Hum se Makki Ibn-e-Ibrahim ne bayan kiya, un se Yazeed bin Abi ’Ubaid ne Salamah bin Akwa’ Radhiallahu Anhu ke waaste se bayan kiya, woh kehte hain ke main ne Rasoolullah Sallallahu Alaihi Wasallam ko yeh farmaate huwe suna ke jo shakhs mere naam se woh baat bayan kare jo main ne nahi kahi to woh apna thikaana jahannam mein bana le.

Hum se Ali bin Ja’d ne bayan kiya, unhein Sho’bah ne khabar di, unhein Mansoor ne, unhon ne Rib’ee bin Hirash se suna ke main ne ’Ali Radhiallahu Anhu ko yeh farmaate huwe suna ke Rasoolullah Sallallahu Alaihi Wasallam ne farmaaya ke mujh par jhoot mat bolo. Kiunki jo mujh par jhoot baandhe woh dozakh mein daakhil ho.

Hum se Abul Waleed ne bayan kiya, unhon ne kaha hum se Sho’bah ne, un se Jami’ bin Shaddad ne, woh Amir bin Abdullah bin Zubair se aur woh apne baap Abdullah bin Zubair Radhiallahu Anhuma se riwayat karte hain. Unhon ne kaha main ne apne baap yani Zubair se arz kiya ke main ne kabhi aap se Rasoolullah Sallallahu Alaihi Wasallam ki Ahadees nahi sunein. Jaisa ke falaan, falaan bayan karte hain, kaha main kabhi Aap se alag-thalag nahi raha lekin main ne Aap ko yeh bhi farmaate huwe suna hai ke jo shakhs mujh par jhoot baandhega woh apna thikaana jahannam mein bana le.

Hum se Abu Ma’mar ne bayan kiya, un se Abdul Waris ne Abdul Aziz ke waaste se naql kiya ke Anas Radhiallahu Anhu farmaate the ke mujhe bahut si hadeesein bayan karne se yeh baat rokti hai ke Nabi Kareem Sallallahu Alaihi Wasallam ne farmaaya ke jo shakhs mujh par jaan boojh kar jhoot baandhe to woh apna thikaana jahannam mein bana le.

Hum se Abu Naeem ne byaan kiya ‘ kaha ke hum se Saeed bin Ubayd ne ‘ un se Ali bin Rabeeah ne aur un se Mughirah bin Shubah razi Allahu anhu ne ke main ne Nabi Karim salla Allahu alaihi wasallam se suna Aap salla Allahu alaihi wasallam farmate thay ke mere mutaliq koi jhooti baat kehna aam logon se mutaliq jhoot bolne ki tarah nahin hai jo shakhs bhi jaan boojh kar mere oopar jhoot bole woh apna thikana Jahannam mein bana le . Aur main ne Nabi Karim salla Allahu alaihi wasallam se yeh bhi suna ke kisi mayyat par agar nuha o maatam kiya jaye to is nuha ki wajah se bhi is par azab hota hai .