Aur Ibn Abbas razi Allahu anhuma ne kaha ke (is aayat) ”Aur Allah Ta'ala ka zikr maloom dinon mein karo“ mein ayyam-e-maloomat se murad Dhul Hijjah ke das din hain aur «ayyam al-m'adoodaat» se murad ayyam-e-tashreeq hain . Ibn Umar aur Abu Hurairah razi Allahu anhuma in das dinon mein bazaar ki taraf nikal jaate aur log in buzurgon ki takbeer (takbeerat) sun kar takbeer kehte aur Muhammad bin Baqir rahmahu Allah nafal namazon ke baad bhi takbeer kehte thay .

Hum se Muhammad bin Ar'ara ne byaan kiya , unhon ne kaha ke hum se Shubah ne Sulayman ke waasta se byaan kiya , un se Muslim Bateen ne , un se Saeed bin Jubayr ne , un se Abdullah bin Abbas razi Allahu anhuma ne ke Nabi Karim salla Allahu alaihi wasallam ne farmaya in (das) dinon ke amal se zyada kisi din ke amal mein fazeelat nahi . Logon ne poocha aur Jihad mein bhi nahi . Aap salla Allahu alaihi wasallam ne farmaya ke haan Jihad mein bhi nahi siwa us shakhs ke jo apni jaan o maal khatra mein daal kar nikla aur wapas aaya to sath kuch bhi na laya (sab kuch Allah ki raah mein qurban kar diya) .