Aur Mutarrif ne Shabi se bayan kiya ke do aadmiyon ne ek shakhs ke mutalliq gawahi di ke is ne chori ki hai to Ali razi Allahu anhu ne is ka hath kaat diya. Is ke baad wahi donon ek doosre shakhs ko laaye aur kaha ke hamase ghalati ho gayi thi (asal mein chor yeh tha) to Ali razi Allahu anhu ne in ki shahadat ko batil qarar diya aur in se pehle ka (jis ka hath kaat diya gaya tha) khoon-baha liya aur kaha ke agar mujhe yaqeen hota ke tum logon ne jaan boojh kar aisa kiya hai to main tum donon ka hath kaat deta.

Aur mujh se Ibn Bashar ne bayan kiya, in se Yahya ne, in se Ubaidullah ne, in se Nafi ne aur in se Ibn Umar razi Allahu anhuma ne ke ek larke Aseel naami ko dhokay se qatl kar diya gaya tha. Umar razi Allahu anhu ne kaha ke saare Ahl e Sanaa (Yaman ke log) is ke qatl mein shareek hote to main sab ko qatl kara deta. Aur Mugheera bin Hakeem ne apne walid se bayan kiya ke char aadmiyon ne ek bache ko qatl kar diya tha to Umar razi Allahu anhu ne yeh baat farmayi thi. Abu Bakr, Ibn Zubayr, Ali aur Suwayd bin Muqarrin razi Allahu anhuma ne chaantey ka badla dilwaya tha aur Umar razi Allahu anhu ne darre ki jo maar ek shakhs ko hui ku is ka badla lene ke liye farmaya aur Ali razi Allahu anhu ne teen koron ka qisas lene ka hukm diya aur Shuraih ne kora aur kharash lagane ki saza di thi.