Aur Allah Ta'ala ne (Surah al-Mominoon mein) farmaya «ayah-saboona annamaa numid-duhum bi-hee mim-maaliw-wa baneena» ”kya yeh log yeh samajhte hain ke hum jo maal aur aulad de kar in ki madad kiye jaate hain“ aakhir aayat «min dooni zhaalika hum lahaa aamiloona» tak . Sufyan bin Uyaynah ne kaha ke «hum lahaa aamiloona» se murad yeh hai ke abhi woh aamal unhon ne nahi kiye lekin zaroor un ko karne wale hain .

Hum se Ahmad bin Yunus ne bayan kiya , kaha hum se Abu Bakr bin Ay-yash ne bayan kiya , kaha hum se Abu Haseen ne bayan kiya , in se Abu Salih Zhakwan ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”taungari yeh nahi hai ke saman zyada ho , balkay ameeri yeh hai ke dil ghani ho .“