Abu al-Aaliya ne bayan kiya ke «is-ta-waaa ilas-samaaa-i» ka mafhoom yeh hai ke woh aasman ki taraf buland hua. «fa-saw-waahun-na» yani phir unhein paida kiya. Mujahid ne kaha ke «is-ta-waa» bamaani «alal-arshi» hai. Ibn Abbas raziAllahu anhuma ne farmaya ke «majeedun» bamaani «kareemun» . «al-wadoodu» bamaani «al-habeebu» bolte hain. «hameedun» , «majeedun» . Goya yeh fa-eel ke wazan par maajid se hai aur «mahmoodun» , «hameedun» se mushtaq hai.

Hum se Abdan ne bayan kiya, in se Abu Hamza ne, in se Aamash ne, in se Jame bin Shaddad ne, in se Safwan bin Muhriz ne aur in se Imran bin Husain razi Allahu anhuma ne bayan kiya ke main Nabi Karim salla Allahu alaihi wasallam ke paas tha ke Aap ke paas Banu Tameem ke kuch log aaye Nabi Karim salla Allahu alaihi wasallam ne farmaya: Ae Banu Tameem! bisharat qabool karo. Unhon ne is par kaha ke Aap ne hamain bisharat de di, ab hamain bakhshish bhi dijiye. Phir Aap ke paas Yaman ke kuch log pahunche to Aap salla Allahu alaihi wasallam ne farmaya ke Ae Ahl e Yaman! Banu Tameem ne bisharat nahi qabool ki tum usay qabool karo. Unhon ne kaha ke hum ne qabool kar li. Hum Aap ke paas is liye hazir huay hain taake deen ki samajh haasil karein aur taake Aap se is duniya ki ibteda ke mutalliq poochhein ke kis tarah thi? Nabi Karim salla Allahu alaihi wasallam ne farmaya ke Allah tha aur koi cheez nahi thi aur Allah ka arsh pani par tha. Phir us ne aasman o zameen paida kiye aur Lauh e Mahfooz mein har cheez likh di (Imran bayan karte hain ke) mujhe ek shakhs ne aa kar khabar di ke Imran apni oontni ki khabar lo woh bhaag gayi hai. Chunanche main is ki talash mein nikla. Main ne dekha ke mere aur is ke darmiyan reit ka chateel maidan haail hai aur Allah ki qasam meri tamanna thi ke woh chali hi gayi hoti aur main Aap salla Allahu alaihi wasallam ki majlis mein se na utha hota.