Hum se Ali Bin Abdullah ne bayan kiya, kaha ke hum se Abu Usamah ne bayan kiya, un se Abu-al-Umais ne, un se Qais Bin Muslim ne, un se Tariq Bin Shihab ne aur un se Abu Musa (Radi Allahu Anhu) ne bayan kiya ke Ashura ke din ko yahudi eid ka din samajhte thay is liye Rasul Allah (Sallallahu Alaihi Wasallam) ne farmaya ke tum bhi is din roza rakkha karo
.

Hum se Abu Ma'mar ne bayan kiya, kaha ke hum se Abdul Waris ne bayan kiya, kaha ke hum se Ayyub ne bayan kiya, kaha ke hum se Abdullah Bin Saeed Bin Jubair ne bayan kiya, un se un ke baap ne aur un se Ibn Abbas (Radi Allahu Anhuma) ne farmaya ke Nabi Kareem (Sallallahu Alaihi Wasallam) Madinah mein tashreef laye. (doosre saal) Aap (Sallallahu Alaihi Wasallam) ne yahudiyon ko dekha ke wo Ashura ke din roza rakhte hain. Aap (Sallallahu Alaihi Wasallam) ne un se is ka sabab maloom farmaya to unhon ne bataya ke ye ek accha din hai. Isi din Allah Ta'ala ne Bani Israel ko un ke dushman (Firon) se najat dilayi thi. Is liye Musa (Alaihis Salam) ne is din ka roza rakkha tha. Aap ne farmaya phir Musa (Alaihis Salam) ke (shareek-e-masarrat hone mein) hum tum se zyada mustahiq hain. Chunanche Aap (Sallallahu Alaihi Wasallam) ne is din roza rakkha aur sahaba (Radi Allahu Anhum) ko bhi is ka hukm diya
.

Hum se Ali Bin Abdullah ne bayan kiya kaha hum se Sufyan Bin Uyainah ne bayan kiya kaha hum se Ayub Sakhtiyani ne bayan kiya un se Saeed Bin Jubair ke sahibzade (Abdullah) ne apne walid se aur un se Ibn Abbas (Radi Allahu Anhuma) ne ke jab Nabi Kareem (Sallallahu Alaihi Wasallam) Madinah tashreef laye to wahan ke log ek din yani Ashura ke din roza rakhte thay. Un logon (Yahoodiyon) ne bataya ke ye bari azmat wala din hai, isi din Allah Ta'ala ne Musa (Alaihis Salam) ko najaat di thi aur Aal-e-Firaun ko gharq kiya tha. Is ke shukar mein Musa (Alaihis Salam) ne is din ka roza rakha tha. Nabi Kareem (Sallallahu Alaihi Wasallam) ne farmaya ke mein Musa (Alaihis Salam) ka un se zyada qareeb hoon. Chunancha Aap (Sallallahu Alaihi Wasallam) ne khud bhi is din ka roza rakhna shuru kiya aur Sahaba ko bhi is ka hukam farmaya

Mujh se Ahmad ya Muhammad Bin Ubaidullah Ghadani ne bayan kiya, kaha hum se Hammad Bin Usama ne bayan kiya ke unhein Abu Umais ne khabar di, unhein Qais Bin Muslim ne, unhein Tariq Bin Shihab ne aur un se Abu Musa Ashari Radi Allahu Anhu ne bayan kiya ke jab Nabi Kareem Sallallahu Alaihi Wasallam Madinah tashreef laye to Aap Sallallahu Alaihi Wasallam ne dekha ke Yahudi Ashurah ke din ki tazem karte hain aur is din roza rakhte hain. Nabi Kareem Sallallahu Alaihi Wasallam ne farmaya ke hum is din roza rakhne ke zyada haqdar hain. Chunanche Aap Sallallahu Alaihi Wasallam ne is din ke roze ka hukm diya
.

Hum se Ziyad Bin Ayub ne bayan kiya, unhon ne kaha hum se Hushaim ne bayan kiya, unhon ne kaha hum se Abu Bishr Jafar ne bayan kiya, un se Saeed Bin Jubair aur un se Ibn Abbas Radi Allahu Anhuma ne bayan kiya ke jab Nabi Kareem Sallallahu Alaihi Wasallam Madinah tashreef laye to Aap Sallallahu Alaihi Wasallam ne dekha ke Yahudi Ashurah ke din roza rakhte hain. Is ke mutaliq un se poocha gaya to unhon ne bataya ke ye wo din hai jis mein Allah Ta'ala ne Musa Alaihis Salam aur Bani Israeel ko Firaun par fatah inayat farmai thi chunanche hum is din ki tazem mein roza rakhte hain. Nabi Kareem Sallallahu Alaihi Wasallam ne farmaya ke hum Musa Alaihis Salam se tumhari ba-nisbat zyada qareeb hain aur Aap Sallallahu Alaihi Wasallam ne is din roza rakhne ka hukm diya
.

Mujh se Muhammad bin Bashar ne byaan kiya , unhon ne kaha hum se Ghundar ne byaan kiya , un se Shubah ne byaan kiya , un se Abu Bishr ne , un se Saeed bin Jubayr ne aur un se Abdullah bin Abbas razi Allahu anhuma ne byaan kiya ke jab Nabi Karim salla Allahu alaihi wasallam Madinah tashreef laye to Yahud Ashura ka roza rakhte thay . Unhon ne bataya ke isi din Musa alaihissalam ko Firaun par fatah mili thi . Is par Nabi Karim salla Allahu alaihi wasallam ne sahabah se farmaya ke Musa alaihissalam ke hum un se bhi zyada mustahiq hain is liye tum bhi roza rakho .

Mujh se Yaqoob bin Ibrahim ne byaan kiya , kaha hum se Rauh bin Ubadah ne byaan kiya , kaha hum se Shubah ne byaan kiya , kaha hum se Abu Bishr ne byaan kiya , un se Saeed bin Jubayr ne aur un se Ibn Abbas ne byaan kiya ke jab Rasool Allah salla Allahu alaihi wasallam Madinah tashreef laye to Yahudi Ashura ka roza rakhte thay . Nabi Karim salla Allahu alaihi wasallam ne un se is ke mutalliq poocha to unhon ne bataya ke is din Musa alaihissalam ne Firaun par ghalba paya tha . Aap salla Allahu alaihi wasallam ne is par farmaya ke phir hum un ke muqable mein Musa ke zyada haq-dar hain . Musalmano! Tum log bhi is din roza rakho (phir Aap salla Allahu alaihi wasallam ne Yahud ki mushabihat se bachne ke liye is ke saath ek roza aur milane ka hukm saadir farmaya jo ab bhi masnoon hai .)