Hum se Saeed Bin Rabee ne bayan kiya, kaha hum se Ali Bin Mubarak ne bayan kiya, un se Yahya Bin Abi Kathir ne, un se Abdullah Bin Abi Qatadah ne, kaha un se un ke baap ne bayan kiya unhon ne kaha ke hum sulh-e-Hudaibiyah ke mauqe par Nabi Kareem (Sallallahu Alaihi Wasallam) ke sath chale un ke sathiyon ne to ihram bandh liya tha lekin un ka bayan tha ke mein ne ihram nahi bandha tha. Humein Ghaiqah mein dushman ke maujood hone ki ittela mili is liye hum un ki talash mein (Nabi Kareem Sallallahu Alaihi Wasallam ke hukm ke mutabiq) nikle phir mere sathiyon ne gor-khar dekha aur ek doosre ko dekh kar hansne lage mein ne jo nazar uthayi to usay dekh liya ghore par (sawar ho kar) is par jhapta aur usay zakhmi kar ke thanda kar diya. Mein ne apne sathiyon se kuch imdad chahi lekin unhon ne inkar kar diya phir hum sab ne usay khaya aur is ke baad mein Rasul Allah (Sallallahu Alaihi Wasallam) ki khidmat mein hazir hua (pehle) humein darr hua ke kahin hum Nabi Kareem (Sallallahu Alaihi Wasallam) se door na reh jayein is liye mein kabhi apna ghora taiz kar deta aur kabhi aahista aakhir meri mulaqat ek Bani Ghifar ke aadmi se aadhi raat mein hui mein ne poocha ke Rasul Allah (Sallallahu Alaihi Wasallam) kahan hain ? Unhon ne bataya ke mein Aap (Sallallahu Alaihi Wasallam) se Tahan nami jagah mein alag hua tha aur Aap (Sallallahu Alaihi Wasallam) ka irada ye tha ke dopahar ko maqam-e-Saqya mein aaram karein ge phir jab mein Rasul Allah (Sallallahu Alaihi Wasallam) ki khidmat mein hazir hua to mein ne arz ki ya Rasul Allah! Aap ke ashab ne aap ko salam kaha hai aur unhein darr hai ke kahin dushman aap ke aur un ke darmiyan hayal na ho jaye is liye aap un ka intezar kijiye chunanche aap ne aisa hi kiya, mein ne ye bhi arz ki ke ya Rasul Allah! mein ne ek gor-khar ka shikar kiya aur kuch bacha hua gosht ab bhi maujood hai is par Aap (Sallallahu Alaihi Wasallam) ne apne ashab se farmaya ke khao halankay wo sab ihram bandhe hue thay
.

Hum se Maaz Bin Fadalah ne bayan kiya, kaha hum se Hisham ne bayan kiya, un se Yahya Ibn Kathir ne, un se Abdullah Bin Abi Qatadah ne bayan kiya ke mere walid sulh-e-Hudaibiyah ke mauqe par (dushmanon ka pata lagane) nikle. Phir un ke sathiyon ne to ihram bandha liya lekin (khud unhon ne abhi) nahi bandha tha (asal mein) Nabi Kareem (Sallallahu Alaihi Wasallam) ko kisi ne ye ittela di thi ke maqam-e-Ghaiqah mein dushman aap ki taak mein hai, is liye Nabi Kareem (Sallallahu Alaihi Wasallam) ne (Abu Qatadah aur chand Sahaba Radi Allahu Anhum ko un ki talash mein) rawan kiya mere walid (Abu Qatadah Radi Allahu Anhu) apne sathiyon ke sath thay ke ye log ek doosre ko dekh kar hansne lage (mere walid ne bayan kiya ke) mein ne jo nazar uthayi to dekha ke ek jangli gadha samne hai. Mein is par jhapta aur neze se usay thanda kar diya. Mein ne apne sathiyon ki madad chahi thi lekin unhon ne inkar kar diya tha, phir hum ne gosht khaya. Ab humein ye darr hua ke kahin (Rasul Allah Sallallahu Alaihi Wasallam se) door na ho jayein, chunanche mein ne Aap ko talash karna shuru kar diya kabhi apne ghore taiz kar deta aur kabhi aahista, aakhir raat gaye Bano Ghifar ke ek shakhs se mulaqat ho gayi. Mein ne poocha ke Rasul Allah (Sallallahu Alaihi Wasallam) kahan hain ? Unhon ne bataya ke jab mein aap se juda hua to aap maqam-e-Tahan mein thay aur aap ka irada tha ke maqam-e-Saqya mein pohanch kar dopahar ka aaram karein ge. Gharz mein Nabi Kareem (Sallallahu Alaihi Wasallam) ki khidmat mein hazir ho gaya aur mein ne arz ki ya Rasul Allah! Aap ke ashab aap par salam aur Allah ki rahmat bhejte hain. Unhein ye darr hai ke kahin wo bahut peeche na reh jayein. Is liye aap thehar kar un ka intezar karein, phir mein ne kaha ya Rasul Allah! mein ne ek jangli gadha shikar kiya tha aur is ka kuch bacha hua gosht ab bhi mere paas maujood hai, Aap (Sallallahu Alaihi Wasallam) ne logon se khane ke liye farmaya halankay wo sab ihram bandhe hue thay
.

