Hum se Abdullah bin Maslamah ne bayan kiya, un se Imam Malik Rahimahullah ne Musa bin Uqbah ke waaste se bayan kiya, unhon ne Kuraib Maula Ibn-e-Abbas se, unhon ne Usama bin Zaid Radhiallahu Anhuma se suna, woh kehte the ke Rasoolullah Sallallahu Alaihi Wasallam Maidaan-e-Arafaat se waapas huwe. Jab ghaati mein pahunche to Aap Sallallahu Alaihi Wasallam utar gaye. Aap Sallallahu Alaihi Wasallam ne (pehle) peshaab kiya, phir Wuzu kiya aur khoob achchi tarah nahi kiya. Tab main ne kaha, ya Rasoolallah! Namaz ka waqt (aa gaya) Aap Sallallahu Alaihi Wasallam ne farmaaya: Namaz, tumhaare aage hai (yani Muzdalifah chal kar padhenge) jab Muzdalifah mein pahunche to Aap ne khoob achchi tarah Wuzu kiya, phir jama’at khadi ki gayi, Aap Sallallahu Alaihi Wasallam ne Maghrib ki Namaz padhi, phir har shakhs ne apne oont ko apni jagah bithlaaya, phir ’Isha ki jama’at khadi ki gayi aur Aap Sallallahu Alaihi Wasallam ne Namaz padhi aur un dono namaazon ke darmiyaan koi Namaz nahi padhi.

Hum se Muhammed bin Salaam ne bayan kiya, kaha hum ko Yazeed bin Haroon ne Yahya se khabar di, woh Musa bin Uqbah se, woh Kuraib Ibn-e-Abbas ke aazaad kardah ghulam se, woh Usama bin Zaid se naql karte hain ke Rasoolullah Sallallahu Alaihi Wasallam jab Arafah se laute, to (pahaad ki) ghaati ki jaanib mud gaye, aur rafa-e-haajat ki. Usama kehte hain ke phir (Aap Sallallahu Alaihi Wasallam ne Wuzu kiya aur) main Aap Sallallahu Alaihi Wasallam ke (aazaa) par paani daalne laga aur Aap Sallallahu Alaihi Wasallam Wuzu farmaate rahe. Main ne kaha ya Rasoolallah! Aap (ab) Namaz padhenge? Aap Sallallahu Alaihi Wasallam ne farmaaya Namaz ka maqam tumhaare saamne (yani Muzdalifah mein) hai. Wahaan Namaz padhi jaayegi.

Hum se Musaddad ne bayan kiya, kaha hum se Hammad Bin Zaid ne bayan kiya, un se Yahya Bin Saeed ne, un se Musa Bin Uqbah ne un se Abdullah Bin Abbas (Radi Allahu Anhuma) ke ghulam Kuraib ne aur un se Usama Bin Zaid (Radi Allahu Anhuma) ne ke jab Rasul Allah (Sallallahu Alaihi Wasallam) Arafat se wapas hue thay to Aap (Sallallahu Alaihi Wasallam) (raah mein) ek ghati ki taraf mure aur wahan qaza-e-hajat ki phir Aap (Sallallahu Alaihi Wasallam) ne wazu kiya to mein ne poocha Ya Rasul Allah! Kya (Aap Sallallahu Alaihi Wasallam Maghrib ki) namaz parhein ge? Aap (Sallallahu Alaihi Wasallam) ne farmaya namaz aage chal kar parhi jaye gi. (Yani Arafat se Muzdalifah aate hue qaza-e-hajat waghera ke liye rasta mein rukne mein koi haraj nahi hai)
.

Hum se Qutaiba ne bayan kiya, unhon ne kaha hum se Ismail Bin Jafar ne bayan kiya, un se Muhammad Bin Harmala ne, un se Ibn Abbas (Radi Allahu Anhuma) ke ghulam Kuraib ne aur un se Usama Bin Zaid (Radi Allahu Anhuma) ne ke mein Arafat se Rasul Allah (Sallallahu Alaihi Wasallam) ki sawari par Aap (Sallallahu Alaihi Wasallam) ke peeche baitha hua tha. Muzdalifah ke qareeb bayein taraf jo ghati parti hai jab Nabi Kareem (Sallallahu Alaihi Wasallam) wahan pohanche to Aap (Sallallahu Alaihi Wasallam) ne ont ko bithaya phir peshab kiya aur tashreef laye to mein ne Aap (Sallallahu Alaihi Wasallam) par wazu ka pani dala. Aap (Sallallahu Alaihi Wasallam) ne halka sa wazu kiya. Mein ne kaha Ya Rasul Allah! Aur namaz? Aap (Sallallahu Alaihi Wasallam) ne farmaya ke ”Namaz tumhare aage hai.“ (Yani Muzdalifah mein parhi jaye gi) phir Aap (Sallallahu Alaihi Wasallam) sawar ho gaye jab Muzdalifah mein aaye to (Maghrib aur Isha ki) namaz (mila kar) parhi. Phir Muzdalifah ki subah (yani daswein tareekh) ko Rasul Allah (Sallallahu Alaihi Wasallam) ki sawari ke peeche Fazl Bin Abbas (Radi Allahu Anhu) sawar hue
.

Kuraib ne kaha ke mujhe Abdullah Bin Abbas (Radi Allahu Anhuma) ne Fazl (Radi Allahu Anhu) ke zariya se khabar di ke Nabi Kareem (Sallallahu Alaihi Wasallam) barabar labbaik kehte rahe ta-aanke Jamrah Aqabah par pohanch gaye (aur wahan Aap Sallallahu Alaihi Wasallam ne kankariyan mareen)
.

Hum se Abdullah Bin Yusuf ne bayan kiya, kaha ke hum se Imam Malik ne kaha, unhein Musa Bin Uqbah ne khabar di, unhein Kuraib ne, unhon ne Usama Bin Zaid (Radi Allahu Anhuma) ko ye kehte suna ke maidan-e-Arafat se Rasul Allah (Sallallahu Alaihi Wasallam) rawana ho kar ghati mein utre (jo Muzdalifah ke qareeb hai) wahan peshab kiya, phir wazu kiya aur poora wazu nahi kiya (khoob pani nahi bahaya halka wazu kiya) mein ne namaz ke mutaliq arz ki to farmaya ke namaz aage hai. Ab Aap (Sallallahu Alaihi Wasallam) Muzdalifah tashreef laye wahan phir wazu kiya aur poori tarah kiya phir namaz ki takbeer kahi gayi aur Aap (Sallallahu Alaihi Wasallam) ne Maghrib ki namaz parhi phir har shakhs ne apne ont deron par bitha diye phir dobara namaz-e-Isha ke liye takbeer kahi gayi aur Aap (Sallallahu Alaihi Wasallam) ne namaz parhi, Aap (Sallallahu Alaihi Wasallam) ne in dono namazon ke darmiyan koi (sunnat ya nafal) namaz nahi parhi thi
.