Hum se Muhammed bin ’Alaa ne bayan kiya, un se Hammad bin Usamah ne Buraid bin Abdullah ke waaste se naql kiya, woh Abi Burdah se riwayat karte hain, woh Abu Musa se aur woh Nabi Kareem Sallallahu Alaihi Wasallam se riwayat karte hain ke Aap Sallallahu Alaihi Wasallam ne farmaaya ke Allah Ta’ala ne mujhe jis ilm o hidaayat ke saath bheja hai us ki misaal zabardast baarish ki si hai jo zameen par (khoob) barse. Ba’z zameen jo saaf hoti hai woh paani ko pi leti hai aur bahut bahut sabza aur ghaas ugaati hai aur ba’z zameen jo sakht hoti hai woh paani ko rok leti hai us se Allah Ta’ala logon ko faida pahunchaata hai. Woh us se sairaab hote hain aur sairaab karte hain. Aur kuch zameen ke ba’z khitton par paani padta hai jo bilkul chatyal maidaan hote hain. Na paani rokte hain aur na hi sabza ugaate hain. To yeh us shakhs ki misaal hai jo deen mein samajh paida kare aur nafa’ de us ko woh cheez jis ke saath main mab’oos kiya gaya hun. Us ne ilm-e-deen seekha aur sikhaaya aur us shakhs ki misaal jis ne sar nahi uthaaya (yani tawajjo nahi ki) aur jo hidaayat de kar main bheja gaya hun use qabool nahi kiya. Imam Bukhari Rahimahullah farmaate hain ke Ibn-e-Ishaq ne Abu Usamah ki riwayat se «قَيَّلَتِ الْمَاءَ» ka lafz naql kiya hai. «قَاع» Us khitta-e-zameen ko kehte hain jis par paani chadh jaaye (magar thehre nahi) aur «صَفْصَف» us zameen ko kehte hain jo bilkul hamwaar ho.