Hum se Abdullah Bin Muhammad ne bayan kiya, ke hum se Sufyan Bin Uyainah ne bayan kiya, kaha hum se Salih Bin Kaisan ne bayan kiya, un se Abu Muhammad ne, un se Abu Qatadah (Radi Allahu Anhu) ke ghulam Nafi ne, unhon ne Abu Qatadah (Radi Allahu Anhu) se suna, Aap ne farmaya ke hum Nabi Kareem (Sallallahu Alaihi Wasallam) ke sath Madinah se teen manzil door maqam-e-Qahah mein thay. (Doosri sanad Imam Bukhari Rahimahullah ne) kaha ke hum se Ali Bin Abdullah ne bayan kiya, kaha ke hum se Sufyan ne bayan kiya kaha hum se Salih Bin Kaisan ne bayan kiya, un se Abu Muhammad ne aur un se Abu Qatadah (Radi Allahu Anhu) ne bayan kiya ke hum Nabi Kareem (Sallallahu Alaihi Wasallam) ke sath maqam-e-Qahah mein thay, baaz to hum mein se muhrim thay aur baaz ghair muhrim. Mein ne dekha ke mere sathi ek doosre ko kuch dikha rahe hain, mein ne jo nazar uthayi to ek gor-khar samne tha, un ki murad ye thi ke un ka kora gir gaya, (aur apne sathiyon se usay uthane ke liye unhon ne kaha), lekin sathiyon ne kaha ke hum tumhari kuch bhi madad nahi kar sakte kyunke hum muhrim hain) is liye mein ne wo khud uthaya is ke baad mein is gor-khar ke nazdeek ek teele ke peeche se aya aur usay shikar kiya, phir mein usay apne sathiyon ke paas laya, baaz ne to ye kaha ke (humein bhi) kha lena chahiye lekin baaz ne kaha ke nahi khana chahiye. Phir Nabi Kareem (Sallallahu Alaihi Wasallam) ki khidmat mein aya. Aap hum se aage thay, mein ne aap se masla poocha to aap ne bataya ke kha lo ye halal hai. Hum se Amr Bin Dinar ne kaha ke Salih Bin Kaisan ki khidmat mein hazir ho kar is hadees aur is ke ilawa ke mutabiq pooch sakte ho aur wo hamare paas yahan aaye thay
.

Hum se Muhammad Bin Abi Bakr ne bayan kiya, kaha hum se Fudail Bin Sulaiman ne bayan kiya, un se Abu Hazim ne, un se Abdullah Bin Abi Qatada ne aur un se un ke baap ne ke wo Nabi Kareem (Sallallahu Alaihi Wasallam) ke sath (Sulh-e-Hudaibiyah ke mauqe par) nikle. Abu Qatada (Radi Allahu Anhu) apne chand sathiyon ke sath peeche reh gaye thay. Un ke doosre tamam sathi to muhrim thay lekin unhon ne khud ihram nahi bandha tha. Un ke sathiyon ne ek gor-khar dekha. Abu Qatada (Radi Allahu Anhu) ke is par nazar parne se pehle un hazrat ki nazar agarche is par pari thi lekin unhon ne ise chor diya tha lekin Abu Qatada (Radi Allahu Anhu) ise dekhte hi apne ghore par sawar hue, un ke ghore ka naam Jarada tha, is ke baad unhon ne sathiyon se kaha ke koi un ka kora utha kar unhein dede (jise liye baghair wo sawar ho gaye thay) un logon ne is se inkar kiya (muhrim hone ki wajah se) is liye unhon ne khud hi le liya aur gor-khar par hamla kar ke us ki kounchein kaat dein unhon ne khud bhi is ka gosht khaya aur doosre sathiyon ne bhi khaya phir Nabi Kareem (Sallallahu Alaihi Wasallam) ki khidmat mein hazir hue. Jab ye log Aap (Sallallahu Alaihi Wasallam) ke sath ho liye Aap (Sallallahu Alaihi Wasallam) ne poocha ke kya is ka gosht tumhare paas bacha hua baqi hai? Abu Qatada ne kaha ke haan is ki ek ran hamare sath baqi hai. Chunancha Nabi Kareem (Sallallahu Alaihi Wasallam) ne bhi wo gosht khaya. Ghore ka naam Jarada tha, (is se baab ka matlab sabit hua)
.

