Hum se Qutaybah bin Saeed ne byaan kiya ‘ unhon ne kaha ke hum se Layth bin Saad ne byaan kiya ‘ unhon ne kaha ke hum se Nafi ne aur un se Abdullah bin Umar razi Allahu anhuma ne عامر bin Rabeeah razi Allahu anhu ke hawala se ke Nabi Karim salla Allahu alaihi wasallam ne farmaya ke jab tum mein se koi janaza dekhe to agar is ke saath nahin chal raha hai to khara hi ho jaye ta-aanke janaza aage nikal jaye ya aage jaane ki bajaye khud janaza rakh diya jaye .

Hum se Ali bin Abdullah Madini ne byaan kiya ‘ kaha hum se Sufyan bin Uyaynah ne byaan kiya ‘ un se Zuhri ne ‘ un se Salim ne ‘ un se un ke baap Abdullah bin Umar razi Allahu anhuma ne ‘ un se عامر bin Rabeeah razi Allahu anhu ne aur un se Nabi Karim salla Allahu alaihi wasallam ne farmaya ke jab tum janaza dekho to kharay ho jao aur kharay raho yahan tak ke janaza tum se aage nikal jaye . Sufyan ne byaan kiya ‘ un se Zuhri ne byaan kiya ke mujhe Salim ne apne baap Abdullah bin Umar razi Allahu anhuma se khabar di . Aap ne farmaya ke humein عامر bin Rabeeah razi Allahu anhu ne Nabi Karim salla Allahu alaihi wasallam ke hawala se khabar di thi . Humaydi ne yeh ziyaadati ki hai . ”Yahan tak ke janaza aage nikal jaye ya rakkha diya jaye .“

Hum se Ahmad bin Yunus ne byaan kiya ‘ un se Ibn Abi Zi'b ne ‘ un se Saeed Maqburi ne aur un se un ke waalid ne ke hum ek janaza mein shareek thay ke Abu Hurairah razi Allahu anhu ne Marwan ka haath pakra aur yeh donon saahib janaza rakkhe jaane se pehle baith gaye . Itne mein Abu Saeed razi Allahu anhu tashreef laaye aur Marwan ka haath pakar kar farmaya ke utho! Allah ki qasam! yeh (Abu Hurairah razi Allahu anhu) jaante hain ke Nabi Karim salla Allahu alaihi wasallam ne humein is se mana farmaya hai . Abu Hurairah razi Allahu anhu bole ke Abu Saeed razi Allahu anhu ne sach kaha hai .

Hum se Muslim bin Ibrahim ne byaan kiya ‘ unhon ne kaha hum se Hisham Dastuwai ne byaan kiya ‘ un se Yahya bin Abi Kaseer ne , un se Abu Salamah aur un se Abu Saeed Khudri razi Allahu anhu ne ke Nabi Karim salla Allahu alaihi wasallam ne farmaya ke jab tum log janaza dekho to kharay ho jao aur jo shakhs janaza ke saath chal raha ho woh is waqt tak na baithe jab tak janaza rakh na diya jaye .

Hum se Ma'az bin Fadalah ne byaan kiya ‘ unhon ne kaha ke hum se Hisham ne byaan kiya ‘ un se Yahya bin Abi Kaseer ne byaan kiya , un se Ubaydullah bin Miqsam ne aur un se Jabir bin Abdullah razi Allahu anhuma ne ke hamare saamne se ek janaza guzra to Nabi Karim salla Allahu alaihi wasallam kharay ho gaye aur hum bhi kharay ho gaye . Phir hum ne kaha ke ya Rasool Allah! yeh to Yahudi ka janaza tha . Aap salla Allahu alaihi wasallam ne farmaya ke jab tum log janaza dekho to kharay ho jaya karo .