Allah Ta'ala ne farmaya ke ”Aur (Yusuf) ke saath jail-khana mein do aur jawan qaidi dakhil hue. Un mein se ek ne kaha ke mein khwab mein kya dekhta hoon ke mein angoor ka sheera nichod raha hoon aur doosre ne kaha ke mein kya dekhta hoon ke apne sar par khwan mein rotiyan uthaye hue hoon, is mein se parinde noch noch kar kha rahe hain. Aap hum ko in ki ta'beer batayie, beshak hum to Aap ko buzurgon mein se paate hain? Wo bole jo khana tum donon ke khane ke liye aata hai wo abhi aane na paye ga ke mein is ki ta'beer tum se bayan kar doon ga. Is se pehle ke khana tum donon ke paas aaye yeh is mein se hai jis ki mere Parwardigar ne mujhe taleem di hai mein to in logon ka mazhab pehle hi se chhode hue hoon jo Allah par iman nahi rakhte aur aakhirat ke wo inkari hain aur mein ne to apne buzurgon Ibrahim aur Yaqub aur Ishaq ka deen ikhtiyar kar rakha hai. Hum ko kisi tarah layiq nahi ke Allah ke saath hum kisi ko bhi shareek qarar dein. Yeh Allah ka fazl hai hamare oopar aur sab logon par lekin aksar log is ni'mat ka shukr ada nahi karte. Ae mere qaidi bhaiyo! juda juda bahut se mabood acche ya Allah akela accha jo sab par galib hai? Tum log to ise chhod kar bas chand farzi khudaon ki ibadat karte ho jin ke naam tum ne aur tumhare baap dadon ne rakh liye hain. Allah ne koi bhi daleel is par nahi utari. Hukm sirf Allah hi ka hai. Usi ne hukm diya hai ke siwa is ke kisi ki pooja paat na karo. Yahi deen seedha hai lekin aksar log ilm nahi rakhte. Ae mere dosto! tum mein se ek to apne aqa ko sharab mulazim ban kar pilaya kare ga aur raha doosra to ise suli di jaye gi. Phir is ke sar ko parinde khayein ge. Wo kaam isi tarah likha ja chuka hai jis ki babat tum donon pooch rahe ho aur donon mein se jis ke mutalliq rahayi ka yaqeen tha us se kaha ke mera bhi zikr apne aqa ke samne kar dena lekin ise apne aqa se zikr karna shaitan ne bhula diya to wo jail-khana mein kai saal tak rahe aur badshah ne kaha ke mein khwab mein kya dekhta hoon ke saat moti gayein hain aur unhein khaye jati hain saat dubli gayein aur saat baaliyan sabz aur saat hi khushk, Ae sardaro! mujhe is khwab ki ta'beer batao agar tum khwab ki ta'beer de lete ho. Unhon ne kaha ke yeh to pareshan khwab hain aur hum pareshan khwabon ki ta'beer ke mahir nahi hain aur do qaidiyon mein se jis ko rahayi mil gayi thi wo bola aur ise ek muddat ke baad yaad pada ke mein abhi is ki ta'beer laye deta hoon, zara mujhe jaane dijiye. Ae Yusuf! Ae khwabon ki sacchi ta'beer dene wale! hum logon ko matlab to batayie is khwab ka ke saat gayein moti hain aur unhein saat dubli gayein khaye jati hain aur saat baaliyan sabz hain aur saat hi khushk taake mein logon ke paas jaoon ke un ko bhi maloom ho jaye. (Yusuf Alaihis Salam ne) kaha tum saat saal barabar kashtkari kiye jao phir jo fasal kaato ise is ki baalon hi mein laga rehne do bajuz thodi miqdar ke ke isi ko khao phir is ke baad saat saal sakht aayein ge ke is zakhira ko khayein jayein ge jo tum ne jama kar rakkha hai bajuz is thodi miqdar ke jo tum beej ke liye rakh chhodo ge phir is ke baad ek saal aaye ga jis mein logon ke liye khoob barish ho gi aur is mein wo sheera bhi nichodein ge aur badshah ne kaha ke Yusuf ko mere paas lao phir jab qasidan ke paas pahuncha to (Yusuf Alaihis Salam ne) kaha ke apne aqa ke paas wapas jao. «Waddakara» , «Zikara» se ifti'aal ke wazan par hai. «Ummatin» (yaskoon meem) ba-ma'ni «Qarnun» yaani zamana hai aur baaz ne «Ummatan» (meem ke nasab ke saath) parha hai aur Ibn Abbas Radi Allahu Anhuma ne kaha ke «Ya'siroon» ka ma'ni angoor nichodein ge aur tail nikalein ge. «Tahnoon» ay «Tahrusoon» yaani hifazat karo ge.

`Hum se Abdullah ne bayan kiya, unhon ne kaha hum se Juwairiya ne bayan kiya, un se Imam Malik ne bayan kiya, un se Zuhri ne bayan kiya, unhein Said bin Musayyib aur Abu Ubaida ne khabar di aur un se Abu Hurairah Radi Allahu Anhu ne bayan kiya ke Rasul Allah صلی اللہ علیہ وسلم ne farmaya ”Agar mein itne dinon qaid mein rehta jitne dinon Yusuf Alaihis Salam pade rahe aur phir mere paas qasid bulane aata to mein is ki dawat qabool kar leta.“