Hum se Abdullah Bin Yusuf ne bayan kiya, kaha hum ko Imam Malik ne khabar di, unhein Umar Bin Ubaidullah ke maula Abul Nazr ne aur unhein Abu Qatada Ansari ke maula Nafi ne aur unhein Abu Qatada (Radi Allahu Anhu) ne ke aap Rasul Allah (Sallallahu Alaihi Wasallam) ke sath thay (Sulh-e-Hudaibiyah ke mauqe par) Makkah ke raste mein aap (Sallallahu Alaihi Wasallam) apne chand sathiyon ke sath jo ihram bandhe hue thay, lashkar se peeche reh gaye. Khud Qatada (Radi Allahu Anhu) ne abhi ihram nahi bandha tha. Phir unhon ne ek gor-khar dekha aur apne ghore par (shikar karne ki niyat se) sawar ho gaye, is ke baad unhon ne apne sathiyon se (ihram bandhe hue thay) kaha ke kora utha dein unhon ne is se inkar kiya, phir unhon ne apna neza manga is ke dene se unhon ne inkar kiya, aakhir unhon ne khud ise uthaya aur gor-khar par jhapat pare aur ise maar liya. Nabi Kareem (Sallallahu Alaihi Wasallam) ke sahaba mein se baaz ne to is gor-khar ka gosht khaya aur baaz ne is ke khane se (ihram ke uzr ki bina par) inkar kiya. Phir jab ye Rasul Allah (Sallallahu Alaihi Wasallam) ki khidmat mein pahunche to is ke mutalliq masla poocha. Aap (Sallallahu Alaihi Wasallam) ne farmaya ke ye to ek khane ki cheez thi jo Allah ne tumhein ata ki. Aur Zaid Bin Aslam se riwayat hai ke un se Ata Bin Yasar ne bayan kiya aur un se Abu Qatada (Radi Allahu Anhu) ne gor-khar ke (shikar se) mutalliq Abul Nazr hi ki hadees ki tarah (albatta is riwayat mein ye zaid hai) Nabi Kareem (Sallallahu Alaihi Wasallam) ne daryaft farmaya ke is ka kuch bacha hua gosht abhi tumhare paas maujood hai?
.

Aur mujh se Abdul Aziz bin Abdullah Owaysi ne bayan kiya , kaha hum se Muhammad bin Jafar ne bayan kiya , in se Abu Hazim ne bayan kiya , in se Abdullah bin Abi Qatadah Aslami ne , in se un ke walid ne bayan kiya ke main ek din Nabi Karim salla Allahu alaihi wasallam ke chand sahabah ke saath Makkah ke rasta mein ek manzil par baitha hua tha . Nabi Karim salla Allahu alaihi wasallam ne hamare aage parao kiya tha . Sahabah ikraam razi Allahu anhum ihram ki halat mein thay lekin main ihram mein nahi tha . Logon ne ek gor-khar ko dekha . Main is waqt اپنا joota taankne mein masroof tha . In logon ne mujhe is gor-khar ke mutalliq bataya kuch nahi lekin chahte thay ke main kisi tarah dekh loon . Chunanche main mutawajjo hua aur main ne usay dekh liya , phir main ghore ke paas gaya aur usay zain pehna kar is par sawar ho gaya lekin kora aur nezah bhool gaya thu . Main ne in logon se kaha ke kora aur nezah mujhe de do . Unhon ne kaha ke nahi Allah ki qasam! Hum tumhari shikar ke muamla mein koi madad nahi karein ge . (kyunke hum mahram hain) main ghussa ho gaya aur main ne utar kar khud yeh donon cheezin uthayiein phir sawar ho kar is par hamla kiya aur zibah kar liya . Jab woh thanda ho gaya to main usay saath laya phir paka kar main ne aur sab ne khaya lekin baad mein unhein shubha hua ke ihram ki halat mein is (shikar ka gosht) khana kaisa hai ? Phir hum rawana huay aur main ne is ka gosht chhupa kar rakkha . Jab Nabi Karim salla Allahu alaihi wasallam ke paas aaye to hum ne Aap se is ke mutalliq poochha . Aap salla Allahu alaihi wasallam ne daryaft farmaya , tumhare paas kuch bacha hua bhi hai ? Main ne wahi dast pesh kiya aur Aap salla Allahu alaihi wasallam ne bhi usay khaya . Yahan tak ke is ka gosht Aap ne apne daanton se khainch khainch kar khaya aur Aap ihram mein thay . Muhammad bin Jafar ne bayan kiya ke mujh se Zayd bin Aslam ne yeh waqia bayan kiya , in se Ata bin Yasar ne aur in se Abu Qatadah razi Allahu anhu ne isi tarah sara waqia bayan kiya .