Aur Allah Ta'ala ne farmaya «fa-man zuhzhiha anin-naari wa udkhilal-jannata faqad faaza wa mal-hayaatud-dunyaa illaa mataa-ul-ghuroori» ”pas jo shakhs dozakh se bacha liya gaya aur jannat mein dakhil kiya gaya woh kamyab hua aur duniya ki zindagi to mahz dhokay ka saman hai .“ Aur (Surah al-Hajr) mein farmaya «zharhum ya'kuloo wa yatamattau wa yulhihimul-amalu fasaufa ya-lamoona» ”Ae Nabi! In kafiron ko chhorr ke woh khaate rahein aur maze karte rahein aur aarzoo un ko dhokay mein ghafil rakkhti rahe , pas woh anqareeb jaan lein ge jab un ko maut achanaak daboach le gi .“ Ali razi Allahu anhu ne kaha ke duniya peeth pherne wali hai aur aakhirat samne aa rahi hai . Insaanon mein duniya wa aakhirat donon ke chahne wale hain . Pas tum aakhirat ke chahne wale bano , duniya ke chahne wale na bano , kyunke aaj to kaam hi kaam hai hisab nahi hai aur kal hisab hi hisab ho ga aur amal ka waqt baqi nahi rahe ga . Surah al-Baqarah mein lafz «bi-muzuhzhihihee» bamaani «bi-mubaaidihee» hai is ke maani hatane wala .

Hum se Sadaqah bin Fadl ne bayan kiya , kaha hum ko Yahya Qattan ne khabar di , in se Sufyan Sawri ne bayan kiya , kaha ke mujh se mere walid ne bayan kiya , in se Munzhir bin Yala ne , in se Rabee bin Khaisam ne aur in se Abdullah bin Masood razi Allahu anhu ne bayan kiya ke Nabi Karim salla Allahu alaihi wasallam ne chaukhta khatt khaincha . Phir is ke darmiyan ek khatt khaincha jo chaukhte ke darmiyan mein tha . Is ke baad darmiyan wale khatt ke is hisse mein jo chaukhte ke darmiyan mein tha chhote chhote bahut se khutoot khainche aur phir farmaya ke yeh insan hai aur yeh is ki maut hai jo usay ghaire huay hai aur yeh jo (beech ka) khatt bahar nikla hua hai woh is ki umeed hai aur chhote chhote khutoot is ki duniyawi mushkilat hain . Pas insan jab ek (mushkil) se bach kar nikalta hai to doosri mein phans jata hai aur doosri se nikalta hai to teesri mein phans jata hai .