Hum se Ahmad Bin Isa ne bayan kiya, unhon ne kaha hum se Ibn Wahb ne bayan kiya, unhein Amr ne khabar di, unhein Abul Aswad ne ke Asma Bint Abi Bakr (Radi Allahu Anhuma) ke ghulam Abdullah ne un se bayan kiya, unhon ne Asma (Radi Allahu Anha) se suna tha, wo jab bhi Hajoon pahar se ho kar guzrateen to ye kehteen rahmatein nazil hon Allah ki Muhammad (Sallallahu Alaihi Wasallam) par, hum ne aap (Sallallahu Alaihi Wasallam) ke sath yahien qiyam kiya tha, un dinon hamare (saman) bohat halke phulke thay, sawariyan aur zad-e-raah ki bhi kami thi, mein ne, meri behen Aisha (Radi Allahu Anha) ne, Zubair aur falan falan (Radi Allahu Anhum) ne Umrah kiya aur jab Bait Allah ka tawaf kar chuke to (Safa aur Marwah ki sayee ke baad) hum halal ho gaye, Haj ka ihram hum ne shaam ko bandha tha
.

Hum se Asbagh bin Faraj ne byaan kiya , un se Abdullah bin Wahab ne byaan kiya ke mujhe Amru bin Harith ne Muhammad bin Abdul Rahman Abul Aswad se khabar di , unhon ne kaha ke maine Urwah se (Hajj ka masla) poocha to unhon ne farmaya ke Aisha razi Allahu anha ne mujhe khabar di thi ke Nabi Karim salla Allahu alaihi wasallam jab (Makka) tashreef laye to sab se pehla kaam Aap salla Allahu alaihi wasallam ne yeh kiya ke wazu kiya phir tawaf kiya aur tawaf karne se Umrah nahi hua . Is ke baad Abu Bakr aur Umar razi Allahu anhuma ne bhi isi tarah Hajj kiya . Phir Urwah ne kaha ke maine apne walid Zubayr razi Allahu anhu ke saath Hajj kiya , unhon ne bhi sab se pehle tawaf kiya . Muhajireen aur Ansar ko bhi maine isi tarah karte dekha tha . Meri walida (Asma bint Abi Bakr razi Allahu anhuma) ne bhi mujhe bataya ke unhon ne apni behen (Aisha razi Allahu anha) aur Zubayr aur falan falan ke saath Umrah ka ahram baandha tha . Jab in logon ne Hajr-e-Aswad ko bosa de liya to ahram khool dala tha .