Hum se Abdullah Bin Muhammad ne bayan kiya, kaha ke hum se Ishaq Azraq ne bayan kiya, kaha ke hum se Sufyan Suri ne Abdul Aziz Bin Rafiee ke waste se bayan kiya, kaha ke mein ne Anas Bin Malik (Radi Allahu Anhu) se poocha ke Rasul Allah (Sallallahu Alaihi Wasallam) ne Zohar aur Asr ki namaz athwein Zi Al-Hijjah mein kahan parhi thi? Agar aap ko Nabi Kareem (Sallallahu Alaihi Wasallam) se yaad hai to mujhe bataiye. Unhon ne jawab diya ke Mina mein. Mein ne poocha ke barahwein tareekh ko Asr kahan parhi thi? Farmaya ke Muhassab mein. Phir unhon ne farmaya ke jis tarah tumhare hukkam karte hain isi tarah tum bhi karo
.

Hum se Muhammad Bin Musanna ne bayan kiya, kaha hum se Ishaq Bin Yusuf ne bayan kiya, un se Sufyan Suri ne bayan kiya, un se Abdul Aziz Bin Rafiee ne bayan kiya ke mein ne Anas Bin Malik (Radi Allahu Anhu) se poocha, mujhe wo hadees bataye jo aap ko Rasul Allah (Sallallahu Alaihi Wasallam) se yaad ho ke unhon ne athwein Zi Al-Hijjah ke din Zohar ki namaz kahan parhi thi, unhon ne kaha Mina mein, mein ne poocha aur rawangi ke din Asr kahan parhi thi unhon ne farmaya ke Abtah mein aur tum isi tarah karo jis tarah tumhare hakim log karte hon. (Taake fitna waqe na ho)
.

Hum se Ali Bin Abdullah Madini ne bayan kiya, unhon ne Abu Bakr Bin Ayash se suna ke hum se Abdul Aziz Bin Rafiee ne bayan kiya, kaha ke mein Anas (Radi Allahu Anhu) se mila (Doosri sanad) Imam Bukhari (Rahimahullah) ne kaha aur mujh se Ismail Bin Aban ne bayan kiya, kaha ke hum se Abu Bakr Bin Ayash ne bayan kiya, un se Abdul Aziz ne kaha ke mein athwein tareekh ko Mina gaya to wahan Anas (Radi Allahu Anhu) se mila. Wo gadhi par sawar ho kar ja rahe thay. Mein ne poocha Nabi Kareem (Sallallahu Alaihi Wasallam) ne is din Zohar ki namaz kahan parhi thi? Unhon ne farmaya dekho jahan tumhare hakim log namaz parhein wahin tum bhi parho
.