Kyunke Allah Taala ka (surah Juma mein) irshaad hai «iza noodiya lis salati min yawmil jumati» ”jab juma ke din namaaz ke liye azaan ho (to Allah ke zikr ki taraf doro)“ Ata ne kaha ke jab tum aisi basti mein ho jahan juma ho raha hai aur juma ke din namaaz ke liye azaan di jaye to tumhare liye juma ki namaaz parhne aana wajib hai . Azaan suni ho ya na suni ho . Aur Anas bin Malik razi Allahu anhu (Basrah se) chhe meel door maqaam Zawiyah mein rehte thay , Aap yahan kabhi apne ghar mein juma parh lete aur kabhi yahan juma nahi parhte . (balkay Basrah ki jami masjid mein juma ke liye tashreef laya karte thay) .

Hum se Ahmad bin Saleh ne byaan kiya , unhon ne kaha ke hum se Abdullah bin Wahb ne byaan kiya , unhon ne kaha ke mujhe Amr bin Haarith ne khabar di , un se Ubaydullah bin Abi Jafar ne ke Muhammad bin Jafar bin Zubayr ne un se byaan kiya , un se Urwah bin Zubayr ne aur un se Aishah razi Allahu anha Nabi Karim salla Allahu alaihi wasallam ki zaujah mutahharah ne , Aap ne kaha ke log juma ki namaaz parhne apne gharon se aur atraf Madinah gaon se (Masjid Nabawi mein) baari baari aya karte thay . Log gard o ghubar mein chale aate , gard mein atte huay aur paseene mein sharabor . Is qadar paseena hota ke thhamta (rukta) nahi tha . Isi haalat mein ek aadmi Rasool Allah salla Allahu alaihi wasallam ke paas aaya , Aap salla Allahu alaihi wasallam ne farmaya ke tum log is din (juma mein) ghusl kar liya karte to behtar hota .