Hum se Muaz bin Fudalah ne byaan kiya kaha ke hum se Hisham ne Yahya se byaan kiya un se Muhammad bin Abdur Rahman bin Sauban ne byaan kiya unhon ne byaan kiya ke mujh se Jabir bin Abdullah razi Allahu anhuma ne byaan kiya ke Nabi Karim salla Allahu alaihi wasallam apni oontni par mashriq ki taraf munh kiye huay namaaz parhte thay aur jab farz parhte to sawari se utar jate aur phir qibla ki taraf rukh kar ke parhte .

Hum se Muslim bin Ibrahim ne bayan kiya, kaha hum se Hisham bin Abdullah Dastawai ne, kaha hum se Yahya bin Abi Kaseer ne Muhammad bin Abdur Rahman ke wasita se, unhon ne Jabir bin Abdullah se, unhon ne farmaya ke Nabi Kareem Sallallahu Alaihi Wasallam apni sawari par khwah is ka rukh kisi taraf ho (nafil) namaz padhte thay lekin jab farz namaz padhna chahte to sawari se utar jate aur qibla ki taraf munh kar ke namaz padhte.

Hum se Ismail ne byaan kiya , unhon ne kaha ke hum se Imam Malik ne byaan kiya , unhon ne Abu Bakr bin Umar bin Abdur Rahman bin Abdullah bin Umar bin Khattab se byaan kiya aur un ko Saeed bin Yasar ne batlaya ke main Abdullah bin Umar razi Allahu anhuma ke sath Makka ke raaste mein tha . Saeed ne kaha ke jab raaste mein mujhe tuloo-e-fajr ka khatra hua to sawari se utar kar main ne Witr parh liya aur phir Abdullah bin Umar razi Allahu anhuma se ja mila . Aap ne poocha ke kahan ruk gaye thay? Main ne kaha ke ab subah ka waqt hone hi wala tha is liye main sawari se utar kar Witr parhne laga . Is par Abdullah bin Umar razi Allahu anhuma ne farmaya ke kya tumhare liye Nabi Karim salla Allahu alaihi wasallam ka amal achha namoona nahi hai . Main ne arz kiya kyun nahi beshak hai . Aap ne batlaya ke Nabi Karim salla Allahu alaihi wasallam to oont hi par Witr parh liya karte thay .

Hum se Musa bin Ismail ne byaan kiya , kaha ke hum se Juwayriyah bin Asma ne byaan kiya , un se Nafi ne aur un se Abdullah bin Umar razi Allahu anhuma ne ke Nabi Karim salla Allahu alaihi wasallam safar mein apni sawari hi par raat ki namaaz isharon se parh laite thay khwah sawari ka rukh kisi taraf ho jata Aap salla Allahu alaihi wasallam isharon se parhte rehte magar faraiz is tarah nahi parhte thay aur Witr apni oontni par parh laite .

Hum se Ali bin Abdullah Madini ne byaan kiya , unhon ne kaha ke hum se Abdul A'la ne byaan kiya , kaha ke hum se Ma'mar ne Zuhri se byaan kiya , un se Abdullah bin Aamir ne aur un se un ke baap ne kaha ke main ne Rasool Allah salla Allahu alaihi wasallam ko dekha ke oontni par namaaz parhte rehte khwah us ka munh kisi taraf ho .

Hum se Abu Naeem ne byaan kiya , unhon ne kaha ke hum se Shayban ne kaha , un se Yahya ne byaan kiya , un se Muhammad bin Abdur Rahman ne byaan kiya , ke Jabir bin Abdullah razi Allahu anhuma ne unhen khabar di ke Nabi Karim salla Allahu alaihi wasallam nafil namaaz apni oontni par ghair qibla ki taraf munh kar ke bhi parhte thay .

Hum se Abul A'la bin Hammad ne byaan kiya , unhon ne kaha ke hum se Wuhaib ne byaan kiya , unhon ne kaha ke hum se Musa bin Uqbah ne byaan kiya , un se Nafey ne byaan kiya , unhon ne kaha ke Ibn Umar razi Allahu anhuma nafil namaaz sawari par parhte thay . Isi tarah witr bhi . Aur farmate ke Nabi Karim salla Allahu alaihi wasallam bhi aisa karte thay .

Hum se Musa bin Ismail ne byaan kiya , unhon ne kaha ke hum se Abdul Aziz bin Muslim ne byaan kiya , unhon ne kaha ke hum se Abdullah bin Dinar ne byaan kiya , unhon ne kaha ke Abdullah bin Umar razi Allahu anhuma safar mein apni oontni par namaaz parhte khwah us ka munh kisi taraf hota . Aap isharon se namaaz parhte . Aap ka byaan tha ke Nabi Karim salla Allahu alaihi wasallam bhi isi tarah karte thay .

Aur Laith bin Saad ne byaan kiya ke mujh se Yunus ne byaan kiya , unhon ne Ibn Shihab ke waasta se byaan kiya unhon ne kaha ke Salim ne byaan kiya ke Abdullah bin Umar razi Allahu anhuma safar mein raat ke waqt apne janwar par namaaz parhte kuch parwah na karte ke us ka munh kis taraf hai . Ibn Umar razi Allahu anhuma ne kaha ke Nabi Karim salla Allahu alaihi wasallam bhi oontni par nafil namaaz parha karte chahe us ka munh kidhar hi ho aur witr bhi sawari par parh lete thay albatta farz is par nahi parhte thay .

Hum se Ahmad bin Saeed ne byaan kiya , kaha ke hum se Hibban bin Hilal ne byaan kiya , kaha ke hum se Hammam bin Yahya ne byaan kiya , kaha ke hum se Anas bin Sireen ne byaan kiya , unhon ne kaha ke Anas razi Allahu anhu Shaam se jab (Hajjaj ki khalifa se shikayat kar ke) wapas huay to hum un se Ain al-Tamr mein mile . Main ne dekha ke aap gadhay par sawar ho kar namaaz parh rahe thay aur aap ka munh qibla se baayin taraf tha . Is par main ne kaha ke main ne aap ko qibla ke siwa doosri taraf munh kar ke namaaz parhte huay dekha hai . Unhon ne jawab diya ke agar main Rasool Allah salla Allahu alaihi wasallam ko aisa karte na dekhta to main bhi na karta . Is riwayat ko Ibrahim Ibn Tahman ne bhi Hajjaj se , unhon ne Anas bin Sireen se , unhon ne Anas bin Malik razi Allahu anhu se aur unhon ne Nabi Karim salla Allahu alaihi wasallam se byaan kiya hai .

Hum se Abul Yaman ne byaan kiya , unhon ne kaha ke hamen Shu'aib ne khabar di , unhen Zuhri ne aur unhen Salim bin Abdullah bin Umar ne apne baap Abdullah bin Umar razi Allahu anhuma se ke Rasool Allah salla Allahu alaihi wasallam apni oontni ki peeth par khwah us ka munh kisi taraf hota nafil namaaz sar ke isharon se parhte thay . Abdullah bin Umar razi Allahu anhuma bhi isi tarah kiya karte thay .

Hum se Adam Ibn Iyas ne bayan kiya ‘ kaha hum se Ibn Abi Zaib ne bayan kiya ‘ in se Usman Bin Abdullah Bin Suraqa ne bayan kiya aur in se Jabir Bin Abdullah Ansari (Radi Allahu Anhuma) ne bayan kiya ke mein ne Nabi Kareem Sallallahu Alaihi Wasallam ko Ghazwa Anmar mein dekha ke nafal namaz Aap apni sawari par mashriq ki taraf munh kiye hue parh rahe thay
.