Hum se Ma'az bin Fadalah ne byaan kiya , unhon ne kaha ke hum se Hisham bin Abi Abdullah Dastuwai ne byaan kiya , un se Yahya bin Abi Kaseer ne , un se Abu Salamah ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke jab namaaz ke liye azaan hoti hai to Shaytan hawa kharij karta hua bhagta hai taake azaan na sune , jab azaan poori ho jaati hai to phir aa jata hai . Jab iqamat hoti hai to phir bhaag parta hai . Lekin iqamat khatm hote hi phir aa jata hai aur namazi ke dil mein tarah tarah ke waswasay dalta hai aur kehta hai ke falan falan baat yaad karo , is tarah ise woh baatein yaad dilata hai jo is ke zehan mein nahin thin . Lekin doosri taraf namazi ko yeh bhi yaad nahin rehta ke kitni rakatain is ne parhi hain . Is liye agar kisi ko yeh yaad na rahe ke teen rakat parhein ya chaar to baithe hi baithe sahu ke do sajde kar le .

Hum se Abdullah bin Yusuf Tinnisi ne bayan kiya , kaha humein Imam Malik ne Abul Zinad se khabar di , unhon ne Araj se , unhon ne Abu Hurairah raziyallahu anhu se ke Nabi Karim salla Allahu alaihi wa sallam ne farmaya jab namaz ke liye azan di jati hai to shaitan paadta hua bari tezi ke sath peeth mor kar bhagta hai . Taake azan ki awaz na sun sake aur jab azan khatam ho jati hai to phir wapas aa jata hai . Lekin jun hi takbeer shuru hui woh phir peeth mor kar bhagta hai . Jab takbeer bhi khatam ho jati hai to shaitan dobara aa jata hai aur namazi ke dil mein waswase dalta hai . Kehta hai ke falaa baat yaad kar falaa baat yaad kar . Un baton ki shaitan yaad dahani karata hai jin ka isay khayal bhi na tha aur is tarah is shakhs ko yeh bhi yaad nahi rehta ke is ne kitni rakaten parhi hain .

Hum se Yahya bin Bukayr ne byaan kiya , kaha ke hum se Layth ne , un se Jafar bin Rabeeah ne aur un se Aaraj ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke jab namaaz ke liye azaan di jaati hai to Shaytan peeth mor kar riyah kharij karta hua bhagta hai taake azaan na sun sake . Jab muazzin chup ho jata hai to mardood phir aa jata hai aur jab jamaat khari hone lagti hai (aur takbir kahi jaati hai) to phir bhaag jata hai . Lekin jab muazzin chup ho jata hai to phir aa jata hai . Aur aadmi ke dil mein waswaas paida karta rehta hai . Kehta hai ke (falan falan baat) yaad kar . Kam bakht woh baatein yaad dilata hai jo is namazi ke zehan mein bhi na thin . Is tarah namazi ko yeh bhi yaad nahin rehta ke us ne kitni rakatain parhi hain . Abu Salamah bin Abdur Rahman ne kaha ke jab koi yeh bhool jaye (ke kitni rakatain parhi hain) to baithe baithe (sahu ke) do sajde kar le . Abu Salamah ne yeh Abu Hurairah razi Allahu anhu se suna tha .

Hum se Muhammad Bin Yusuf ne bayan kiya, kaha hum se Auzai ne bayan kiya, un se Yahya Bin Abi Kaseer ne, un se Abu Salama ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jab namaz ke liye azan di jati hai to shaitan apni peeth pher kar goz marta hua bhagta hai. Jab azan khatam ho jati hai to wapas aa jata hai. Phir jab takbeer hone lagti hai to bhag khada hota hai aur jab takbeer khatam ho jati hai to phir wapas aa jata hai aur aadmi ke dil mein wasawis dalne lagta hai ke falan baat yaad kar aur falan baat yaad kar, natija ye hota hai ke is ko ye bhi yaad nahi rehta ke teen rakat namaz parhi thi ya char rakat, jab ye yaad na rahe to sahu ke do sajde kare."
.