Hum se Ali Bin Abdullah ne bayan kiya, kaha ke hum se Dahhak Bin Makhlad ne bayan kiya, kaha ke hum se Ibn Juraij ne bayan kiya, kaha ke mujhe Amr Bin Dinar ne khabar di, unhein Abu Salih Zayyat ne khabar di, aur unhon ne Abu Saeed Khudri (Radi Allahu Anhu) ko ye kehte suna ke dinar, dinar ke badle mein aur dirham, dirham ke badle mein (becha ja sakta hai) is par mein ne un se kaha ke Ibn Abbas (Radi Allahu Anhuma) to is ki ijazat nahi dete. Abu Saeed (Radi Allahu Anhu) ne bayan kiya ke phir mein ne Ibn Abbas (Radi Allahu Anhuma) se is ke mutaliq poocha ke aap ne ye Nabi Kareem (Sallallahu Alaihi Wasallam) se suna tha ya Kitab-ul-Lah mein aap ne usay paya hai ? Unhon ne kaha ke in mein se kisi baat ka mein daway-dar nahi hoon. Rasul Allah (Sallallahu Alaihi Wasallam) (ki ahadees) ko aap log mujh se zyada jante hain. Albatta mujhe Usama (Radi Allahu Anhu) ne khabar di thi ke Rasul Allah (Sallallahu Alaihi Wasallam) ne farmaya (madhkoora soorat-on mein) sood sirf udhaar ki soorat mein hota hai
.

Hum se Ubaidullah Bin Saad ne bayan kiya, kaha ke mujh se mere chacha ne bayan kiya, kaha hum se Zuhri ke bhatije ne bayan kiya, un se un ke chacha ne bayan kiya ke mujh se Salim Bin Abdullah (Radi Allahu Anhu) ne bayan kiya, un se Abdullah Bin Umar (Radi Allahu Anhuma) ne ke Abu Saeed Khudri (Radi Allahu Anhu) ne isi tarah ek hadees Rasul Allah (Sallallahu Alaihi Wasallam) ke hawala se bayan ki (jaise Abu Bakrah Radi Allahu Anhu ya Umar Radi Allahu Anhu se guzri) phir ek martaba Abdullah Bin Umar (Radi Allahu Anhuma) ki un se mulaqat hui to unhon ne poocha, Ae Abu Saeed! aap Rasul Allah (Sallallahu Alaihi Wasallam) ke hawala se ye kaun si hadees bayan karte hain ? Abu Saeed Khudri (Radi Allahu Anhu) ne farmaya ke hadees bai-e-sarf (yaani rupiya ashrafiyan badalne ya turwane) se mutaliq hai. Mein ne Rasul Allah (Sallallahu Alaihi Wasallam) ka farman suna tha ke sona sone ke badle mein barabar barabar hi becha ja sakta hai aur chandi, chandi ke badla mein barabar barabar hi bechi ja sakti hai
.