Aur Imam Awzai rahmahu Allah ne kaha ke jab fatah saamne ho aur namaaz parhni mumkin na rahe to isharah se namaaz parh lein . Har shakhs akele akele agar isharah bhi na kar sakein to larayi ke khatam hone tak ya aman hone tak namaaz mauqoof rakhein , is ke baad do rakatein parh lein . Agar do rakat na parh sakein to aik hi ruku aur do sajde kar lein agar yeh bhi na ho sake to sirf takbeer-e-tahreema kaafi nahi hai , aman hone tak namaaz mein der karein . Makhool Tabayi ka yeh qaul hai .

Aur Anas bin Malik ne kaha ke subah roshni mein ”Tustar“ ke qilay par jab charhayi ho rahi thi us waqt mein maujood tha . Larayi ki aag khoob bharak rahi thi to log namaaz na parh sake . Jab din charh gaya us waqt subah ki namaaz parhi gayi . Abu Musa Ash'ari bhi sath thay phir qila fatah ho gaya . Anas razi Allahu anhu ne kaha ke us din jo namaaz hum ne parhi (go woh sooraj nikalne ke baad parhi) us se itni khushi hui ke saari dunya milne se itni khushi na hogi .

Hum se Yahya bin Jafar ne byaan kiya ke hum se Wakee ne Ali bin Mubarak se byaan kiya , un se Yahya bin Abi Kaseer ne , un se Abu Salamah ne , un se Jabir bin Abdullah Ansari razi Allahu anhu ne ke Umar razi Allahu anhu Ghazwa-e-Khandaq ke din kuffar ko bura bhala kehte hue aaye aur arz karne lage ke ya Rasool Allah! sooraj doobne hi ko hai aur main ne to ab tak Asr ki namaaz nahi parhi , is par Nabi Karim salla Allahu alaihi wasallam ne farmaya ke bakhuda main ne bhi abhi tak nahi parhi unhon ne byaan kiya ke phir Aap ”Buthan“ ki taraf gaye (jo Madinah mein aik maidan tha) aur wuzu kar ke Aap ne wahan sooraj ghuroob hone ke baad Asr ki namaaz parhi , phir is ke baad namaaz-e-Maghrib parhi .