Hum se Abul Yaman ne byaan kiya ‘ kaha ke humein Shuayb ne khabar di ‘ kaha ke hum ko Abuz Zinad ne khabar di ‘ un se Aaraj ne ‘ un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke jo shakhs khud apna gala ghoont kar jaan de daalta hai woh Jahannam mein bhi apna gala ghoont-ta rahe ga aur jo barchhay ya teer se apne tayein (aap ko) maare woh Dozakh mein bhi is tarah apne (aap ko) tayein maarta rahe ga .

Hum se Abdullah bin Abd-ul-Wahhab ne bayan kiya, unhon ne kaha hum se Khalid bin Haris ne bayan kiya, in se Shubah ne bayan kiya, in se Sulayman ne bayan kiya, unhon ne kaha ke main ne Zhakwan se suna, woh Abu Hurairah razi Allahu anhu se yeh hadees bayan karte thay ke Nabi Karim salla Allahu alaihi wasallam ne farmaya ke jis ne pahar se apne Aap ko gira kar khud-kushi kar li woh jahannum ki aag mein ho ga aur is mein hamesha para rahe ga aur jis ne zehar pee kar khud-kushi kar li woh zehar is ke saath mein ho ga aur jahannum ki aag mein woh usay isi tarah hamesha peeta rahe ga aur jis ne lohe ke kisi hathiyar se khud-kushi kar li to is ka hathiyar is ke saath mein ho ga aur jahannum ki aag mein hamesha ke liye woh usay apne pait mein maarta rahe ga.