Hum se Ahmad Bin Yunus ne bayan kiya, kaha ke hum se Zuhair ne bayan kiya kaha ke hum se Mansoor ne, un se Rabee Bin Hirash ne bayan kiya aur un se Hudhaifa Bin Yaman (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya, tum se pehle guzashta ummaton ke kisi shakhs ki rooh ke paas (maut ke waqt) farishte aaye aur poocha ke tu ne kuch acche kaam bhi kiye hain ? Rooh ne jawab diya ke mein apne naukaron se kaha karta tha ke wo maldar logon ko (jo un ke maqrooz hon) muhlat de diya karein aur un par sakhti na karein. Aur muhtajon ko maaf kar diya karein. Rawi ne bayan kiya ke Nabi Kareem (Sallallahu Alaihi Wasallam) ne farmaya, phir farishton ne bhi is se dar-guzar kiya aur sakhti nahi ki aur Abu Malik ne Rabee se (apni riwayat mein ye alfaz) bayan kiye hain ”khate kamate ke sath (apna haqq lete waqt) narm mamla karta tha aur tang haal maqrooz ko muhlat deta tha. Is ki mutabiat Shuba ne ki hai. Un se Abdul Malik ne aur un se Rabee ne bayan kiya, Abu Awanah ne kaha ke un se Abdul Malik ne Rabee se bayan kiya ke (is rooh ne ye alfaz kahe thay) mein khate kamate ko muhlat de deta tha aur tang haal wale maqrooz se dar-guzar karta tha aur Nuaim Bin Abi Hind ne bayan kiya, un se Rabee ne (ke rooh ne ye alfaz kahe thay) mein khate kamate logon ke (jin par mera koi haqq wajib hota) uzr qabool kar liya karta tha aur tang haal wale se dar-guzar kar deta tha
.

Hum se Hisham Bin Ammar ne bayan kiya, kaha ke hum se Yahya Bin Hamza ne bayan kiya, un se Muhammad Bin Waleed Zubaidi ne bayan kiya, un se Zuhri ne, un se Ubaidullah Bin Abdullah ne, unhon ne Abu Hurairah (Radi Allahu Anhu) se suna ke Nabi Kareem (Sallallahu Alaihi Wasallam) ne farmaya, ek tajir logon ko qarz diya karta tha jab kisi tang dast ko dekhta to apne naukaron se keh deta ke is se dar-guzar kar jao. Shayad ke Allah Ta'ala bhi hum se (aakhirat mein) dar-guzar farmaye. Chunanche Allah Ta'ala ne (is ke marne ke baad) is ko bakhsh diya
.

Hum se Muslim ne bayan kiya, kaha ke hum se Shuba ne bayan kiya, un se Abdul Malik ne, un se Rabee Bin Hirash ne aur un se Hudhaifah (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) se suna, Aap (Sallallahu Alaihi Wasallam) ne farmaya ke ek shakhs ka intiqaal hua (qabar mein) us se sawal hua, tumhare paas koi naiki hai ? Us ne kaha ke mein logon se khareed-o-farokht karta tha. (Aur jab kisi par mera qarz hota) to mein malidaron ko muhlat diya karta tha aur tang-daston ke qarz ko maaf kar diya karta tha is par is ki bakhshish ho gayi. Abu Masood (Radi Allahu Anhu) ne bayan kiya ke mein ne yahi Nabi Kareem (Sallallahu Alaihi Wasallam) se suna hai
.

Huzaifah (Radi Allahu Anhu) ne farmaya ke mein ne Nabi Kareem (Sallallahu Alaihi Wasallam) ko ye farmate suna tha ke pehle zamane mein ek shakhs ke pas Malik-ul-Mout un ki rooh qabz karne aaye to un se poocha gaya koi apni naiki tumhein yaad hai? Unhon ne kaha ke mujhe to yaad nahi parti. Un se dobara kaha gaya ke yaad karo! Unhon ne kaha ke mujhe koi apni naiki yaad nahi siwa is ke ke mein duniya mein logon ke sath khareed-o-farokht kiya karta tha aur lain dain kiya karta tha jo log khush-haal hote unhein to mein (apna qarz wasool karte waqt) muhlat diya karta tha aur tang hath walon ko maaf kar diya karta tha. Allah Ta'ala ne unhein isi par jannat mein dakhil kiya

Hum se Abdul Aziz Bin Abdullah ne bayan kiya, kaha hum se Ibrahim Bin Saad ne bayan kiya un se Ibn Shihab ne un se Ubaidullah Bin Abdullah Bin Utbah ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Ek shakhs logon ko qarz diya karta tha aur apne nokaron ko is ne ye keh rakkha tha ke jab tum kisi ko muflis pao (jo mera qarz dar ho) to ise maaf kar diya karo. Mumkin hai Allah Ta'ala bhi humein maaf farma de." Rasul Allah (Sallallahu Alaihi Wasallam) ne farmaya "Jab wo Allah Ta'ala se mila to Allah ne ise bakhsh diya
."