Aur surat ke aakhri hisson ka parhna aur tarteeb ke khilaaf surtain parhna ya kisi surat ko (jaisa ke Quran Shareef ki tarteeb hai) us se pehle ki surat se pehle parhna aur kisi surat ke awal hissa ka parhna yeh sab durust hai . Aur Abdullah bin Saeb se riwayat hai ke Nabi Karim salla Allahu alaihi wasallam ne subah ki namaaz mein Surah Mominoon tilawat farmayi , jab Aap Musa alayhis salam aur Haroon alayhis salam ke zikr par pohanche ya Isa alayhis salam ke zikr par to Aap ko khansi aane lagi , is liye ruku farma diya aur Umar razi Allahu anhu ne pehli rakat mein Surah Baqarah ki ek sau bees aayatein parheen aur doosri rakat mein mathani (jis mein taqreeban sau aayatein hoti hain) mein se koi surat tilawat ki aur Ahnaf razi Allahu anhu ne pehli rakat mein Surah Kahf aur doosri mein Surah Yusuf ya Surah Yunus parhi aur kaha ke Umar razi Allahu anhu ne subah ki namaaz mein yeh donon surtain parhi thi . Ibn Masood razi Allahu anhu ne Surah Anfal ki chalis aayatein (pehli rakat mein) parheen aur doosri rakat mein mufassal ki koi surat parhi aur Qatadah razi Allahu anhu ne ek shakhs ke mutalliq jo ek surat do rakaton mein taqseem kar ke parhe ya ek surat do rakaton mein baar baar parhe farmaya ke saari hi Kitaab Allah mein se hain . (lehaza koi haraj nahi)

Ubaydullah bin Umar ne Thabit razi Allahu anhu se unhon ne Anas razi Allahu anhu se naql kiya ke Ansar mein se ek shakhs (Kulthoom bin Hidm) Quba ki masjid mein logon ki imamat kiya karta tha . Woh jab bhi koi surat (Surah Fatihah ke baad) shuru karta to pehle «Qul huwa Allahu ahad» parh leta . Phir koi doosri surat parhta . Har rakat mein us ka yahi amal tha . Us ke saathiyon ne us silsile mein us par itiraz kiya aur kaha ke tum pehle yeh surat parhte ho aur sirf isi ko kaafi khayal nahi karte balkay doosri surat bhi (us ke saath) zaroor parhte ho . Ya to tumhein sirf isi ko parhna chahiye warna isay chhor dena chahiye aur bajaye is ke koi doosri surat parhni chahiye . Us shakhs ne kaha ke main isay nahi chhor sakta ab agar tumhein pasand hai ke main tumhein namaaz parhaoon to barabar parhta rahoon ga warna main namaaz parhana chhor doon ga . Log samajhte thay ke yeh un sab se afzal hain is liye woh nahi chahte thay ke un ke ilawa koi aur shakhs namaaz parhaye . Jab Nabi Karim salla Allahu alaihi wasallam tashreef laye to un logon ne Aap ko waqia ki khabar di . Aap salla Allahu alaihi wasallam ne un ko bula kar poo poocha ke aye falan! tumhare saathi jis tarah kehte hain us par amal karne se tum ko kaun si rukawat hai aur har rakat mein is surat ko zaroori qaraar de lene ka sabab kya hai . Unhon ne kaha ke ya Rasool Allah! main is surat se mohabbat rakhta hoon . Nabi Karim salla Allahu alaihi wasallam ne farmaya ke is surat ki mohabbat tumhein jannat mein le jayegi .

Hum se Aadam bin Abi Iyaas ne byaan kiya , kaha ke hum se Shubah ne byaan kiya , kaha ke hum se Amr bin Murrah ne byaan kiya , unhon ne kaha ke main ne Abu Wail Shaqeeq bin Muslim se suna ke ek shakhs Abdullah bin Masood razi Allahu anhu ki khidmat mein haazir hua aur kaha ke main ne raat ek rakat mein mufassal ki surat parhi . Aap ne farmaya ke kya isi tarah (jaldi jaldi) parhi jaise sher parhe jate hain . Main un hum maani suraton ko jaanta hoon jinhein Nabi Karim salla Allahu alaihi wasallam ek saath mila kar parhte thay . Aap ne mufassal ki bees suraton ka zikr kiya . Har rakat ke liye do do surtain .