Hum se Abdullah Bin Yusuf Taneesi ne bayan kiya, unhein Imam Malik ne khabar di, unhein Nafay ne, aur unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne hamal ke hamal ki bai se mana farmaya. Is bai ka tareeqa jahiliyat mein ra'ij tha. Ek shakhs ek ont ya ontni khareedta aur qeemat dene ki miyad ye muqarrar karta ke ek ontni jane phir is ke peit ki ontni bari ho kar jane
.

Hum se Qutaiba bin Saeed ne bayan kiya, kaha hum se Laith ne Ibn Shihab se bayan kiya, unhon ne Ubaidullah bin Abdullah bin Utbah se, unhon ne Abu Saeed Khudri se ke Nabi Kareem Sallallahu Alaihi Wasallam ne samma ki tarah kapra badan par lapait lene se mana farmaya aur is se bhi mana farmaya ke aadmi ek kapre mein ihtiba kare aur is ki sharmgah par alaihida koi doosra kapra na ho.

Hum se Musa Bin Ismail ne bayan kiya, unhein Juwairiyah ne khabar di, unhein Nafi ne aur un se Abdullah (Radi Allahu Anhu) ne bayan kiya ke log oont waghairah hamal ke hamal hone ki muddat tak ke liye bechte thay. Nabi Kareem (Sallallahu Alaihi Wasallam) ne is se mana farmaya. Nafi ne «حبل الحبلة» ki tafseer ye ki ”Yahan tak ke oontni ke pait mein jo kuch hai wo ise jan lay.“
.

Hum se Musaddad ne bayan kiya, kaha hum se Yahya ne bayan kiya, un se Ubaidullah ne kaha, mujh ko Nafi ne khabar di aur un se Abdullah Bin Umar Radi Allahu Anhuma ne bayan kiya ke zamana-e-jahiliyat ke log «Habl-ul-Habalah» tak qeemat ki adayigi ke waada par, oont ka gosht udhaar becha karte thay. Abdullah Radi Allahu Anhu ne bayan kiya ke «Habl-ul-Habalah» ka matlab ye hai ke koi hamila oontni apna baccha jane phir wo nauzaida baccha (barh kar) hamila ho, Nabi Kareem Sallallahu Alaihi Wasallam ne is tarah ki khareed o farokht mamnu qarar de di thi
.