek ko us ka Wuzu us waqt tak kaafi hota, jab tak koi Wuzu todne waali cheez pesh na aa jaati. (Yani peshaab, pakhana, ya neend waghera).

Hum se Uthman Ibn-e-Abi Shaibah ne bayan kiya, kaha hum se Jareer ne Mansoor ke waaste se bayan kiya, woh Abu Waail se, woh Huzaifah se riwayat karte hain. Woh kehte hain ke (ek martaba) main aur Rasoolullah Sallallahu Alaihi Wasallam jaa rahe the ke ek qaum ki koodi par (jo) ek deewaar ke peeche (thi) pahunche. To Aap Sallallahu Alaihi Wasallam is tarah khade ho gaye jis tarah hum tum mein se koi (shakhs) khada hota hai. Phir Aap Sallallahu Alaihi Wasallam ne peshaab kiya aur main ek taraf hat gaya. Tab Aap Sallallahu Alaihi Wasallam ne mujhe ishaara kiya to Aap Sallallahu Alaihi Wasallam ke paas (pardah ki gharz se) Aap Sallallahu Alaihi Wasallam ki aydiyon ke qareeb khada ho gaya. Yahan tak ke Aap Sallallahu Alaihi Wasallam peshaab se faarigh ho gaye. (Bawaqt-e-zaroorat aisa bhi kiya jaa sakta hai.)

Hum se Muhammed bin ’Ar’arah ne bayan kiya, kaha hum se Sho’bah ne Mansoor ke waaste se bayan kiya, woh Abu Waail se naql karte hain, woh kehte hain ke Abu Musa Ash’ari peshaab (ke baare) mein sakhti se kaam lete the aur kehte the ke Bani Israel mein jab kisi ke kapde ko peshaab lag jaata to use kaat daalte. Abu Huzaifah kehte hain ke kaash! Woh apne is tashaddud se ruk jaate (kiunki) Rasoolullah Sallallahu Alaihi Wasallam kisi qaum ki koodi (kooda karkat daalne ki jagah) par tashreef laaye aur Aap Sallallahu Alaihi Wasallam ne wahaan khade ho kar peshaab kiya.

Hum se Abdan ne bayan kiya, unhon ne kaha hum ko Abdullah Bin Mubarak ne khabar di, unhon ne kaha hum ko Mamar ne khabar di, unhon ne kaha hum se Zuhri ne bayan kiya, un se Ata Bin Zaid ne, un se Humran ne unhon ne Usman Bin Affan (Radi Allahu Anhu) ko wuzu karte dekha, aap ne (pehle) apne donon hathon par teen martaba pani dala phir kulli ki aur naak saaf ki, phir teen martaba chehra dhowya, phir dayan hath kehni tak dhowya, phir bayan hath kehni tak dhowya teen teen martaba, is ke baad apne sar ka masah kiya aur teen martaba dahina paon dhowya, phir teen martaba bayan paon dhowya, aakhir mein kaha ke jis darha mein ne wuzu kiya hai mein ne Rasul Allah (Sallallahu Alaihi Wasallam) ko bhi isi tarah wuzu karte dekha hai, phir aap ne farmaya tha ke jis ne meri tarah wuzu kiya phir do rakat namaz (tahiyat-ul-wuzu) is tarah parhi ke is ne dil mein kisi qism ke khayalat-o-wasawis guzarne nahi diye to is ke agle gunah maaf kar diye jayein ge
.

Hum se Suleman Bin Harb ne bayan kiya, kaha hum se Shuba ne, un se Mansoor ne, un se Abu Wail ne aur un se Huzaifa (Radi Allahu Anhu) ne ke mein ne Rasul Allah (Sallallahu Alaihi Wasallam) ko dekha, ya ye kaha ke Nabi Kareem (Sallallahu Alaihi Wasallam) ek qoum ki koori par tashreef laye, aur Aap (Sallallahu Alaihi Wasallam) ne wahan kharay ho kar peshab kiya
.