Hum se Ismail ne bayan kiya, kaha un se Malik ne Ishaaq bin Abdullah bin Abi Talha ke waaste se zikr kiya, be-shak Abu Murrah Maula ’Aqeel bin Abi Taalib ne unhein Abu Waaqid Al-Laithi se khabar di ke (ek martaba) Rasoolullah Sallallahu Alaihi Wasallam masjid mein tashreef farmaa the aur log Aap Sallallahu Alaihi Wasallam ke ird-gird baithe huwe the ke teen aadmi wahaan aaye (un mein se) do Rasoolullah Sallallahu Alaihi Wasallam ke saamne pahunch gaye aur ek waapas chala gaya. (Rawi kehte hain ke) phir woh dono Rasoolullah Sallallahu Alaihi Wasallam ke saamne khade ho gaye. Us ke baad un mein se ek ne (jab) majlis mein (ek jagah kuch) gunjaish dekhi, to wahaan baith gaya aur doosra ahl-e-majlis ke peeche baith gaya aur teesra jo tha woh laut gaya. To jab Rasoolullah Sallallahu Alaihi Wasallam (apni guftgu se) faarigh huwe (to Sahaba Radhiallahu Anhum se) farmaaya ke kya main tumhein teen aadmiyon ke baare mein na bataaon? To (suno) un mein se ek ne Allah se panaah chaahi Allah ne use panaah di aur doosre ko sharm aayi to Allah bhi us se sharmaaya (ke use bhi bakhsh diya) aur teesre shakhs ne munh moda, to Allah ne (bhi) us se munh mod liya.