Hum se Ismail bin Abdullah ne byaan kiya , unhon ne kaha ke mujh se Imam Malik ne byaan kiya , un se Ayub Sakhtiyani ne aur un se Muhammad bin Sirin ne , un se Umm Atiya Ansari razi Allahu anha ne byaan kiya ke jab Rasool Allah salla Allahu alaihi wasallam ki beti (Zaynab ya Umm Kulsoom razi Allahu anhuma) ki wafat hui Aap salla Allahu alaihi wasallam wahan tashreef laaye aur farmaya ke teen ya paanch martaba ghusl de do aur agar munasib samjho to is se bhi zyada de sakti ho . Ghusl ke paani mein beri ke patte mila lo aur aakhir mein kafoor ya (yeh kaha ke) kuch kafoor ka istemal kar lena aur ghusl se farigh hone par mujhe khabar de dena . Chunanche hum ne jab ghusl de liya to Aap salla Allahu alaihi wasallam ko khabar dedi . Aap salla Allahu alaihi wasallam ne humein apna izaar diya aur farmaya ke ise un ki qamees bana do . Aap salla Allahu alaihi wasallam ki murad apne izaar se thi .

Hum se Muhammad ne byaan kiya , unhon ne kaha ke hum se Abdul Wahhab Saqafi ne byaan kiya , un se Ayub ne , un se Muhammad ne , un se Umm Atiya razi Allahu anha ne ke hum Rasool Allah salla Allahu alaihi wasallam ki beti ko ghusl de rahi thin ke Aap salla Allahu alaihi wasallam tashreef laaye aur farmaya ke teen ya paanch martaba ghusl do ya is se bhi zyada , paani aur beri ke patton se aur aakhir mein kafoor bhi istemal karna . Phir farigh ho kar mujhe khabar de dena . Jab hum farigh huay to Aap salla Allahu alaihi wasallam ko khabar kar di . Aap salla Allahu alaihi wasallam ne apna izaar inayat farmaya aur farmaya ke yeh andar is ke badan par lapait do .

Hum se Abdur Rahman bin Hammad ne byaan kiya , kaha ke hum ko Ibn Awn ne khabar di , unhein Muhammad ne , un se Umm Atiya razi Allahu anha ne byaan kiya ke Nabi Karim salla Allahu alaihi wasallam ki ek saahibzadi ka intiqal ho gaya . Is mauqe par Aap salla Allahu alaihi wasallam ne humein farmaya ke tum ise teen ya paanch martaba ghusl do aur agar munasib samjho to is se zyada martaba bhi ghusl de sakti ho . Phir farigh ho kar mujhe khabar dena . Chunanche jab hum ghusl de chakein to Aap salla Allahu alaihi wasallam ko khabar di aur Aap salla Allahu alaihi wasallam ne apna izaar inayat farmaya aur farmaya ke ise is ke badan se lapait do .

Aur Umm Atiya razi Allahu anha ne is riwayat mein yoon kaha ke Nabi Karim salla Allahu alaihi wasallam ne farmaya ke teen ya paanch ya saat martaba ya agar tum munasib samjho to is se bhi zyada ghusl de sakti ho . Hafsa razi Allahu anha ne byaan kiya ke Umm Atiya razi Allahu anha ne farmaya ke hum ne un ke sar ke baal teen latton mein taqseem kar diye thay .

Hum se Ahmad ne byaan kiya , kaha ke mujh se Abdullah bin Wahb ne byaan kiya , unhein Ibn Jurayj ne khabar di , unhein Ayub ne khabar di , kaha ke main ne Ibn Sirin se suna , unhon ne kaha ke Umm Atiya razi Allahu anha ke yahan Ansar ki in khawateen mein se jinhon ne Nabi Karim salla Allahu alaihi wasallam se baiyat ki thi , ek aurat aayi , Basra mein unhein apne ek bete ki talash thi . Lekin woh na mila . Phir us ne hum se yeh hadees byaan ki ke hum Rasool Allah salla Allahu alaihi wasallam ki saahibzadi ko ghusl de rahi thin ke Aap salla Allahu alaihi wasallam tashreef laaye aur farmaya ke teen ya paanch martaba ghusl de do aur agar munasib samjho to is se bhi zyada de sakti ho . Ghusl paani aur beri ke patton se hona chahiye aur aakhir mein kafoor bhi istemal kar lena . Ghusl se farigh ho kar mujhe khabar kara dena . Unhon ne byaan kiya ke jab hum ghusl de chakein (to itla di) aur Aap salla Allahu alaihi wasallam ne izaar inayat kiya . Aap salla Allahu alaihi wasallam ne farmaya ke ise andar badan se lapait do . Is se zyada Aap salla Allahu alaihi wasallam ne kuch nahin farmaya . Mujhe yeh nahin maloom ke yeh Aap salla Allahu alaihi wasallam ki kaun si beti thin (yeh Ayub ne kaha) aur unhon ne bataya ke «ish-aar» ka matlab yeh hai ke is mein naash lapait di jaye . Ibn Sirin rahimahullah bhi yehi farmaya karte thay ke aurat ke badan par ise lapaita jaye izaar ke taur par na baandha jaye .

Hum se Musaddad ne byaan kiya , kaha ke hum se Yahya bin Saeed ne byaan kiya , un se Hisham bin Hassan ne byaan kiya , kaha ke hum se Hafsa ne byaan kiya , un se Umm Atiya razi Allahu anha ne ke Rasool Allah salla Allahu alaihi wasallam ki ek saahibzadi ka intiqal ho gaya to Nabi Karim salla Allahu alaihi wasallam tashreef laaye aur farmaya ke in ko paani aur beri ke patton se teen ya paanch martaba ghusl de do . Agar tum munasib samjho to is se zyada bhi de sakti ho aur aakhir mein kafoor ya (Aap salla Allahu alaihi wasallam ne yeh farmaya ke) thori si kafoor istemal karo phir jab ghusl de chako to mujhe khabar do . Chunanche farigh ho kar hum ne Aap salla Allahu alaihi wasallam ko khabar di to Aap salla Allahu alaihi wasallam ne (un ke kafan ke liye) apna izaar inayat kiya . Hum ne is ke sar ke baalon ki teen chotiyaan kar ke unhein peeche ki taraf daal diya tha .

Hum se Musaddad ne bayan kiya, un se Ismail ne, un se Khalid ne Hafsa bint-e-Sireen ke waaste se naql kiya, woh Umm-e-Atiyyah se riwayat karti hain ke Rasoolullah Sallallahu Alaihi Wasallam ne apni (marhooma) sahebzaadi (Zainab Radhiallahu Anha) ko ghusl dene ke waqt farmaaya tha ke ghusl daahni taraf se do, aur aazaa-e-Wuzu se ghusl ki ibtida karo.